რას ამოწმებს ბანკი იპოთეკის დამტკიცებამდე?

იპოთეკა სესხის სახეობაა, რომელსაც ბანკი ან სხვა ფინანსური ორგანიზაცია უძრავი ქონების უზრუნველყოფით გასცემს. იპოთეკური სესხი ყველაზე ხანგრძლივი ვადის მქონე სესხია, ის შესაძლოა გაიცეს 20 წლამდე ვადით. აქედან გამომდინარე, იპოთეკის გაკეთებამდე სწორად და კარგად უნდა გათვალოთ თქვენი ფინანსური მომავლის სტაბილურობა და დარწმუნდეთ, რომ გადასახადს გაუმკლავდებით და უძრავი ქონებაც თქვენს საკუთრებაში დარჩება.

იპოთეკური სესხის გაცემამდე ბანკი უფლებამოსილია გადაამოწმოს გარკვეული დეტალები და რისკების შეფასების შემდეგ გადაწყვიტოს იპოთეკური სესხის დამტკიცება. მოსათხოვ დეტალებს შორის შესაძლოა იყოს მსესხებლის სიცოცხლის ან უზრუნველსაყოფად ჩადებული ქონების დაზღვევა, რადგან სესხის ხანგრძლივობიდან გამომდინარე შეიძლება გაუთვალისწინებელი რისკების შემთხვევა დადგეს. ბანკი ასევე ამოწმებს მსესხებლის საკრედიტო ისტორიას, თუ ჰქონდა მანამდე რაიმე ტიპის სასესხო ვალდებულებები, რამდენად კეთილსინდისიერი გადამხდელი იყო, ხომ არ ჰქონია ვადაგადაცილებები და ა.შ. ასევე, მოწმდება მისი შემოსავლის სტაბილურობა, მსესხებელს აუცილებლად უნდა ჰქონდეს მუდმივი შემოსავალი, რაც მის საბანკო ამონაწერში ფიქსირდება. ეს შეიძლება იყოს ხელფასი, იჯარა ან გზავნილი.

მნიშვნელოვანი ფაქტორია ასევე იმ უძრავი ქონების შეფასება, რომელიც იპოთეკით უნდა დაიტვირთოს, საფინანსო ორგანიზაციის შემფასებელი მიდის ადგილზე და ათვალიერებს იმ უძრავ ქონებას, რომელსაც მსესხებელი იპოთეკაში დებს. ეს შეიძლება იყოს ბინა, კერძო სახლი, მიწის ნაკვეთი თუ კომერციული ფართი - ნებისმიერი უძრავი ქონება. ქონების შეფასება ხდება მისი მდგომარეობის, საბაზრო ღირებულებისა და ფართის მიხედვით და მისი ღირებულების შესაბამისად გასცემს ბანკი იპოთეკურ სესხს.

სესხზე შესაძლებელია წარმოდგენილი იყოს ერთი ან ერთზე მეტი თანამსესხებელი. ის უნდა წარმოადგენდეს მთავარი მსესხებლის ოჯახის წევრს/წევრებს და მასთან ერთად ეწეოდეს საერთო მეურნეობას. მისი საკრედიტო ისტორიისა და შემოსავლების გადამოწმება ასევე ბანკის უფლებამოსილებაში შედის.

საქართველოში მოქმედი კანონმდებლობის მიხედვით, სესხის აღება სამ ვალუტაშია შესაძლებელი: ეროვნულ ლარში, დოლარსა და ევროში. იმ შემთხვევაში, თუ დავალიანების ოდენობა 200 000 ლარამდეა, სესხი აუცილებლად ლარში გაიცემა. იპოთეკის მაქსიმალური ვადის - 20 წლის გამოყენება შესაძლებელია იმ შემთხვევაში, თუკი სესხი ეროვნულ ვალუტაში გაიცემა ან უცხოურ ისეთ ვალუტაში (დოლარი/ევრო), რომელშიც მსესხებლის ხელფასი ფიქსირდება. ხოლო ისეთ დროს, როდესაც სესხი უცხოურ ვალუტაშია, ხოლო მსესხებელი განსხვავებულ ვალუტაში იღებს ხელფასს/შემოსავალს, იპოთეკური სესხის მაქსიმალური ვადა 15 წლამდე მცირდება.

ასევე, მსესხებელს აქვს შესაძლებლობა, რომ თუკი უკვე სარგებლობს იპოთეკური სესხით და მეორე იპოთეკის აღების სურვილი აქვს, გააერთიანოს არსებული სესხები და ერთი იპოთეკური სესხის გადახდა განაგრძოს.