ბინა ზღვისპირას - უპირატესობა და ნაკლი

უძრავი ქონების ღირებულებას, უპირატესობებსა და ნაკლს განსაზღვრავს მისი ადგილმდებარეობა. გარდა უბნისა, მნიშვნელობა აქვს, რომელ ქალაქში და როგორ კლიმატურ პირობებშია თქვენი ბინა. საქართველოს გეოგრაფიული მდებარეობის გათვალისწინებით, დედაქალაქისა თუ სხვა დიდ-პატარა ქალაქების გარდა აქტუალურია სამთო და საზღვაო კურორტები, რომელიც სეზონურად შემოსავლის წყაროც კი ხდება ხოლმე უძრავი ქონების მფლობელებისთვის. ზღვისპირა კურორტების შემთხვევაში, აქტუალური სეზონი ზაფხულია, როცა ადგილობრივი და უცხოელი დამსვენებლები პლაჟს მიაშურებენ ხოლმე და მზის სხივებითა და ზღვის ტალღებით ტკბებიან. ზღვის სანაპიროზე ბინის ფლობა ხშირ შემთხვევაში, გარდა საცხოვრებელი ფუნქციისა, კომერციულ მიზანსაც იძენს და სეზონურად ქირავდება ხოლმე.

ზღვისპირა ბინებს, რა თქმა უნდა, აქვს თავისი პლუსები და მინუსები. დადებით მხარეზე თუ გავამახვილებთ ყურადღებას, აუცილებლად უნდა აღვნიშნოთ ისეთი ასპექტები, რითაც საზღვაო კურორტი მნიშვნელოვნად უპირატესია სხვა ქალაქების ბინებზე:

თქვენი მუდმივი საცხოვრებელი ისეთ ტურისტულ ზონაშია, სადაც სტუმრობისა და დასვენებისთვის ადამიანები თანხას იხდიან. თუკი ადგილობრივი არ ხართ და ზღვისპირა კურორტზე ბინა საკუთარი დასვენებისთვის გაქვთ, დასასვენებელ თანხას დაზოგავთ და წლის განმავლობაში ნებისმიერ დროს შეძლებთ რომ თქვენს საკუთარ ბინაში წახვიდეთ და დაზოგოთ თავისუფალი ბინის ძებნის რესურსები, ასევე მოაწყოთ თქვენი კომფორტისა და საჭიროებების მიხედვით და არ მოგიწიოთ გასაქირავებელი ბინების შედარება დაა მეტნაკლებად სასურველის ფასთან შესაბამისობაში დაქირავება. მარტივად რომ ვთქვათ, შეგიძლიათ დაისვენოთ საკუთარ ბინაში.  

სახლიდან გაუსვლელად შეგიძლიათ დატკბეთ ულამაზესი ხედებით და ჩაისუნთქოთ სუფთა ჰაერი. არ დაგჭირდებათ გამგზავრება და სპეციალურად დაგეგმვა იმისთვის, რომ ზღვის ტალღების ხმის ფონზე დაისვენოთ როგორც ფიზიკურად, ისე მენტალურად, თუნდაც მცირე მედიტაციას მიმართოთ და სიამოვნება მიიღოთ მზის ამოსვლებისა და მზის ჩასვლების ცქერით. ბინაში ორპირის მოწყობით კი სუფთა ჰაერი შემოუშვათ თქვენს სახლში.

შეგიძლიათ თქვენი ბინა ლოკაციიდან გამომდინარე აქციოთ შემოსავლის წყაროდ.  როგორც ზემოთ აღვნიშნეთ, შესაძლებელია, რომ თქვენს ბინას კომერციული დატვირთვა შესძინოთ სეზონურად გაქირავებით, თუმცა გარდა ამისა, საკურორტე ზონაში გასაყიდი ბინების ფასიც მზარდია და მისი გაყიდვის გადაწყვეტილებაც მომგებიანია მფლობელისთვის. გვიანი გაზაფხულის, ზაფხულისა და ადრეული შემოდგომის პერიოდში განსაკუთრებით მოთხოვნადია საზღვაო კურორტები როგორც ადგილობრივი, ასევე უცხოელი ტურისტებისგან და თუკი გადაწყვეტთ რომ გარკვეული პერიოდით შემოსავალიც მოგიტანოთ თქვენმა ბინამ, შეგიძლიათ ჯავშნები მიიღოთ და დამსვენებლები მიიღოთ. სეზონური გაქირავებით კი შესაძლოა იმდენი მოგება გქონდეთ, რაც ბინის ყოველწლიური სავალდებულო ხარჯებისა და კომუნალურების დაფარვაში დაგეხმარებათ, ან გარკვეულ დანაზოგს გაგაკეთებინებთ თქვენი პირადი დასვენებისთვის, მოგზაურობისთვის თუ სხვა მიზნების ასასრულებლად.

რაც შეეხება ზღვისპირა ქალაქებში ცხოვრების მინუსებს, ამისთვისაც მზად უნდა იყოთ. სხვა ქალაქებისგან განსხვავებით აქ ნესტიანი ჰავაა, რაც შეგუებას საჭიროებს და ჯანმრთელობის კუთხითაც უნდა გაითვალისწინოთ. გარდა ამისა მაღალმა ტენიანობამ შესაძლოა გავლენა იქონიოს ავტომანქანაზეც და უნდა მიიღოთ შესაბამისი ზომები, რითაც დაიცავთ მას დაზიანებისა და ნესტისგან.

ხმაურიანი ტურისტები ზაფხულის სეზონზე შესაძლოა შემაწუხებელი აღმოჩნდეს და სიმყუდროვე დაგირღვიოთ. ზაფხული ზღვის კურორტებზე მუდმივ გართობასთან, ღონისძიებებთან და ხმაურიან გართობასთან ასოცირდება. რიგ შემთხვევებში, პასიური დასვენების მოყვარულებისთვის შესაძლოა ასეთი რეჟიმი დამღლელი იყოს.

გასათვალისწინებელია ასევე არასტაბილური ამინდიც, შტორმის ალბათობა და წყალდიდობის  საშიშროება უფრო მაღალია სანაპირო ზოლში, ვიდრე სხვა დასახლებებში. ქარიანი ამინდის დროს კი, ქვიშიანი სანაპიროს შემთხვევაში მზად უნდა იყოთ რომ მიუხედავად დასუფთავების მცდელობებისა, სახლში ქვიშის მარცვლებთან გამკლავება მოგიწევთ.

თუკი გადაწყვეტილი გაქვთ ზღვისპირა ქალაქში ბინის შეძენა და გააზრებული გაქვთ მისი პლუსები და მინუსები, მაშინ აღარ დაკარგოთ დრო და დაათვალიერეთ house.ge-ს პარტნიორი დეველოპერების პროექტები ბათუმში.