რა უნდა გავითვალისწინოთ, როცა სახლში შინაური ცხოველი გვყავს

შინაური ცხოველის ყოლა ბინაში უკავშირდება ყოველდღიურობის შეცვლას და სახლის რეგულარულ დალაგებას. სისუფთავის შენარჩუნება განსაკუთრებით კრიტიკულია მას შემდეგ, რაც სახლში ოთხფეხა მეგობრის ყოლას გადაწყვეტთ. გარდა იმისა, რომ დიდი რაოდენობის ბეწვი ყველა ზედაპირზე დაიდებს ბინას, მნიშვნელოვანია ისიც, რომ გაუფრთხილდეთ ძვირადღირებულ ან საყვარელ ნივთებს და დაიცვათ დაზიანებისგან. ამისთვის საჭიროა, რომ სახლი შესაბამისად მოაწყოთ, შესაძლოა განლაგების შეცვლაც მოგიწიოთ და დიზაინი და ფერები თქვენი ოთხფეხა მეგობრის ფერს შეუხამოთ.

როგორ შევამციროთ ბეწვი

ზოგიერთი ჯიშის ძაღლს სეზონურად განსაკუთრებით დიდი რაოდენობის ბეწვი სცვივა, გარდა ამისა კი მთელი წლის განმავლობაში რეგულარული ცვენა ახასიათებთ. ეს სხვადასხვა მიზეზებით შეიძლება იყოს გამოწვეული, თუმცა შედეგი არ იცვლება. იმისთვის, რომ მინიმუმამდე შეამციროთ ცხოველის ბეწვის სახლში, ზედაპირებზე გაფანტვა, აუცილებელია, რომ ხშირად დავარცხნოთ თქვენი ცხოველი და მოაშოროთ ზედმეტი თმა. ეს მართალია შეამცირებს მისი ბეწვის რაოდენობას, მაგრამ სრულ სისუფთავეს მაინც ვერ შეინარჩუნებთ. ამიტომ მტვერსასრუტის ან ელექტრო ცოცხის რეგულარული გამოყენება მოგიწევთ, რათა იატაკის ზედაპირიდან მოაშოროთ ბეწვი. გარდა იატაკისა, ცხოველის ბეწვი რბილი ავეჯის ზედაპირზეც ხვდება და ჰაერშიც დაფრინავს. ამიტომ მნიშვნელოვანია სწორად შეარჩიოთ ავეჯის ქსოვილები. არჩევანი გააკეთეთ ისეთ ქსოვილზე, რომელიც ნაკლებად იკრავს ბეწვს. მის მოსაშორებლად კი გამოიყენეთ მტვერსასრუტი შესაბამისი თავაკით ან წებოვანი ლენტები, როგორც საკანცელარიო, ისე სპეციალურად ბეწვის მოსაშორებელი.

როგორ მოვაწყოთ ინტერიერი

შინაური ცხოველების პატრონები ხშირად ჩივიან, რომ მათმა ოთხფეხა მეგობარმა საყვარელი ნივთები ან ავეჯი გაანადგურა. განსაკუთრებით კატების პატრონები დარდობენ იმაზე, რომ ნივთების თაროებზე შემოწყობა არ არის მათი გადარჩენის გარანტია, კატები საკმაოდ მოქნილები არიან და ყველანაირ სიმაღლეზე და ყველანაირ ზედაპირზე კომფორტულად ახერხებენ გადაადგილებას და თქვენი საყვარელი ჭურჭლისა თუ დეკორაციებისთვის თათის გაკვრას. ამ შემთხვევაში, ერთადერთი გამოსავალი დახურული კარადების გამოყენებაა. კატებისგან განსხვავებით, ძაღლები ვერ ახერხებენ სიმაღლეების დაპყრობას და მათი „გასაფუჭებელი ზონა“ მაქსიმუმ დივანი და სავარძლები, სკამისა და მაგიდის ფეხები და შპალერია. პირველ რიგში, რა თქმა უნდა, ცხოველის აღზრდასა და სწორი ქცევების დასწავლაზე უნდა ვიმუშაოთ, თუმცა თავის დაზღვევის მიზნით, რეკომენდებულია, რომ ძვირადღირებული ნივთები მათთვის ხელმისაწვდომ არეალში არ მოვაქციოთ ან მზად ვიყოთ მათი შესაძლო დაზიანებისთვის. თუკი ბინის პროექტი გაძლევთ იმის საშუალებას, რომ ოთახებს შორის კარი მუდამ დაკეტილი იყოს, მიაჩვიეთ თქვენი შინაური ცხოველი კონკრეტულ ტერიტორიას და ბრძანების მიცემის გარეშე სხვა ოთახში შესვლის ნება არ დართოთ.

