დელეგირების ძალა: რატომაა მნიშვნელოვანი პროცესების გადაბარება?

გადაწყვეტილებების მიღების დელეგირების საჭიროება ბიზნესში ადრე თუ გვიან აუცილებლად დგება. თავდაპირველად, ყველა მენეჯერი ცდილობს, რომ სრულ საქმიანობაში იყოს ჩართული და პირადად იღებდეს გადაწყვეტილებებს როგორც მნიშვნელოვან, ასევე შედარებით უმნიშვნელო საკითხებზე. მიკრომენეჯმენტი კი გრძელვადიან პერსპექტივაში ბიზნესისთვის ზარალის მომტანი და ტოქსიკური ხდება. მენეჯერებს უნდა ჰქონდეთ მზაობა, რომ მათ თანამშრომლებს მიანდონ საქმე, ამისთვის კი თავიდანვე სწორად შერჩეული თანამშრომლების ყოლა უნდა უზრუნველყონ. ურთიერთპატივისცემის, ნდობის და საქმისადმი ლოიალურობის ტრიო შექმნის ისეთ სამუშაო გარემოს, რომელშიც ჯანსაღი ურთიერთობები ჩამოყალიბდება კოლეგებს შორის და დროებითი დელეგირების საჭიროებისასაც არ წარმოშობს პრობლემებსა თუ გართულებებს.

უპირველეს ყოვლისა, საქმის დელეგირებისას მნიშვნელოვანია, რომ თანამშრომლებს მიაწოდოთ სრულყოფილი ინსტრუქცია საქმის შესრულებასთან დაკავშირებით. დელეგირების ეფექტურობისთვის ასევე, საჭიროა სრული ავტონომიის მიცემამდე მათთან ერთად აკეთოთ კონკრეტული საქმე და მას შემდეგ, რაც დარწმუნდებით რომ მზად არიან დამოუკიდებელი მუშაობისთვის, გადააბაროთ საქმიანობა და პერიოდულად მოიკითხოთ განახლებები.

არასწორ დელეგირებას, რა თქმა უნდა, ახლავს თავისი რისკები და აუცილებელია სიფრთხილე. მაგალითად, თუკი ისეთ საკითხებს გადავაბარებთ ხელქვეითებს, რისი შესრულებაც არ შეუძლიათ ან მათ კომპეტენციას აღემატება, შედეგს ვერ მივიღებთ და საქმე გაფუჭდება, საქმესთან ერთად გაფუჭდება ურთიერთობაც კოლეგებს შორის და დაქვეითდება მოტივაცია და შესაძლოა დასაქმებულის თვითშეფასებაც კი.

მენეჯერის მიერ დასაქმებულისთვის საქმის დელეგირებისას, ასევე აუცილებელია, რომ წინასწარ იყოს განსაზღვრული მოლოდინები თანამშრომელთა ძლიერ და სუსტ მხარეებზე დაყრდნობით. შესრულებული საქმიანობის შემდეგ კი არც უკუკავშირის ძალა უნდა დავივიწყოთ.  თანამშრომლების მოტივაციის შენარჩუნებისთვის, აუცილებელია, რომ მათ ვუთხრათ რამდენად სწორად შეასრულეს მოვალეობა, რა შენიშვნები გვაქვს მათ მუშაობასთან დაკავშირებით და პირიქით, რა განსხვავებული მიდგომები მოგვეწონა მათ მიერ შესრულებულ საქმიანობაში. არ დავივიწყოთ მადლობის გადახდა და კრეატიული, შემოქმედებითი მიდგომების წახალისება.

გარდა მენეჯერისგან თანამშრომლებზე დელეგირებული ამოცანებისა, არსებობს დროებითი დელეგირებაც. ზაფხული სანატრელი შვებულებების პერიოდია, ოფისში დატოვებული საქმეები კი არ იცდის და შესასრულებელი პროექტებისთვის დასვენების პერიოდი სულაც არ არის. იმისთვის, რომ შვებულებიდან დაბრუნებულებს, მიმდინარე საქმეებთან ერთად დაგროვილი საქმეც არ დაგხვდეთ და დასვენებისას მიღებული სიამოვნება ორმაგ სტრესად არ გადაიქცეს, საქმეების კოლეგებისათვის დელეგირებაა სწორი ნაბიჯი.

გუნდში შესასრულებელი ამოცანების გადანაწილება და თანამშრომლების თანაბარ პირობებში ყოფნა ერთერთი მნიშვნელოვანი და სასიცოცხლო ფაქტორია ორგანიზაციისათვის. გუნდის წევრები ერთმანეთს უნდა აღიქვამდნენ პარტნიორებად და არა კონკურენტებად, საერთო შედეგის მიღწევისთვის ერთსულოვნება ნამდვილად არსებითი წინაპირობაა. აქედან გამომდინარე, დასვენების დროს კოლეგების საქმეების შეთავსება ორმაგი გარანტიაა: პირველი - პროექტი არ გაჩერდება და შედეგისკენ სრული სვლით განაგრძობს გზას და მეორე - როდესაც თქვენ ისარგებლებთ შვებულებით, თქვენს საქმეებსაც გადაიბარებენ სხვები და შვებულებიდან გამოსული კვლავ მიმდინარე საქმეების ფერხულში ჩაებმებით, დასვენების დროს კი არ შეგაწუხებთ შფოთვა იმის თაობაზე, თუ რა დაგხვდებათ ოფისში დაბრუნებულს.

პროცესების გადაბარება როგორც თავად პროცესის შემსრულებლებისთვისაა მნიშვნელოვანი, ასევე ეხებათ იმ ადამიანებსაც, რომლებიც ამ პროცესთან დაკავშირებული პირები არიან და საკონტაქტოდ მუდმივად სჭირდებათ კონკრეტული ინდივიდები. ერთი ადამიანის შვებულებაში გასვლით პროცესი არ უნდა ჩერდებოდეს და საკითხზე შემოსულ შეკითხვებს ჩამნაცვლებელი ადამიანი უნდა პასუხობდეს.

საბოლოო ჯამში, დელეგირება აძლიერებს გუნდურობას, გუნდური მუშაობა კი კომპანიის წარმატების უტყუარი გარანტიაა. გარდა ამისა ხეს უწყობს თანამშრომლების განვითარებას და მრავალფეროვანი გამოცდილების დაგროვების საშუალებას აძლევს. გამოცდილი და კვალიფიციური თანამშრომელი კი კომპანიას აძლიერებს და ყოველთვის დადებითი შედეგების მომტანია.