რა ხდება უძრავი ქონების ბაზარზე - გასაყიდი ბინების ფასი იზრდება, ხოლო ქირა მცირდება

5219

11.08.2023 01:37:34

წინა წლის პირველ ნახევართან შედარებით შედარებით, 2023 წლის პირველ ნახევარში ბინების გაყიდვები 2%-ით არის შემცირებული. პირველი ექვსი თვის განმავლობაში თბილისში 20,026 ბინა გაიყიდა, რაც წინა წლის პირველ ნახევართან შედარებით 2%-ით ნაკლებია.

Colliers Georgia-ს საცხოვრებელი უძრავი ქონების ბაზრის განახლებული მიმოხილვის მიხედვით, რომელიც Recov.ge-ზეა გამოქვეყნებული, თბილისში საცხოვრებელი ბინების ბაზრის ზომა 5%-ით, 1.1 მილიარდ დოლარამდე გაიზარდა.

თბილისში მოთხოვნის ყველაზე მაღალი ზრდა პრემიუმ კლასის ბინებზეა და მასზე მოთხოვნა 44%-ით გაიზარდა. საშუალო სეგმენტში 28%-იანი ზრდაა,. ხოლო ეკონომ სეგმენტში, გაყიდვების მაჩვენებელი 15%-ით 7,890 ერთეულამდე შემცირდა.

ამავე მონაცემების მიხედვით, თბილისში ახალ აშენებულ საცხოვრებელ უძრავ ქონებაში ტრანზაქციების 0.4%-იანი კლება შეიმჩნევა. ხოლო, ძველ აშენებულ საცხოვრებელ სახლებში ეს მაჩვენებელი წინა წლის პირველ ნახევართან შედარებით 6%-ით არის შემცირებული.

უძრავი ქონების დარგის ექსპერტები, საბროკერო კომპანიების წარმომადგენლები და დეველოპერები წლის ბოლომდე გასაყიდი ბინების ფასის საშუალოდ 10%-ით ზრდას ვარაუდობენ.

BMGTV-ის გადაცემა „წერტილში“ კომპანია „არსის“ გენერალური დირექტორმა ბესო ორთოიძემ უძრავი ქონების მოთხოვნასა და ფასზე მოქმედ ფაქტორებზე ისაუბრა.
მისი პროგნოზით, წელს საცხოვრებელი უძრავი ქონება, დაახლოებით, 8-10%-ის ფარგლებში გაძვირდება, რაც „ბუნებრივი ზრდაა“.

დაახლოებით მსგავს პროგნოზს აკეთებს თიბისი კაპიტალიც. „თიბისი კაპიტალის“ პროგნოზით, 2023 წლის მეორე ნახევარში გასაყიდი უძრავი ქონების ფასი მცირედით, 1-2%-ის ფარგლებში გაიზრდება, ხოლო წლიური ზრდა საშუალოდ 15%-ის ფარგლებში იქნება. რაც შეეხება ქირას, როგორც კვლევების უფროსმა ირინა კვახაძემ გადაცემა „უძრავი ქონების პროსპექტში“ სტუმრობისას განაცხადა, ყოველთვიურად შედარებით მცირდება ქირის ფასიც, რაც შესაძლოა მიმავალ წლამდე გაგრძელდეს.

„ქირის ფასის ნაწილში ცალსახად ველოდებით, რომ შემცირდება და ეს შემცირება გაგრძელდება 2024-2025 წელს და დაუბრუნდება ამონაგების 8.5%-იან ნიშნულს. თვე-თვესთან შედარებით ჩვენ ვხედავთ, რომ ქირის ფასი უკვე შემცირებულია, რაც ასევე მოსალოდნელი იყო. გადაჭარბებით გაზრდილი იყო ფასი დროებითი მოთხოვნის გამო, ამიტომ ის აუცილებლად შემცირდებოდა და კიდევ უფრო სწრაფ შემცირებას ველოდებით შემოდგომიდან“, - ამბობს თიბისი კაპიტალის კვლევების უფროსი ირინა კვახაძე.

სხვადასხვა მონაცემებით, გასაყიდი უძრავი ქონების ფასი სტაბილურად განაგრძობს ზრდას, თუმცა აღნიშნული ნაკლებად შეეხება მეორად საცხოვრებელ უძრავ ქონებას და ძირითადად ახალ აშენებულ, განსაკუთრებით კი მაღალი და საშუალოს კლასის უძრავი ქონების ფასზე აისახება. ხოლო, გასაქირავებელი უძრავი ქონების ფასი, უკვე სწრაფი ტემპებით იკლებს და ექსპერტების მოსაზრებით, ასევე სწრაფად გააგრძელებს შემცირებას გრძელვადიან მომავალში.