როგორ შევამციროთ სტრესი შვებულებამდე და შვებულების შემდეგ

შვებულებას ვგეგმავთ იმისთვის, რომ დავისვენოთ, პაუზა ავიღოთ სამსახურებრივი სტრესისგან და სამუშაო ადგილს განახლებული ენერგიებით დავუბრუნდეთ. მაგრამ ოფისიდან შვებულებაში გასვლა ავტომატურად ნიშნავს შვებულებამდე პერიოდში ექსტრა რაოდენობის სამუშაოს შესრულებას, რათა დასამთავრებელი თასქები არ დატოვოთ სამსახურში, ხოლო შვებულებიდან დაბრუნების შემდეგ, ასევე გაორმაგებულად მუშაობა გიწევთ, რადგან თქვენი არყოფნისას დაგროვილი დავალებები გხვდებათ შესასრულებელი. ამიტომ, შესაძლოა გასაკვირიც იყოს, მაგრამ სწორედ ამ მიზეზის გამო, ნიდერლანდებში ჩატარებულმა კვლევამ აჩვენა, რომ შვებულებაში მყოფები, მას შემდეგ რაც ბრუნდებიან სამსახურში, სრულებითაც არ არიან იმ თანამშრომლებზე ბედნიერები, ვისაც შვებულებით არ უსარგებლია. კვლევები ასევე აჩვენებს, რომ შვებულების პერიოდში შფოთვაც იმატებს, რადგან ადამიანები ფიქრობენ იმ აუარებელ საქმეებზე, რაც ოფისში დაბრუნებულებს დახვდებათ. ისევე, როგორც ყველაფერში, აქაც არსებობს არსებითად მნიშვნელოვანი ნაბიჯები, რაც ადამიანებს სტრესის შემცირებასა და პროდუქტიულობის გაზრდაში დაეხმარებათ შვებულებამდე, შვებულების დროს და შვებულების შემდეგ.

რა ხდება შვებულებაში გასვლამდე?

ვინაიდან შვებულების მოახლოებასთან ერთად ადამიანებში სტრესის დონე იმატებს და ჩნდება კითხვა, მოასწრებენ თუ არა ყველაფრის გაკეთებას შვებულებამდე, რათა ხარისხიანად დაისვენონ, ექსპერტები გვთავაზობენ, რომ ყოველდღიურ რუტინაში რამდენიმეწუთიანი მედიტაციის ელემენტები შევიტანოთ. მაგალითად, რაც უფრო მოახლოვდება შვებულება, მოვახდინოთ მისი ვიზუალუზაცია, როგორი იქნება ის. თუკი სრული მედიტაციისთვის არ გაქვთ შესაფერისი ადგილი, მინიმალურიც კმარა - დაჯექით სწორად, ხერხემალი გაწელეთ, ისუნთქეთ ღრმად, გამოიყენეთ ფილტვების სრული რესურსი და წარმოიდგინეთ ის პოზიტიური შეგრძნებები, რომელიც გინდათ რომ თან გდევდეთ შვებულების პერიოდში, მაგალითად სიმშვიდე.

განსაზღვრეთ პრიორიტეტები შვებულებაში გასვლამდე რამდენიმე კვირით ადრე. მაგალითად, ჩამოწერეთ სია, რისი გაკეთებაც აუცილებლად მოსასწრებია დასვენებამდე. აჩვენეთ თქვენს ხელმძღვანელს და მიიღეთ მისი უკუკავშირი, მასთან ერთად განსაზღვრეთ პრიორიტეტული ამოცანები და შეადგინეთ საბოლოო სია, შემდეგ კი დაგეგმეთ თქვენი სამუშაო დღეები თითოეული მათგანის შესასრულებლად. სხვა ნაკლებ მნიშვნელოვანი ამოცანებიც შეიძლება მიმდინარე საქმეების სახით „ამოხტეს“ თქვენს სამუშაო პროცესში, მაგრამ თუ ისინი სასიცოცხლოდ მნიშვნელოვანი არ არის, თქვენს სიაზე ფოკუსირებული დარჩით. ამ ნაწილში მნიშვნელოვანია, რომ აღნიშნული ნაბიჯები სწორედ შვებულებაში გასვლამდე რამდენიმე კვირით ადრე გადადგათ და არა უშუალოდ შვებულებამდე დარჩენილ ბოლო კვირას, რადგან ამ შემთხვევაში თქვენი სტრესი ვერ შემცირდება და ობიექტურად ვერ მოასწრებთ საქმეების გაკეთებას. მინიმუმ 2 კვირით ადრე დაიწყეთ საქმის კეთება რომ თქვენს თავს დაეხმაროთ როგორც საქმეების დასრულებაში, ისე სტრესის შემცირებაშიც.

