როგორი უნდა იყოს აგარაკი გასაქირავებლად

უძრავ ქონებაზე ფასი, როგორც თბილისსა და ბათუმში, ასევე მთელ საქართველოში გაიზარდა. ამის გარდა, საქართველოში ყოველწლიურად ტურისტების მატებასთან და ასევე, შიდა ტურიზმის განვითარებასთან ერთად, პოპულარული გახდა გასაქირავებლად აგარაკების მშენებლობა. ასევე, საქართველოში უამრავმა მიტოვებულმა სახლმა შეიძინა ახალი სიცოცხლე, როდესაც წინაპრების მიტოვებულ ქონებაში მემკვიდრეებმა პოტენციური შემოსავალი დაინახეს. თუმცა, როგორ ავაშენოთ აგარაკი იაფად, რომლის სარფიანად გაქირავებასაც შევძლებთ, ან როგორ შევქმნათ წინაპრების უძრავი ქონებისგან ტურისტულად მიმზიდველი სივრცე.

დღესდღეობით თბილისის შემოგარენში, თუ საქართველოს სხვადასხვა კურორტზე მარტივად შეგიძლია იპოვო აგარაკი ქირით, რომლისთვისაც თვიურად გადაიხდი. თუმცა, ქალაქგარეთ წვეულებების მოსაწყობად თუ ვიქენდების ბუნებასთან სიახლოვეს გასატარებლად, უფრო ხშირად, დღიურად ქირაობას ანიჭებენ უპირატესობას.

რა აუცილებელ პირობებს უნდა აკმაყოფილებდეს აგარაკი


თუ წინაპრების სახლის განახლება და გაქირავება გადაწყვიტე, მაგრამ ბევრის დახარჯვა არ გინდა, მაინც მოგიწევს გარკვეული აუცილებელი საჭიროებების დაკმაყოფილება. მაგალითად, ეზოში მოწყობილი საპირფარეშო აგარაკისთვის არ გამოდგება. მიუხედავად იმისა, რომ მდგმურებიც ცდილობენ მაქსიმალურად იაფად იპოვონ სახლი, ისინი მაინც საკმარისს გადაიხდიან, რომ აუილებელი კომფორტის მოწყობა ინვესტიციად ღირდეს. ბუნებაში იაფად დასვენება შესაძლებელია კარვებით, ტყეში კემპინგის მოწყობა ან საქართველოს ულამაზეს მთებში ლაშქრობა. ხოლო, ისინი ვინც აგარაკს ქირაობენ, მზად არიან კომფორტისთვის გადაიხადონ.

ახლა, სულ უფრო პოპულარული ხდება მიწის ერთ ნაკვეთზე რამდენიმე კოტეჯის, ან პატარა სახლის აშენება. თუმცა, შეგვიძლია განვიხილოთ ორი ტიპის გასაქირავებლად განკუთვნილი სახლები. ასეთი შეიძლება იყოს ლამაზი კოტეჯი, რომელსაც ქორწილის, კორპორატიული წვეულების ან ახალი წლის აღსანიშნავად ქირაობენ. მაგრამ მის მოიჯარეებს ცალკე ნაკვეთი სჭირდებათ, მჭიდროდ დასახლებული პუნქტიდან მოშორებით, რათა წვეულებისგან გამოწვეულმა ხმაურმა არავინ შეაწუხოს. მეორე ვარიანტს შედარებით მოკრძალებული სახლი წარმოადგენს, რომელსაც შეყვარებული წყვილები, ან ოჯახი ქირაობს ხანმოკლე დასვენებისთვის.

ერთ ნაკვეთზე განთავსებული შეიძლება იყოს მხოლოდ ორი ან სამი პატარა შენობა. სახლს უნდა ჰქონდეს ოჯახისთვის საკმარისი საძინებელი ოთახები და საწოლები, პატარა მისაღები ოთახი, სამზარეულო, ერთი ან ორი აბაზანა, წყალი და კანალიზაცია.

ასევე, არსებობს ყოველთვიურად გაქირავების შესაძლებლობაც, თუმცა ისინი ნაკლები პოპულარობით სარგებლობს და ასევე, ნაკლები შემოსავლის მოტანა შეუძლია.

სად სჯობს აგარაკის აშენება



აგარაკი, უმჯობესია თბილისთან ახლოს იყოს. ან რომელიმე სახელგანთქმულ კურორტზე. შესანიშნავი არჩევანი იქნება კოჯორი, რომელიც ორივე კომპონენტს იდეალურად აკმაყოფილებს. ასევე, შესაძლებელია სიონში და ცხვარიჭამიაში აშენება. ბაზალეთის ტბის მიმდებარე ტერიტორია, ჟინვალის წყალსაცავი. ნებისმიერ შემთხვევაში, ისეთი ადგილი უნდა შეარჩიო, სადაც ტყე, ბუნებრივი ან ხელოვნური წყალსაცავი, მდინარეები, ჩანჩქერი თუ ბუნების სხვა სიმდიდრეები უხვად იქნება.

დიდი უპირატესობაა, ისტორიულ ძეგლებთან, უძველეს ციხესიმაგრეებთან, კოშკებთან, ქრისტიანული კულტურის ძეგლებთან ფეხით სავალ მანძილზე სიახლოვე.

როგორ მოვაწყოთ იდეალური აგარაკი

იმ შემთხვევაში, თუ მაქსიმალური მოგების მიღება გადაწყვიტე და რამდენიმე პატარა სახლის აშენებას გეგმავ რამდენიმე საკითხი უნდა გაითვალისწინო. სახლების ფანჯრები ერთმანეთს არ უნდა უყურებდეს და ფანჯრიდან მეზობელი არ უნდა ჩანდეს. აუცილებელია რაიმე სახით იზოლირება, თუნდაც ბუნებრივი ღობის მეშვეობით. შესანიშნავი იქნება სახლის ტერასით აღჭურვა და ფანჯრების პანორამული შემინვა.

თუ ბევრის დახარჯვა არ გინდა, შესაძლებელია ამ ორ-სამ სახლს საერთო სამწვადე სივრცე, ფანჩატური და აუზი ჰქონდეს. სურვილის შემთხვევაში მეზობლები თავად შეთანხმდებიან ვინ როდის გამოიყენებს ამ სივრცეებს, თუმცა ადამიანები ხშირად კომუნიკაციისთვის არიან განწყობილი და უმეტესად ასეთი საჭიროება არ დადგება.

არ არის აუცილებელი ბავშვებისთვის სათამაშო მოედნის მოწყობა. ასეთი მოედნები ურბანულ გარემოში, ქალაქის პარკებშიც ბევრია. უკეთესი იქნება თუ ბადეს გააბამ ხელბურთისთვის და ეზოში ბადმინტონი, ფრიზბი, ბურთი და სხვა გასართობები იქნება.