როგორ დავსაქმდეთ საზღვარგარეთ

საქართველოს ფარგლებს გარეთ დასაქმების შემთხვევაში, პროცესი და პროცედურები სფეროების მიხედვით განსხვავდება ერთმანეთისგან. ზოგი ადამიანი საზღვარგარეთ ფიზიკური სამუშაოს შესასრულებლად მიდის, ზოგი კი აკადემიურ თანამდებობებს ეუფლება და საერთაშორისო კომპანიებში საქმდება.

სწავლა და მუშაობა საზღვარგარეთ

თუკი მენეჯერული რგოლისა და აკადემიური თანამდებობებისკენ ისწრაფვით, ამ შემთხვევაში, კარიერაზე ზრუნვის შედარებით ადრიანად დაწყებაა საჭირო. მაგალითად, თუკი საზღვარგარეთ გაქვთ მიღებული განათლება, ან გაცვლითი პროგრამებით ხართ ნამყოფი სხვადასხვა ქვეყნებში, ჩართული ყოფილხართ საერთაშორისო მოხალისეობრივ პროგრამებში და ინტერნაციონალური გამოცდილების დიდი ბაზა გაქვთ შექმნილი ან/და დაგროვებული, მეტი შანსია კომპანიებში დასამდეთ თქვენივე პროფესიით. ხშირი კომუნიკაცია კულტურულ სხვაობებსაც შეუმჩნეველს ხდის და მარტივად ინტეგრირდებით ახალ კულტურაში, რაც შესაძლებლობას იძლევა მოერგოთ და ადაპტირდეთ განსხვავებულ გარემოში. ასევე, ენის ბარიერიც ასეთ შემთხვევებში თითქმის არ არსებობს, რადგან სტუდენტობიდანვე ეჩვევით უცხო ენაზე კომუნიკაციას და მისკომუნიკაციის რისკები დროთა განმავლობაში სულ უფრო და უფრო მცირდება. შესაბამისად, სასწავლებლად საზღვარგარეთ წასვლა და შემდეგ სამუშაოდ დარჩენა ერთერთი ყველაზე გავრცელებული ვარიანტია ქვეყნის ფარგლებს გარეთ მუშაობის მსურველთათვის.

როდის ეძებენ სამსახურს საზღვარგარეთ?

განსხვავებულადაა საქმე იმ დროს, როცა საზღვარგარეთ თქვენს პირველ ნაბიჯებს პირდაპირ სამუშაო სფეროში დგამთ და მანამდე გამოცდილება არ გქონიათ სხვა ქვეყანაში ცხოვრების, სწავლისა თუ საქმიანი ვიზიტების. ასეთი გარემოებები რამდენიმე შემთხვევაში დგება: მაგალითად, როცა ადგილობრივ ბაზარზე მცდელობები ამოწურული გაქვთ და ფინანსური კეთილდღეობისთვის ქვეყნის შეცვლის გადაწყვეტილებას იღებთ, ან უბრალოდ გარემოს სრულებით შეცვლა და განსხვავებული გამოცდილებების მიღება გსურთ. ხშირად, სამუშაოს მაძიებლები ფიზიკურ სამუშაოზე საზღვარგარეთ უფრო თანხმდებიან, ვიდრე ქვეყნის შიგნით. ამის მიზეზი ანაზღაურებაში სხვაობაა. საზღვარგარეთ სამუშაოს მაძიებელთა მოტივი ძირითადად ან უკეთესი ანაზღაურების მოპოვებაა ან საერთაშორისო გამოცდილების შეძენა და უცხოურ კომპანიაში მუშაობისა და განსხვავებულ სამუშაო კულტურაში ინტეგრაციის სურვილი.

როგორ ვიპოვოთ სამსახური საზღვარგარეთ?

საზღვარგარეთ სამსახურის მოძიება შესაძლებელია როგორც ინდივიდუალურად, ასევე დასაქმების სააგენტოების დახმარებით. ასევე, ცხადდება მასშტაბური პროექტებიც კონკრეტულ ქვეყანაში რაიმე სამუშაოზე საჭირო გარკვეული ოდენობის თანამშრომლების მოძიების თაობაზე. აღსანიშნავია ის ფაქტი, რომ ხშირად, მოლოდინები და რეალობა ერთმანეთისგან განსხვავდება და ამიტომ კარგად უნდა ჰქონდეს გააზრებული საზღვარგარეთ სამუშაოს მაძიებელს, თუ რა სირთულეებთან შეიძლება იყოს დაკავშირებული სხვა ქვეყანაში სამსახურის მოძიება. გამგზავრებამდე შესაძლოა დიდი ფინანსური რესურსის გაღებაც კი მოგიწიოთ შუამავალ კომპანიებთან. საცხოვრებელი ადგილის პრობლემა შეგექმნათ ან ისეთ მოკლე დროში ვერ იშოვოთ სასურველი სამსახური, როგორც ვარაუდობდით.

პრაქტიკა გვიჩვენებს, რომ სახელმწიფოს ჰქონდა პროექტი, რომლის ფარგლებშიც შრომითი მიგრაციის ჭრილში ლეგალურად ასაქმებდა საქართველოს მოქალაქეებს პოლონეთსა და ესტონეთში. თუმცა მსურველთა რაოდენობა რეალურად დასაქმებულთა რაოდენობას ძალიან ბევრჯერ აღემატებოდა. ასეთ შემთხვევაშიც ძირითადი სამუშაო ადგილები მოიცავს სამშენებლო სფეროს, ელექტროშემდუღებლების პოზიციას, სხვადასხვა სახის ტვირთების გადაზიდვას, საწარმოებში ფიზიკურ შრომას და ა.შ.

მცირე სტატისტიკა

სტატისტიკურად, საზღვარგარეთ მსგავსი სამუშაოს შესასრულებლად ძირითადად 20-დან 45 წლამდე მამაკაცები მიდიან, ხოლო თუ საქმე მოხუცის მოვლას და საოჯახო საქმეს ეხება, აქ ემიგრანტებად წასულთა თითქმის სრული რაოდენობა ქალია, რომელთა ასაკიც ძირითადად 50 წლის ზემოთაა.

სახელმწიფოს მხრიდან ინიცირებული ლეგალურად დასაქმების პროგრამა 2021 წელს დაიწყო გერმანიაში, სადაც სპეციალურად შექმნილ პორტალზე რეგისტრირებული 100 ათასზე მეტი მსურველიდან 308 ადამიანი დასაქმდა. აღნიშნული პროგრამა გერმანიაში სეზონურ სამუშაოებში ჩართვას ითვალისწინებდა და სოფლის მეურნეობის სფეროს ფარავდა. პროგრამა 2022 წელსაც გაგრძელდა საქართველოში, თუმცა გარკვეული პირობები ზოგი ადამიანისთვის მიუღებელი აღმოჩნდა.

დაბოლოს, საზღვარგარეთ დასაქმების გადაწყვეტილების მიღებისას მნიშვნელოვანია, რომ კარგად გაიაზროთ და ერთმანეთისგან გამიჯნოთ მოლოდინები და რეალობა, აწონ-დაწონოთ რისკები და სირთულეები და ისე მიიღოთ საბოლოო გადაწყვეტილება. რაც შეეხება იმას, თუ სად უნდა იპოვოთ ვაკანსიები, ამაში ss.ge-ს დასაქმების კატეგორიაში არსებული საზღვარგარეთ დასაქმების ბლოკი დაგეხმარებათ.