როგორ შევინარჩუნოთ ჰიგიენა

შინაური ცხოველის ყოლისას განსაკუთრებით მნიშვნელოვანი საკითხია ასევე ჰიგიენა, განსაკუთრებით, როცა პატარა ლეკვს ან კატას ეხება საქმე, რომლის ბუნებრივი მოთხოვნილებების დაკმაყოფილება სახლში ხდება. მოზრდილი ძაღლები შემთხვევაში ეს საკითხი უფრო მარტივად წყდება, რადგან ისინი ეზოში სეირნობენ რეგულარულად. კატის საპირფარეშო შესაძლოა მოაწყოთ თქვენს სააბაზანოში და ყურადღება მიაქციოთ მის დასუფთავებას დადგენილი სიხშირით, პატარა ლეკვები კი მიაჩვიოთ სპეციალურ პამპერსის საფენს, რომელიც იატაკის ზედაპირს დაიცავს. გარდა ამისა, გასათვალისწინებელია, რომ ცხოველის ნერწყვიც იფრქვევა როგორც იატაკზე, ასევე ავეჯზე, რაც ტოვებს ლაქებს და მისთვის ყურადღების მიქცევა დროულადაა რეკომენდებული. ზემოთ ჩამოთვლილიდან გამომდინარე, როდესაც სახლში ცხოველი ბინადრობს, იქ სპეციფიკური სუნიც არის, რომელიც მაინც და მაინც არაჰიგიენურობასთან არ არის კავშირში, მაგრამ განსხვავდება ჩვეულებრივი სახლური სუნისგან. მის თავიდან ასაცილებლად აუცილებელია სახლის ხშირი განიავება, ცხოველის ხშირად გასუფთავება, ჰაერის არომატიზატორების გამოყენება და სახლში ჰიგიენის შენარჩუნება სველი წესით დალაგებით.

ნივთების ორგანიზება

სპეციფიკური სუნი აქვს ასევე ცხოველის საკვებს, ამიტომ მნიშვნელოვანია, რომ ბინაში გამოყოთ ცალკე ადგილი სადაც საკვებს ორგანიზებულად შეინახავთ, სასურველია თუ ეს იქნება აივნის კარადაში. გარდა საკვებისა, მნიშვნელოვანია თავისი ადგილი ჰქონდეს ცხოველის პირად ნივთებს, როგორიცაა სათამაშოები, მოვლის საშუალებები, სავარცხელი, საბელი-საყელურები და ა.შ. თამაშის დროს, რა თქმა უნდა, სათამაშოები შესაძლოა მთელ სახლში იყოს მიმობნეული, თუმცა აუცილებელია, რომ კონკრეტული ადგილი იყოს გამოყოფილი მათ მოსათავსებლად თამაშის შემდეგ.

გარდა ზემოთ ჩამოთვლილისა, იატაკზე ნაკაწრების გაჩენა მოსალოდნელია ცხოველის ბრჭყალების გამო, ამიტომ არჩევანი ლამინატზე ან გრანიტის იატაკზე შეაჩერეთ. პარკეტის ნაკაწრებისგან დასაცავად კი ხალიჩა ძალიან ცუდი არჩევანი იქნება, რადგან ბეწვები მჭირდოდ ეკვრის ხალიჩებს მით მეტად, რაც უფრო მაღალბეწვიანია ხალიჩა. ცხოველის ბეწვის „დასამალად“ შეიძლება ისეთი ხრიკებიც გამოიყენოთ, როგორიცაა თქვენი ოთხფეხა მეგობრის ფერი ავეჯისა და ზედაპირების შერჩევა. თუ ღია ფერის ცხოველი გყავთ, მუქი ფერის ავეჯზე მარტივად ეტყობა მისი ბეწვი და არაესთეტიურია. დალაგების საჭიროებას, რა თქმა უნდა, ვერ ანაცვლებს ფერების მისადაგება, თუმცა ესთეტიკური თვალსაზრისით, ნაკლებად შესამჩნევია და დალაგებიდან დალაგებამდე პერიოდში ვიზუალურ დისკომფორტს არ წარმოქმნის.