როგორ გავხდეთ კონკურენტუნარიანი: ტრენინგების მნიშვნელობა დასაქმებულებისთვის

დასაქმებული ადამიანისთვის მუდმივი თვითგანვითარება ძალიან მნიშვნელოვანია. არის ხოლმე შემთხვევები, როდესაც სამუშაო ადგილზე სტაბილურად გრძნობენ თავს და ისე ეჩვევიან რუტინას, რომ ყოველდღიური საქმიანობის გარდა აღარ ფიქრობენ სიახლეებზე. ასრულებენ ყოველდღიურ დავალებებს, შესაძლოა კარგი შემსრულებლებიც კი არიან, მაგრამ პრეტენზია და ჯანსაღი ამბიცია არ უჩნდებათ, რომ წინ წაიწიონ, ახალი ისწავლონ და საქმე გაიმრავალფეროვნონ.

მნიშვნელოვანია, რომ სწორად დაინახონ დასაქმებულებმა, რომ ახალი საქმეების სწავლა შესასრულებელი საქმის მოცულობის გაზრდის პროპორციული არ არის. ხშირად ეშინიათ ხოლმე, რომ თუკი კითხვებს დასვამენ განსხვავებულ პროცედურებთან დაკავშირებით, შესაძლოა დავალებები მოუმატონ და სამუშაო ადგილზე გადაიტვირთონ. თუ ეს ასეა, პირველი ნიშანია, რომ არაჯანსაღ სამუშაო გარემოში იმყოფებით და უნდა გაეცალოთ იქაურობას. კითხვების დასმა, სხვადასხვა საქმეებით დაინტერესება არ ნიშნავს საქმის ავტომატურ ზრდას, პირიქით, პროცესის უფრო ფართოდ გაცნობას და თქვენი ამოცანების უფრო მარტივად გადაჭრისა და შესრულების გზის აღმოჩენას ნიშნავს. რაც უფრო მეტ ალტერნატივას ეცნობით, იზრდება თქვენი ცოდნა, იღებთ ახალ გამოცდილებას და სწავლობთ წლების მანძილზე ნაცადი მეთოდების ახალი მეთოდებით ჩანაცვლებას.

სტაბილურობის განცდა და სიმშვიდე სამუშაო ადგილზე, რა თქმა უნდა, კარგია, თუმცა არ უნდა დაგვავიწყდეს, რომ პროფესიული განვითარებით მუდმივად შევინარჩუნებთ კონკურენტუნარიანობას და ე.წ. „მოთხოვნადი კანდიდატები“ ვიქნებით სხვადასხვა დამსაქმებლებისთვის. განვითარებაზე ზრუნვა კი უწყვეტი პროცესია და მუდმივად ახლის ძიებას მოიაზრებს. ეს შესაძლებელია ორგვარად - სხვების გამოცდილების გაზიარებითა და ბევრი ინფორმაციის წაკითხვით და ასევე - შესაბამისი ტრენინგების მოძიებით და მათზე დასწრებით. ნუ იფიქრებთ, რომ ტრენინგების გავლა და მათი მეშვეობით ცოდნის შეძენა მხოლოდ დამწყებების საქმეა. შესაფერისი ტრენინგების გავლით, არსებული კვალიფიკაციის ამაღლება, ცოდნის გაღრმავება და ირიბი სარგებლით - ახალი კონტაქტების შეძენაც არის შესაძლებელი.

ტრენინგების გასავლელად დღესდღეობით, ძალიან ბევრი პლატფორმაა ხელმისაწვდომი და დროის თვალსაზრისით, საკმაოდ მარტივად შეგიძლიათ შეუთავსოთ თქვენს სამუშაო განრიგს ცოდნის და კვალიფიკაციის ამაღლების პროცესი. ბევრ კომპანიაში, როგორც ბენეფიტი, ისეა წარმოდგენილი მაგალითად გარკვეული წვდომები სხვადასხვა ფასიან ტრენინგ-პლატფორმებზე, ზოგიერთ ორგანიზაციაში კი ღიაობაა მენეჯმენტის მხრიდან, სასურველი ტრენინგის დაფინანსებაზე ან თანადაფინანსებაზე თანამშრომლის განვითარებისთვის.

იმისთვის, რომ მუდმივად იყოთ ინფორმირებული ტრენინგების შესახებ და იპოვოთ თქვენთვის სასურველი მათგანი, თვალი ადევნეთ ss.ge-ს ტრენინგების განყოფილებას, სადაც მუდმივად განახლებადია ინფორმაცია.