მდგომარეობა საშუალო განათლების ბაზარზე: განვითარების რა ეტაპებს გადიან მასწავლებლები

დღესდღეობით, იმისთვის, რომ მასწავლებელი გახდე და სკოლაში ამ პროფესიით დაიწყო მუშაობა, სპეციალურად შექმნილი მასწავლებლის მომზადების 60 კრედიტიანი პროგრამა დაგეხმარება. აღნიშნული პროგრამის მეშვეობით, იმ ადამიანებს, რომლებსაც უმაღლესი განათლება არ აქვთ მიღებული პედაგოგიკაში, თუმცა ფლობენ კონკრეტულ ცოდნას ამა თუ იმ დისციპლინაში, მოსწონთ ბავშვებთან ურთიერთობა და თავიანთ ცოდნას მათ სიამოვნებით გაუზიარებდნენ, შესაძლებლობა ეძლევათ, რომ სკოლაში დასაქმდნენ.

მასწავლებლად მუშაობა და ზოგადად პროფესია მასწავლებლობა, ის შემთხვევაა, როცა საქმე უფრო პრიორიტეტული უნდა იყოს, ვიდრე მისგან მისაღები მატერიალური სარგებელი, ვინაიდან მასწავლებლებს აქვთ შეხება ყველაზე მნიშვნელოვანთან - ბავშვის განვითარებასთან.

მასწავლებლებისთვის რა უნარებია საჭირო, ამას ჩვენს წინა სტატიაში წაიკითხავთ, ხოლო იმისთვის, რომ გაიგოთ, თუ რა ეტაპები უნდა გაიაროთ მასწავლებლად მუშაობის დასაწყებად, ეს სტატია მოგიმზადეთ. მასწავლებლის მომზადებისსაგანმანათლებლო პროგრამა პირს ანიჭებს უფლებას, რომ მასწავლებლად დასაქმდეს, მაგალითად, აკადემიური ხარისხის მქონე პირი თუ ხართ ეროვნული სასწავლო გეგმის შესაბამის საგანში ან საგნობრივ ჯგუფში, იმისთვის, რომ მოიპოვოთ მასწავლებლობის უფლებამოსილება, ზემოთ აღნიშნული პროგრამის გავლა დაგჭირდებათ. ამ პროგრამის გავლის შემდეგ კი მოგენიჭებათ უფროსი მასწავლებლის სტატუსი. პროგრამის დასრულების შემდგომ გაიცემა შესაბამისი სერთიფიკატიც. პროგრამის ხანგრძლივობა ერთ სასწავლო წელს შეადგენს და 60 კრედიტი გროვდება. ის ფინანსდება სახელმწიფო სასწავლო გრანტით.

გარდა 60 კრედიტიანი პროგრამისა, მასწავლებლად მუშაობას ასევე შეძლებთ დოქტორის ხარისხის მოპოვების შედეგად, ამ შემთხვევაშიც, თქვენი სტატუსი უფროსი მასწავლებლით განისაზღვრება. ასევე, არსებობს მასწავლებლის მომზადების ინტეგრირებული პროგრამა, რომელსაც ჯამურად 300 კრედიტი აქვს და განათლების მაგისტრის აკადემიურ ხარისხს ანიჭებს კურსდამთავრებულს.

როგორც ზემოთ აღვნიშნეთ, უფროსი მასწავლებლის სტატუსის მიღება შესაძლებელია სპეციალური გამოცდის ჩაბარების შედეგად. ამას გარდა, არსებობს წამყვანი და მენტორი მასწავლებლების სტატუსებიც, სწორედ ამ სტატუსების მიხედვითაა დაჯგუფებული მასწავლებელთა კვალიფიკაცია და ბაზარზე კონკურენციის ერთერთი განმსაზღვრელი კომპონენტიც სტატუსია. წამყვანი მასწავლებლის სტატუსის მისაღებად, მასწავლებელი ვალდებულია რომ ჩაბარებული ჰქონდეს უფროსი მასწავლებლის სტატუსის მისანიჭებელი საგნის გამოცდა, საგნობრივი კომპეტენცია დადასტურებული ჰქონდეს მინიმუმ 50%-იანი შედეგით ან უფროსი მასწავლებლის სტატუსი თავის დროზე მინიჭებული ჰქონდეს დოქტორის აკადემიური ხარისხის საფუძველზე. ამას გარდა, მან უნდა გაიაროს კომპლექსური შეფასება, რაც გულისხმობს წამყვანი მასწავლებლის შესაბამისი პროფესიული უნარების გამოცდის ჩაბარებას, მასწავლებლის პრაქტიკული საქმიანობის შეფასებას, რაშიც შედის გაკვეთილის შემდგომი რეფლექსია, პორტფოლიოს შეფასება და სასკოლო საზოგადოების ინტერვიუირება, რაც მიმართულია მასწავლებლის პროფესიული სტანდარტით გათვალისწინებული ვალდებულებების ხარისხის შესამოწმებლად.

შემდეგი ეტაპია მენტორი მასწავლებლის სტატუსის მოპოვება, რომლის შემთხვევაშიც სავალდებულოა წამყვანი მასწავლებლის მსგავსად საგნობრივი კომპეტენციების გამოცდის შედეგი არანაკლებ 50%-ისა იყოს, ხოლო რაც შეეხება კომპლექსურ შეფასებას, ის მოიცავს მენტორი მასწავლებლის სტატუსის შესაბამისი პროფესიული უნარების გამოცდის ჩაბარებას, ასევე შესაბამის რეფლექსიასა და ინტერვიუირების პროცესსა და პორტფოლიოს შეფასებას.

რაც შეეხება სტატუსებს შორის უშუალო განსხვავებებს, უფროსი მასწავლებელი აკმაყოფილებს პრაქტიკოსის კომპეტენციებს და აქვს სერტიფიკატით დადასტურებული საგნობრივ-მეთოდური კომპეტენციებიც, წამყვან მასწავლებელს პრაქტიკული კვლევების საფუძველზე აქვს შესაძლებლობა, რომ შეიმუშაოს საგნის სწავლების სტრატეგიები და ეფექტური გზები გაუზიაროს კოლეგებს. მენტორი მასწავლებელი  კი გარდა იმისა, რომ ზემოთ ჩამოთვლილ ყველა კომპეტენციას აკმაყოფილებს, მას აქვს შესაძლებლობა და ფუნქცია, რომ შეიმუშაოს რეკომენდაციები სწავლა-სწავლების ხარისხის გასაუმჯობესებლად, კონსულტაციები გაუწიოს სხვა მასწავლებლებს საჭიროების შემთხვევაში.

ყოველწლიურად იზრდება სერთიფიცირებულ მასწავლებელთა რიცხვი, რაც ერთი მხრივ იმას ადასტურებს, რომ არსებული მასწავლებლები გადიან გადამზადებებს, ვითარდებიან და ერგებიან თანამედროვე მოთხოვნებს და გარდა ამისა, ბაზარზე ჩნდებიან ახალბედა მასწავლებლებიც, რომლებიც თავიანთ ცოდნას და კომპეტენციებს პედაგოგის ამპლუაში აზიარებენ.