როგორ გამოიყურება სწორი განცხადება კომერციული ფართის გასაქირავებლად?

კომერციული ფართის გაქირავებას, ბინის მსგავსად, სრულყოფილი განცხადება და ხარისხიანი ფოტოების გადაღება სჭირდება, თუმცა სანამ განცხადების ეტაპამდე მივალთ, აუცილებელია, რომ სივრცემ ის ელემენტარული მოთხოვნები დააკმაყოფილოს, რაც ყველა კომერციულ ფართს სჭირდება მასში ბიზნესის განვითარებისა და თანამშრომლების განთავსებისთვის. გარდა საბაზისო ელემენტების მოგვარებისა, ასევე, კონკურენტული გარემოს შესაქმნელად და იმისთვის, რომ მაძიებელმა არჩევანი სწორედ თქვენს ფართზე შეაჩეროს, მას იმაზე მეტი კომფორტი უნდა შესთავაზოთ, ვიდრე ეს სხვებს შეუძლიათ. ჩვენს ბლოგში გაგიზიარებთ რჩევებს, როგორ უნდა გამოიყურებოდეს განცხადება, რომელშიც კომერციული ფართის გაქირავების შესახებ ინფორმაციას ვათავსებთ და რაც მთავარია, რამდენად მნიშვნელოვანია, რომ განცხადებაში აღნიშნული დეტალები რეალურ გარემოს შეესაბამებოდეს.

დაფიქრდით თქვენს პოტენციურ კლიენტებზე

უპირველეს ყოვლისა, როდესაც კომერციული ფართის გაქირავებას გადაწყვეტთ, დაგეგმეთ და განსაზღვრეთ, რომელ სეგმენტში მოიაზრებთ თქვენს პოტენციურ კლიენტებს? ეს იმისთვისაა საჭირო, რომ თქვენი სივრცის დიზაინი, განლაგება და აღჭურვილობა მორგებული იყოს თვენ მიერ შერჩეულ სფეროში მომუშავე კლიენტების მოთხოვნილებებზე. ოთახების განსხვავებული განლაგება და განსხვავებული ფართი სჭირდება მაგალითად მიკროსაფინანსო ორგანიზაციას, ტრენინგ-ცენტრსა და სილამაზის სალონს. წინასწარ განსაზღვრეთ, ვინ შეიძლება იყოს თვენი პოტენციური კლიენტი და შესაბამისად, რა აღჭურვილობა შეიძლება დასჭირდეს. მაგალითად, თუ სილამაზის/ესთეტიკური ცენტრისთვის გადაწყვეტთ ფართის გაქირავებას, რემონტის დროს აუცილებლად დიდი ყურადღება დაუთმეთ სველ წერტილებს, კოსმეტიკური ნაწილი და დიზაინიც შესაბამისად შეარჩიეთ და ფოტოების გადაღებისას სწორი და ზუსტი აქცენტები დასვით ფართის საჩვენებლად. ასევე, სხვა სფეროზე გაქირავების შემთხვევაშიც ვრცელდება  იგივე წინასწარი დაგეგმვის მეთოდი. აქედან გამომდინარე, უკვე შერჩეული სეგმენტის შემდეგ გირჩევთ, რომ განცხადებაში მიუთითოთ დეტალური ინფორმაცია კლიენტზე მორგებული გარემოს და აღჭურვილობის შესახებ და ფოტოს სახითაც დაურთოთ ეს ყველაფერი.

ჩაატარეთ ბაზრის კვლევა

მას შემდეგ, რაც შეარჩევთ, თუ რა ტიპის კომპანია შეიძლება იყოს თქვენი კომერციული ფართის პოტენციური დამქირავებელი, დაფიქრდით, სად შეიძლება იპოვოთ ისინი და შესაბამისად - იპოვონ მათ თქვენი განცხადება. იკვლიეთ, თუ როგორ ეძებენ ფართს ეს ადამიანები. განათავსეთ თქვენი კომერციული ფართის შესახებ ინფორმაცია განცხადებების საიტზე, აღწერეთ ფართის მახასიათებლები და გაავრცელეთ აღნიშნული განცხადება ინტერნეტში ყველა შესაძლო გზით, სოციალური ქსელით, რეკლამით და ა.შ. აღსანიშნავია, რომ ეს ყველაფერი მოითხოვს დროს და გარკვეულ გამოცდილებას, ამასთან გამკლავება თუ ინდივიდუალურად გაგიჭირდებათ, ამ შემთხვევაში სპეციალისტი შეგიძლიათ დაიხმაროთ და ss.ge-ს ფასიანი სერვისებით ისარგებლოთ, რომლის მეშვეობითაც ss.ge-ს წარმომადგენელი თქვენს კომერციულ ფართს გადაუღებს პროფესიონალურ ფოტო-ვიდეო მასალას, მათ შორის, 360 გრადუსის ფოტოებს, სადაც თვენი ობიექტის ვიზუალური დეტალები საუკეთესოდ გამოჩნდება და მეტ დაინტერესებას გამოიწვევს დამთვალიერებლებში.

განათავსეთ განცხადება

დაბოლოს, განათავსეთ განცხადება საიტზე ყველა საჭირო დეტალის გათვალისწინებით, ხაზგასმით აღნიშნეთ განცხადების ტექსტში თქვენი კომერციული ფართის ვიზუალური უპირატესობები, მისამართის მითითებისას დააკონკრეტეთ ის სტრატეგიული ობიექტები, რაც მასთან ახლოსაა და მდებარეობა, რომელიც ასევე კონკურენტუნარიანს ხდის მას სხვა კომერციულ-საოფისე ფართებთან შედარებით. შეგიძლიათ ტექსტში ისიც აღნიშნოთ, თუ რა ტიპის კომპანიისთვის/ორგანიზაციისთვის იქნება ზედგამოჭრილი თქვენი ფართის დაქირავება მისი დაგეგმარების გათვალისწინებით. განცხადების სწორად დადების შესახებ ზოგადი რჩევები ნებისმიერი ტიპის უძრავი ქონებისთვის საერთოა, ეს იქნება საცხოვრებელი ბინა თუ კომერციული ფართი. შესაბამისად, ჩვენი წინა სტატიიდანაც შეძლებთ შეივსოთ ინფორმაცია განცხადების სწორად დადების შესახებ.