მიაწოდეთ ინფორმაცია თქვენს ხელმძღვანელს, კოლეგებს და არსებობის შემთხვევაში კლიენტებს თქვენი შვებულების პერიოდის შესახებ. როდიდან როდემდე არ იქნებით ხელმისაწვდომი სამუშაო პროცესებისთვის, ეს მათაც დაეხმარება, რომ თუკი რაიმე გადაუდებელი საქმე აქვთ შვებულებაში გასვლამდე შეგატყობინონ და არ შეგაწუხონ შვებულებაში ყოფნის დროს. ასევე, განსაზღვრეთ ადამიანი, რომელზეც თქვენი ამოცანები იქნება თქვენი არყოფნის პერიოდში დელეგირებული და პოტენციურ კლიენტებს მასთან გადაამისამართებთ.

როგორ მოვიქცეთ შვებულებაში ყოფნის დროს?

შვებულებაში ყოფნა არის რეალური შანსი, რომ თქვენი ენერგია „დაარესტარტოთ“. ბევრი ადამიანი სამუშაო ადგილზე მიზნებზე ორიენტირებულია, შეეცადეთ რომ ეს უნარი შვებულებაში ყოფნის დროსაც გამოიყენოთ და ორიენტირდით ხარისხიან დასვენებაზე, რომელიც მოგიტანთ სიმშვიდის, ახალი ენერგიის და სიამოვნების გრძნობებს.

გამორთეთ მოწყობილობები  და დატოვეთ სამსახური უკან. ტექნოლოგიებთან ლიმიტირებული წვდომა დაგეხმარებათ, რომ ნამდვილად შეიგრძნოთ დასვენება და დააფასოთ თავისუფალი დრო. ჩაიძირეთ ბუნების ხმებში, ისეირნეთ ფეხით, შეისუნთქეთ სუფთა ჰაერი და დააფასეთ ის დრო გარეთ, რომელსაც ჩვეულებრივ, ოფისში კომპიუტერთან ატარებთ ხოლმე. გაატარეთ მეტი დრო ოჯახის წევრებთან და ახლობელ ადამიანებთან.

შვებულებიდან დაბრუნების შემდეგ...

თუკი შვებულებაში გასვლამდე ყველაფერი რიგზე დატოვეთ, შვებულებაში ყოფნის პერიოდში კი მაქსიმალურად შეიგრძენით „აქ და ახლა“ მომენტები, მაშინ გარანტირებული გაქვთ, რომ სამუშაო ადგილს ნაკლებად სტრესული განწყობით დაუბრუნდებით. თუმცა იმ შემთხვევებისთვისაც არსებობს გამოსავალი, თუკი შვებულება ისე ვერ გაატარეთ როგორც დაგეგმილი გქონდათ, მოლოდინები არ გაგიმართლდათ, სამსახურებრივ საქმეებზეც ხშირად გაწუხებდნენ და იმაზე რამდენჯერმე მეტი დაგხვდათ გასაკეთებელი, ვიდრე დატოვეთ:

არ ხართ ვალდებული, რომ სამუშაოს ოფისში ფეხის შედგმისთანავე დაუბრუნდეთ, მომენტალურად ჩაერთოთ დავალებების შესრულებაში ან სცადოთ რომ გაუმკლავდეთ პრობლემებს. პირველი ნახევარი საათი ან 1 საათი დაუთმეთ პრიორიტეტების განსაზღვრას, გამოელაპარაკეთ კოლეგებს და ამის დახმარებით დაეწიეთ მოვლენებს, რაც თქვენს არყოფნაში ხდებოდა, განიხილეთ საკითხები, რაშიც თქვენი დაუყოვნებლივ ჩართულობაა საჭირო. მადლობა გადაუხადეთ იმ კოლეგებს, რომლებიც თქვენს საქმიანობას ითავსებდნენ და თქვენი დახმარებაც შესთავაზეთ სანაცვლოდ.

მას შემდეგ, რაც „ჩაეშვებით“ სამუშაოში, არ დაივიწყოთ საკუთარი თავიც, პერიოდულად ისევ მიმართეთ მედიტაციის ელემენტებს და დასვენებსი ფორმად გამოიყენეთ თქვენი შვებულებაში ყოფნის საუკეთესო მომენტების გახსენება, ეს დაგეხმარებათ სასიამოვნო შეგრძნებების დაბრუნებაში და აწმყოშიც მეტი მოტივაციითა და ნაკლები სტრესით  გაგაგრძელებინებთ საქმის კეთებას. თქვენს თავს შეახსენებთ, რომ თქვენი „ელემენტები დატენილია“ და აუცილებლად შეძლებთ, რომ გაუმკლავდეთ მოცემულ დავალებებს.

დასვენება აუცილებლად სჭრდება ყველა ადამიანს. ისინი გამოიმუშავებენ შვებულებას, ამისთვის კი დამატებითი სტრესი სულაც არაა საჭირო. აუცილებლად ნაბიჯ-ნაბიჯ მიყევით სტრესის შემცირების მეთოდებს შვებულებაში გასვლამდე, მისი დაგეგმვის წუთიდან და აუცილებლად მიიღებთ ნამდვილი დასვენებისგან მოიჭებულ ბენეფიტებს.