რა გავლენას ახდენს ურბანული ინფრასტრუქტურის ცვლილებები საცხოვრებლის ფასებზე?

საცხოვრებელი ადგილის შერჩევისას რომ დიდი მნიშვნელობა აქვს მის ლოკაციას და გარშემო სტრატეგიული ობიექტების არსებობას, არაერთხელ აღგვინიშნავს ჩვენს სტატიებში. დროა, ინფრასტრუქტურულ ნაწილზეც გავამახვილოთ ყურადღება. თბილისი განაშენიანების პირობებში საკმაოდ გაიზარდა და მჭიდროდ დასახლებულ ქალაქად იქცა. გარდა კორპუსების მშენებლობისა, მნიშვნელოვანი ასპექტია მის ირგვლივ არსებული ინფრასტრუქტურა. მაგალითისთვის, თუკი ავიღებთ საცხოვრებელ კომპლექსებს, რომელსაც თავისი დამატებითი მულტიფუნქციური სერვისები აქვს უზრუნველყოფილი და შევადარებთ ძველ აშენებულ კორპუსში, თუმცა შესაძლოა უფრო პრესტიჟულ უბანში არსებულ ბინებს, ვნახავთ, რომ მათი ფასი განსხვავდება ერთმანეთისგან და პირველი მათგანი უფრო ძვირი ღირს. მხოლოდ უბანმა შეიძლება ხშირად ვერ გადაწონოს ის უპირატესობები, რაც ინფრასტრუქტურის ნაწილს მოაქვს.

საცხოვრებელი სახლების სიახლოვეს მნიშვნელოვანია, რომ არსებობდეს და გამართულად მუშაობდეს სანიაღვრე სისტემა, რათა უხვი ნალექის დროს არ გამოიწვიოს გადაადგილების პრობლემები ან/და კორპუსის დატბორვის საშიშროება არ დადგეს. როდესაც საცხოვრებლად მცირეწლოვანი ბავშვებიანი ოჯახი გადადის, მათთვის ასევე პრიორიტეტს წარმოადგენს ეზოს განათება და სახლთან ახლოს მდებარე კეთილმოწყობილი სკვერი, სტადიონი თუ სათამაშო მოედანი ბავშვებისთვის. ქუჩის განათება იმდენად მნიშვნელოვანია, რამდენადაც ის უკავშირდება უსაფრთხოების შეგრძნებას. გარდა იმისა, რომ ფიზიკური ზიანის რისკი იზრდება საღამოს საათებში, რაც როგორც ბავშვის, ისე ზრდასრული ადამიანის შემთხვევაში შეიძლება მოხდეს, ასევე დაცულობის შეგრძნება მოაქვს, რომ მაგალითად სინათლის დახმარებით უფრო თავდაჯერებულად შეძლებთ გადაადგილებას და გარშემო არეალის გაკონტროლებას, ბავშებიც ეზოში გვიანობამდე თამაშის შემთხვევაშიც შეიძლება მარტივად გყავდეთ მხედველობის არეში აივნიდან თუ ფანჯრიდან.

კეთილმოწყობილი სკვერებისა და რეკრეაციული ზონების არსებობა საცხოვრებელ სახლთან ახლოს ასევე დიდი პლუსია, რადგან ჰაერის დაბინძურების პირობებში შესაძლებლობა გექნებათ, რომ თქვენი ბინის ირგვლივ მაინც შეინარჩუნოთ ჟანგბადი და გამწვანება.

ასევე, მნიშვნელოვანია სახლთან ახლოს საზოგადოებრივი ტრანსპორტის გაჩერების ქონა, რათა თუნდაც ცუდ ამინდში დიდი მანძილის გავლა არ მოგიწიოთ გაჩერებიდან სახლამდე ან/და პირიქით. ასევე, აუცილებელია შუქნიშნისა და ზებრა გადასასვლელის არსებობა ისევ და ისევ უსაფრთხოებიდან გამომდინარე.

სისუფთავის შესანარჩუნებლად ნაგვის ურნების გონივრულ მანძილზე ქონაც ერთერთი პლუსია კორპუსებისთვის, თუმცა ისიც გასათვალისწინებელია, რომ ურნების დაცლა შესაბამისი სამსახურების მიერ დროულად უნდა ხდებოდეს რათა ანტისანიტარია არ გამოიწვიოს.

კორპუსის ბინების ფასზე გავლენას არამხოლოდ შიდა რემონტის ვიზუალი და ხარისხი ახდენს. სანამ მყიდველი შიგნით შევა, გარეთა ნაწილს უყურებს და შესაბამისად, უკვე უყალიბდება წარმოდგენა. სწორედ ამიტომ მნიშვნელოვანია, რომ ეზოში დაგებული იყოს ასფალტი, ფასადი იყოს მოპირკეთებული და ვიდრე ბინაში შეხვალთ, კორპუსთან მიახლოებისთანავე შეგეძლოთ თქვენი ქონებით თავის მოწონება.