როგორ ამოვიცნოთ და ვმართოთ ტოქსიკური თანამშრომლები?

ჩვენს წინა ბლოგებში არაერთხელ ვახსენეთ, თუ როგორი დამანგრეველია ტოქსიკური უფროსის ყოლა სამუშაო ადგილზე, თუმცა არანაკლებ საშიშია ტოქსიკური თანამშრომლები. ისინი წამლავენ თავიანთ კოლეგებს და სამუშაო გარემოს არაჯანსაღ ადგილად აქცევენ, ტოქსიკური თანამშრომლები შესაძლოა კომპანიისთვის სავალალო შედეგების მომტანი იყვნენ. დასაქმებულები ორგანიზაციის ამბასადორები არიან კომპანიის გარეთ, მუდმივად უკმაყოფილო და უმადური ადამიანები კი ნამდვილად უარყოფითად მოქმედებენ კომპანიის იმიჯზე.

ტოქსიკური ადამიანები საკმაოდ სწრაფად წამლავენ გარემოს. არ აქვს მნიშვნელობა, ისინი სამსახურში იმყოფებიან თუ ნებისმიერი ტიპის ურთიერთობაში. მათი ნეგატიური დამოკიდებულებები, დამანგრეველი ქცევა და ანგარიშვალდებულების დეფიციტი დიდ გავლენას ახდენს გუნდის დინამიკაზე, მორალურ მდგომარეობასა და საერთო პროდუქტიულობაზე. ტოქსიკური ადამიანები სამ კატეგორიად შეიძლება დავყოთ სამუშაო ადგილზე:

1)  გამანადგურებელი/დამანგრეველი ტიპი: ასეთი ტიპის ადამიანები სამსახურში თავს უბედურად გრძნობენ, ცდილობენ ამ ნეგატივში სხვებიც ჩაითრიონ, აქვთ მუდმივად უარყოფითი წინასწარი განწყობები, ყოველთვის პოულობენ ვინმეს/რამის - ანუ გარემო ფაქტორების - ბრალეულობას სხვადასხვა სიტუაციებში და ავრცელებენ პესიმიზმს, მათი ნეგატიური ენერგია კი ხანძარივით ვრცელდება და ზემოქმედებს გუნდის პროდუქტიულობასა და ზოგად მორალურ მდგომარეობაზე.

2)  ნარცისისტული ტიპი: ასეთი ადამიანების სტრატეგია ყოველთვის სხვებზე გადაბრალებაა, ისინი არიან საკუთარ თავში ზედმეტად დარწმუნებულები, არასდროს იღებენ პასუხისმგებლობას და ანგარიშვალდებულად არ გრძნობენ თავს. თავიანთი ვერშესრულებული სამუშაოს გადაფარვას ახდენენ სხვისი შეცდომებისკენ თითის გაშვერით, ხშირად კოლეგების წინააღმდეგ მიმართავენ მანიპულირების მეთოდებს ან გაზლაითინგს (არწმუნებენ საპირისპიროში). ასეთი ტიპის თანამშრომლები არ არიან გუნდური მოთამაშეები.

3)  გამაღიზიანებელი ტიპები: ამ კატეგორიის თანამშრომლები კოლეგების მიმართ გამოირჩევიან მათი დამცირებით, შეურაცხყოფის მიყენებით, სხვების დადანაშაულებით. შესამჩნევია ტენდენცია, რომ ასეთი ადამიანები მიზანმიმართულად ავრცელებენ დეზინფორმაციებს, განზრახ შეჰყავთ შეცდომაში ადამიანები, მათი საქციელი ხშირად მიმართულია სპეციფიკური ინდივიდებისკენ.

კვლევების მიხედვით, ყველაზე ხშირად ტოქსიკურ თანამშრომლებს შორის ვხვდებით დამანგრეველი ტიპის ადამიანებს, შემდეგ ნარცისებს და ბოლოს გამაღიზიანებლებს. ტოქსიკური თანამშრომლის იდენტიფიცირება შესაძლოა დიდი გამოწვევა იყოს. ჩვეულებრივ, ყველაზე მარტივად ამოსაცნობები არიან დამანგრეველები. ისინი გვანან ბულერებს. მათგან განსხვავებით, შედარებით ფრთხილი და რთული ამოსაცნობია ნარცისისტული ტიპის შეფარული ბუნება.

მას შემდეგ, რაც ტოქსიკურ თანამშრომლებს დააიდენტიფიცირებთ, არსებითია სამხილის არსებობა მანამ, სანამ რაიმე აქტს განვახორციელებთ მის წინააღმდეგ. ბრძოლის ეტაპზე გადასვლამდე უნდა იყოთ დარწმუნებული, რომ გაქვთ შესაბამისი დოკუმენტები, პროცედურები და პოლიტიკები, რაც ხაზს უსვამს კომპანიის მოლოდინებს დასაქმებულების მიმართ და არეგულირებს კონკრეტულ სანქციას ან ქმედებას ტოქსიკური ქცევის აღმოსაფხვრელად. ასეთ დროს მენეჯერები თავიანთ ქმედებაში უფრო მეტად დარწმუნებულები და თავდაჯერებულები იქნებიან.

კომპანიებს აქვთ გამოცდილება, როცა თანამშრომელი სამსახურიდან სწორედ ტოქსიკური კოლეგის გამო წასულა, ტოქსიკური თანამშრომლების ქცევის იგნორირება ან ტოლერანტული დამოკიდებულება მათ მიმართ არამხოლოდ დამღუპველია სამუშაო ძალის კარგად ყოფნისთვის, არამედ კითხვის ნიშნის ქვეშ აყენებს მთლიანად ორგანიზაციის წარმატებას.

როგორც ნიადაგის ხარისხი ახდენს გავლენას მცენარის ზრდაზე, ისე თანამშრომლის ქცევა შესაძლოა იყოს დადებითი ან უარყოფითი გავლენის მომხდენი სრულიად კოლექტივზე. პროაქტიული ნაბიჯების გადადგმა ტოქსიკური ქცევის აღმოფხვრის მიზნით ხელს შეუწყობს კომპანიებს, რომ შექმნან უფრო ჯანმრთელი და პროდუქტიული სამუშაო გარემო, სადაც ყველა თანამშრომელს ექნება წარმატების მიღწევის თანაბარი შანსი.