რა თავისებურებები აქვს უძრავი ქონების არჩევას სხვადასხვა რეგიონში?

საქართველოს მაგალითით თუ ვიმსჯელებთ, ვნახავთ, რომ ქვეყნის მოსახლეობის უდიდესი წილი დედაქალაქშია თავმოყრილი. ამას განაპირობებს ინფრასტრუქტურული განვითარება, მრავალფეროვნება და სერვისების შედარებით მარტივად ხელმისაწვდომობა. უძრავი ქონების შერჩევისას, პირველ რიგში, კარგად უნდა გქონდეთ გაცნობიერებული და დაგეგმილი, თუ რა ტიპის საჭიროებები გაქვთ და აღნიშნული უძრავი ქონება საცხოვრებლად გსურთ, დასასვენებლად თუ კომერციული მიზნებისთვის. ასევე, კარგად უნდა დათვალოთ და გაწეროთ თქვენი ბიუჯეტი, რადგან რეგიონებისა და უბნების მიხედვით ფასები ერთმანეთისგან განსხვავდება.

თუ დედაქალაქში ცხოვრებას გადაწყვეტთ და ბინას თბილისში შეარჩევთ, აუცილებლად უნდა გაითვალისწინოთ პლუსები და მინუსები, შეადაროთ ერთმანეთს და სწორედ ამის მიხედვით გააკეთოთ საბოლოო არჩევანი. თბილისში ცხოვრების უპირატესობა იმაში მდგომარეობს, რომ დიდი არჩევანია საშუალო და უმაღლესი საგანმანათლებლო დაწესებულებების, ყველა მოვლენის ეპიცენტრში დედაქალაქია და გასართობი თუ საქმიანი ღონისძიებების უმრავლესობა სწორედ თბილისში იყრის თავს, ასევე მრავალფეროვანი არჩევანია სამედიცინო მომსახურების კუთხით, გასართობი და კვების ობიექტებიც მრავლად არის და კინო-თეატრებიც არაერთია. ასე რომ დასვენების დრო სად გაატაროთ დიდი არჩევანი გაქვთ. უძრავი ქონების შეძენა კი თბილისის უბნების მიხედვით პრესტიჟულობის გათვალისწინებით სხვადასხვა ფასად შეგიძლიათ. რაც უფრო ახლოს არის ცენტრთან, უფრო ძვირია ბინა, თუმცა გარეუბნები ნაკლებ პრობლემას წარმოადგენს თუ მეტროთი გადაადგილდებით. ყველაზე სწრაფი ტრანსპორტი თბილისის გარდა საქართველოს არცერთ ქალაქში არ გვაქვს. თუკი დედაქალაქის პლუსებმა მოგხიბლათ, ობიექტურობისთვის მინუსებზეც უნდა ვისაუბროთ. თბილისი არ გამოირჩევა სუფთა ჰაერით, მეტიც, ავტომანქანების რეკორდულად დიდი რაოდენობის გამო გამონაბოლქვის რაოდენობა ჰჰაერში ზოგიერთ უბანში საგანგაშო ნიშნულსაც კი აღწევს ხოლმე. ამავე მიზეზის გამო, დანიშნულების ადგილზე მისასვლელად ავტომობილით ჩვეულებრივზე მეტი დრო დაგჭირდებათ, რადგან საცობს ვერცერთ უბანში ვერ აარიდებთ თავს. ასევე პრობლემატურია ქალაქში პარკირების საკითხი, თითქმის ყველა უბანში ფასიანია საათობრივ-ზონალურად და ბევრგანაც ავტობუსის ზოლით არის პარკირების ზოლი ჩანაცვლებული და ავტომობილების დაყენება ნამდვილად გაგიჭირდებათ. თუ იტყვით, რომ საზოგადოებრივი ტრანსპორტით გადაადგილებას მიანიჭებთ უპირატესობას, არც ეს არის კომფორტული გამოსავალი, რადგან როგორც დასაწყისში აღვნიშნეთ, მოსახლეობის უმეტესი ნაწილი დედაქალაქზე მოდის და შესაბამისად, მათი გადაადგილებისთვის დიდი რაოდენობის საზოგადოებრივი ტრანსპორტია საჭირო, რომელიც მცირე შუალედებით ივლის, რათა თითოეულ მათგანში მგზავრობისგან დისკომფორტი არ შეექმნათ მგზავრებს ხალხმრავლობის გამო. თბილისში სხვა ქალაქებისგან მეტნაკლებად განსხვავებულია ფასებიც, განსაკუთრებით კვების ობიექტებში. ერთი სიტყვით, სხვა ქალაქებთან შედარებით დედაქალაქში ცხოვრება ძვირია.

რაც შეეხება სხვა დიდ ქალაქებს საქართველოში, ზომით ყველაზე დიდი სწორედ დედაქალაქია და ახალი დასახლებების წყალობით თბილისის შემოგარენი კიდევ უფრო გაიზარდა, მას მოსდევს ქუთაისი და ბათუმი. ბათუმი ერთერთი ტურისტულად აქტიური ქალაქია, რადგან ზღვის სანაპიროზე მდებარეობს და გამორჩეულია ინფრასტრუქტურით, მომსახურების სფეროთი. ბათუმში უძრავი ოქნების შეძენა საცხოვრებლად, რა თქმა უნდა, ინდივიდუალური გადაწყვეტილებაა, თუმცა კომერციული მიზნისთვის ნამდვილად მომგებიანი და სარფიანია. საკუთარი ქონების ფლობით, როცა თავად მოისურვებთ ზღვისპირეთში ყოფნას, თქვენივე ბინას გამოიყენებთ დასარჩენად, სხვა დროს კი შეგიძლიათ დამსვენებლებზე გააქირაოთ და ამით შემოსავლის წყაროდ აქციოთ თქვენი უძრავი ქონება. ზაფხულის სეზონზე ბათუმშიც ვერ გაექცევით საცობების პრობლემას და ხმაურს, დამსვენებლები საქართველოს სხვადასხვა ქალაქებიდან და სხვა ქვეყნებიდან თავს სწორედ აჭარის მთავარ ქალაქში იყრიან, ზაფხული გასართობი ღონისძიებებით გამოირჩევა.

ბათუმში ცხოვრებისას ასევე გასათვალისწინებელია ჰავა. თბილისისა და სხვა ქალაქებისგან განსხვავებით ბათუმში ნესტიანი ჰავაა, თუკი გარდა უძრავი ქონების ინტერესისა, საცხოვრებელი ადგილი შესაბამისი ჰავის მიხედვით უნდა შეარჩიოთ, ეს ფაქტიც აუცილებლად გასათვალისწინებელი იქნება. ბათუმში ბინის შერჩევას და ყიდვას ამ ბმულის დახმარებით შეძლებთ, ბათუმის ბინების განცხადებები სწორედ SS.GE-ს ამ კატეგორიაშია თავმოყრილი.

საბოლოო ჯამში, კარგად მოსაფიქრებელია უძრავი ქონების შეძენის მიზანი და მოტივი, სწორედ ამის მიხედვით აარჩევთ, თუ სად ჯობს მისი შეძენა და რამდენად გაგიმართლებთ იმ მიზნებსა და მოლოდინებს, რომლებიც თავიდანვე დასახული გაქვთ.