ინტერიერის დიზაინის ტენდენციები 2023 წელს

ახალი წლის დადგომასთან ერთად, ახალ ბინაში რემონტის დამწყებებისთვის აქტუალური საკითხია 2023 წლის ტრენდები ინტერიერის დიზაინში. ფერები, ავეჯი, განლაგება და დეტალების ერთმანეთთან შეხამება მნიშვნელოვანი ფაქტორებია და ყველას სურს, რომ საკუთარი ბინის ინტერიერი თანხვედრაში იყოს მიმდინარე პერიოდის ტენდენციებთან.

2023 წელს ბრუნდება ვინტაჟური სტილი, ძველებური ავეჯი და დეტალები ბინას ხასიათს სძენს. 2023 წლისთვის კარგად დავიწყებული ძველი - ახალი იქნება. ინტერიერის დიზაინს, ავეჯსა და დეკორაციებს შეუძლია ნოსტალგიის გამოწვევა, ნოსტალგიის ხაზი გასულ წელსაც აქტუალური იყო და გაგრძელდება მიმდინარე წელსაც, რომელიც სიმყუდროვის და კომფორტის მომტანი იქნება. ბრუნდება ასევე არტ-დეკო,რომელიც 20-იანი წლების სტილია და ხასიათდება გეომეტრიული მოყვანილობით. პოპულარული იქნება წრიული ფორმები,რომლის გამოყენებაც როგორც ავეჯის თვალსაზრისით შეგიძლიათ, მაგალითად მრგვალი მაგიდების სახით, ასევე დეკორაციების და სარკეების დახმარებითაც.

აქტუალური ფერები იქნება მწვანე, მუქი წითელი, ლურჯი და ვერცხლისფერი. ინტერიერში სწორედ ეს ფერთა პალიტრა იქნება ტრენდული. ასევე, მნიშვნელოვან ადგილს დაიკავებს ბუნებრივი ქვების ფერები და ზოგადად, ბუნებრივი ქვები. 2023 წელს ყურადღება გამახვილდება მეტად ბუნებასთან სიახლოვეზე, როგორც ქვების თვალსაზრისით, ასევე მცენარეების კუთხით. შესაბამისად, ბუნებრივი მწვანე - მცენარეების სახით დაიკავებს დიდ ადგილს ინტერიერში.

პანდემიის პერიოდში დისტანციურად მუშაობამ და სახლების ოფისად გადაკეთებამ მეტად კომფორტული სამუშაო სივრცეების მოთხოვნა დააყენა დღის წესრიგში. სწორედ ამიტომ, 2023 წელს აქტუალური იქნება სრულად აღჭურვილი სამუშაო კუთხეების შექმნა და კომფორტული სივრცის მოწყობა.

რაც შეეხება ინტერიერის არაკოსმეტიკურ მხარეს, 2023 წლისთვის ე.წ. თაღები იქნება ტრენდული, „Hunter Carson“დიზაინის აზრით, მომრგვალებული კარის ჩარჩოები, ოთახებს შორის გასასვლელებში თაღები და ჭერის მომრგვალებული დაბოლოებები აღვიძებს ძველი სამყაროს არქიტექტურულ ერას და ქმნის უსასრულობისა და სიმსუბუქის შეგრძნებას. ასევე მნიშვნელოვანი ასპექტია სახლში მეტი ბუნებრივი სინათლის საკითხი, რაშიც დიდი ფანჯრები დაგეხმარებათ.