როგორ შევცვალოთ ბინის გეგმარება და რა არის ამისთვის საჭირო

როგორც წესი, ბინის დაგეგმარება მშენებლობის ეტაპზე მიმდინარეობს. ოთახების განლაგებას, თითოეული მათგანის ფართობს და მსგავს დეტალებს ბინის საერთო ფართი წყვეტს. მნიშნელოვანია ასევე, რამდენად ნათელი მხარეა, ყველა ოთახს აქვს თუ არა ფანჯარა და ბუნებრივი სინათლით მთელი ბინა მარაგდება თუ არა.

დროთა განმავლობაში, შესაძლოა პრიორიტეტები შეიცვალოს და მეტი ოთახი გჭირდებოდეთ, ან არსებული განლაგების შეცვლა მოგიწიოთ, თუმცა იმ მომენტში არ გქონდეთ შესაძლებლობა, რომ საცხოვრებელი ბინა გამოიცვალოთ. ასეთ დროს, ხშირად, გეგმარების შეცვლას მიმართავენ ხოლმე და ოთახების განლაგებას იმ მომენტისთვის არსებული პრიორიტეტების მიხედვით ცვლიან. სარემონტო სამუშაოებისას კედლების გადაადგილებისთვის დაგჭირდებათ კონსულტაციის გავლა სპეციალისტთან, რომელიც გირჩევთ, თუ რომელი კედლის მონგრევა არის შესაძლებელი საჭიროების შემთხვევაში და რომელი წარმოადგენს საყრდენ კედელს და მასზე შეხება აკრძალულია. გარდა ამისა, შეგიძლიათ მიმდინარე ტრენდებს დააკვირდეთ, მოიძიოთ სხვადასხვა დიზაინები და ამის გათვალისწინებით გადააკეთოთ თქვენი ბინა შედარებით მარტივად. მაგალითად თავიდან რომ აირიდოთ მძიმე სამუშაოები, შედარებით დიდი სივრცის გადატიხვრა თაბაშირ-მუყაოს (ასევე ცნობილი, როგორც „გიფსოკარდონი“) კედლებით შეგიძლიათ. აღნიშნული მასალის შეღებვაც სასურველ ფერად შეგიძლიათ, რომ ინტერიერის საერთო დიზაინიდან ამოვარდნილი არ იყოს. თაბაშირმუყაოს დადებით მხარეებს შორის ისიცაა, რომ მისი ფილების მონტაჟი დიდ დროს არ საჭიროებს, არის ანტიალერგიული და ეკოლოგიურად სუფთა. თუმცა, რა თქმა უნდა, მას თავისი უარყოფითი მხარეც აქვს, რაც აუცილებლად უნდა გაითვალისწინოთ, თუ მისი დახმარებით გადაწყვეტთ გეგმარების შეცვლას. თაბაშირმუყაოს ფილებით ამოყვანილ კედელს არ შეუძლია გაუძლოს მძმე დატვირთვას, როგორიცაა მაგალითად, თაროების დაკიდება. ამიტომ, ასეთ შემთხვევაში, ჯობს გაითვალისწინოთ აღნიშნულ კედელთან რა ტიპის ავეჯს განათავსებთ და უპირატესობა მიანიჭეთ კედელზე მიდგმულ ავეჯს, ვიდრე ჩამოსაკიდს. მაგალითად თაბაშირმუყაოს კედელთან შეგიძლიათ განათავსოთ კარადა, საწერი მაგიდა, დივანი ან საწოლი. წიგნების თაროებისთვის კი უმჯობესია, გალესილი კედლის ზედაპირი გამოიყენოთ.

გარდა კედლის ამოყვანისა, გეგმარება შეგიძლიათ ისეთი ტიხრებით შეცვალოთ, რომელიც ვიზუალური აღქმის თვალსაზრისით დაგეხმარებათ, რომ ორი სივრცე ერთმანეთისგან გამოყოთ. ასეთი შეიძლება იყოს დეკორატიული თაროები, რომელშიც მცენარეებს, წიგნებსა თუ დეკორატიულ ნივთებს განათავსებთ და მის ორივე მხარეს განსხვავებული დანიშნულების სივრცეს მოაწყობთ.

ასეთი ტიხარი მომგებიანი იმ შემთხვევაშია, თუკი მყუდრო და იზოლირებული ოთახი არ გჭირდებათ, მაგრამ ორი განსხვავებული დანიშნულების სივრცის საჭიროება გაქვთ, რადგან თაროები რა თქმა უნდა, ხმაურს ვერ შეაკავებს.

გარკვეული ტიპის სარემონტო სამუშაოებისთვის სხვადასხვა ნებართვებია საჭირო, ახალ აშენებული კორპუსების ფასადი წინასწარ შეთანხმებული და განსაზღვრულია, შესაბამისად, ვინაიდან ის ქალაქის სახის ნაწილსაც წარმოადგენს და გარედან ჩანს, აივნების გადაკეთება შესაძლოა არ იყოს ნებადართული, ხოლო ძველ აშენებულ კორპუსებში, ხშირად ვხვდებით ამოშენებულ აივნებს. როდესაც ბინას დიდი აივანი ჰქონდა და მას სრული დანიშნულებით ვერ იყენებდნენ მცხოვრებლები, აივანის ამოშენებას ამჯობინებდნენ, რის ხარჯზეც ერთი დამატებითი ოთახი ემატებოდა მათი ოთახების საერთო რაოდენობას. არსებობს პრეცედენტები, როდესაც ან მთლიან აივანს აშენებენ და მის ადგილზე სამზარეულო გააქვთ, სამზარეულოს ოთახს კი პატარა კაბინეტად ან ბავშის საძინებლად გადააკეთებენ-ხოლმე, ან დიდი აივნის შემთხვევაში მხოლოდ ნახევარ ფართს ითვისებენ სახლისთვის, ნახევარს კი ტოვებენ ისევ აივნის ფუნქციად. ძველ კორპუსებში ასევე, შეხვდებით დიდ მიშენებებს, რაც დღესდღეობით ფასადის დამახინჯებად ითვლება და არ არის რეკომენდებული არამხოლოდ ვიზუალის თალსაზრისით, არამედ უსაფრთხოების კუთხითაც.