რჩევები: როგორ შევინარჩუნოთ ცხელი ზაფხულის განმავლობაში სახლში სიგრილე

წლევანდელი ზაფხული განსაკუთრებული სიცხით გამოირჩევა. სპეციალისტები ადამიანებს ურჩევენ, თუ გადაუდებელი საქმე არ აქვთ, შუადღისას გარეთ არ გავიდნენ. ოფისები აღჭურვილია გამაგრილებელი სისტემებით, სახლის გაგრილება კი ინდივიდუალური საშუალებებითაა შესაძლებელი. სპეციალისტებისგან და გამოცდილებებიდან რჩევები დაგვიგროვდა, როგორ უნდა გავუმკლავდეთ სიცხეს სახლის პირობებში და შევინარჩუნოთ სიგრილე.

1.    კონდიციონერი

ალბათ, ყველაზე მარტივი გამოსავალი კონდიციონერია, გაგრილებასთან დაკავშირებითაც ყველა ჩვენგანს პირველად ეს გვახსენდება, მაგრამ კონდიციონერის შერჩევას და დამონტაჟებასაც სწორი მიდგომა სჭირდება. პირველ რიგში, უნდა იცოდეთ ზუსტად რამდენი კვადრატულია თქვენი სახლი/ბინა და ამის მიხედვით შეარჩიოთ, რა სიმძლავრის კონდიციონერი დაგჭირდებათ. გაითვალისწინეთ, რომ მნიშვნელოვანია ბინაში ოთახების განლაგებაც და შესაძლოა ერთზე მეტი კონდიციონერი დაგჭირდეთ. ასევე დიდი მნიშვნელობა აქვს, თუ სად დაამონტაჟებთ მას, რომ რაც შეიძლება მეტი ადგილის გაგრილება მოახერხოს.

2.    ვინტილატორი

ვინტილატორი შედარებით ბიუჯეტური ვარიანტია, თუმცა მისი გამოყენების ტექნიკაც სწორად უნდა შეარჩიოთ რადგან ოთახში არსებულ ჰაერს უბერავს და თუ ოთახში ცხელი ჰაერია, დიდ შვებას ვერ მოგცემთ ვინტილატორიდან დაბერილი ჰაერის ნაკადი. სახლის პირობებში, გვირჩევენ, რომ მის წინ დავდგათ ყინულიანი წყლით სავსე ჭურჭელი, ვინტილატორის ნაკადი, რომელიც ჯერ მას მოხვდება და შემდეგ მიაღწევს ოთახის დანარჩენ ნაწილებს, ბევრად უფრო გრილი იქნება.

3.    ფანჯრები ღამით გააღეთ

დღისით, განსაკუთრებით კი იმ დროს,  როცა მზის სხივები პიკს აღწევს და შუადღის სიცხე ყველაზე მწველია, დახურეთ ფანჯრები, ჩამოაფარეთ ჟალუზები ან ფარდები. სასურველია, თუ ფარდები ნატურალური ქსოვილისგან იქნება შეკერილი. მზის ჩასვლის შემდეგ კი, როდესაც ტემპერატურა შემცირდება, გააღეთ ფანჯრები და გაანიავეთ სახლი. თუ სახლის დაგეგმარება საშუალებას გაძლევთ, ორპირი მოაწყვეთ რომ შედარებით გრილმა ბუნებრივმა ჰაერის ნაკადმა იმოძრაოს.

4.    დაალაგეთ სახლი სველი წესით

ზაფხულის პერიოდში ბინიდან მოაშორეთ ისეთი ქსოვილები, რაც გარდა დეკორისა, ზამთარში სითბოს გინარჩუნებთ: ხალიჩები და ფარდაგები შეინახეთ ზამთრამდე და იატაკი სველი წესით ხშირად დაასუფთავეთ, ეს ასევე შეუწყობს ხელს სახლში სიგრილის შენარჩუნებას. გარდა იატაკის მოწმენდისა, გვირჩევენ დავასველოთ პირსახოცები და კარგად გაწურულ მდგომარეობაში დავკიდოთ სხვადასხვა ადგილზე. ასევე, შესაძლებელია ჰაერის დატენიანება წყლის გამაფრქვეველის დახმარებითაც.

5.    გამოიყენეთ ნაკლები ელექტროენერგია

ალბათ იცით, რომ ნებისმიერი ტექნიკა თუ ნათურა, რაც ელექტროენერგიის დახმარებით მუშაობს, სითბოს გამოყოფს. ეცადეთ, რომ მინიმალურად გამოიყენოთ ზაფხულის ცხელ დღეებში ელექტროენერგია, ამაში ხელს ზაფხულის გრძელი დღეებიც შეგიწყობთ და შედარებით გვიანობამდე არ დაგჭირდებათ ოთახის ხელოვნურად განათება. რაც შეეხება სამზარეულოში საჭმლის მომზადებას, სადილების მზადებისას ვერ ავუვლით გვერდს სიმხურვალეს და ორთქლს, ამიტომ ეცადეთ, რომ ძირითადად მსუბუქი საკვებით იკვებოთ, რასაც გაზქურის გამოყენება არ სჭირდება. მაგალითად მიირთვით ბევრი ცოცხალი ხილი და ბოსტნეული, ეს არამხოლოდ გაზქურის ნაკლებად გამოყენებაში დაგეხმარებათ, არამედ ორგანიზმსაც შეგივსებთ სითხით.

6.    იზრუნეთ სხეულის გაგრილებაზე

გარდა სახლის გაგრილებისა, არ დაგავიწყდეთ სხეულის ტემპერატურაზე ზრუნვა და საკუთარი თავის გაგრილება. მიიღეთ საკმარისი სითხე,რათა არ დეჰიდრირდეთ, ჩაიცვით თავისუფალი ტანსაცმელი, სასურველია ბუნებრივი ქსოვილისგან შეკერილი და ღია ფერის იყოს. გრძელი თმის შემთხვევაში ატარეთ აწეული ვარცხნილობა. მნიშვნელოვანია, რომ კისრის მიდამოები გრილად გქონდეთ. მიიღეთ გრილი შხაპი ან გრილი აბაზანა, დაიცავით სხეული გადახურებისაგან.