სტარტაპში მუშაობა VS დიდი კომპანია: როგორ ავირჩიოთ სწორი გარემო

სამუშაო გარემოს არჩევისას რთულია ცალსახად განსაზღვრო სწორი და არასწორი, რადგან გვინდა თუ არა, ეს შეფასება შესაძლოა მაინც სუბიექტური აღმოჩნდეს და ასევე, სხვადასხვა დროს ერთმანეთისგან განსხვავებული იყოს. ამა თუ იმ გარემოში სამუშაოდ, სწორი დრო უნდა შევარჩიოთ - ალბათ, ეს უფრო მართებული მიდგომა იქნებოდა, რადგან როგორი შედეგითაც არ უნდა დასრულდეს ჩვენი თანამშრომლობა ნებისმიერ ორგანიზაციასთან - ეს იქნება დიდი კორპორაცია თუ სტარტაპი - მაინც გამოცდილება გვემატება და უფრო მეტი ცოდნით ვაგრძელებთ კარიერულ გზას.

სტარტაპები ბოლო პერიოდში საკმაოდ პოპულარული მიმართულება გახდა და ადამიანები თავიანთი იდეების ფართო საზოგადოებისთვის გაცნობას, ბიზნესად ქცევას და საქმიანობის წამოწყებას არ უშინდებიან, რისკავენ და შეცდომებზეც სწავლობენ, სხვების გამოცდილებაზეც და საკუთარზეც. „სწავლა კეთებით“ (Learning by Doing) მიდგომა საკმაოდ პრაქტიკულია გამოცდილების სწრაფად გასაზრდელად და ჩარჩოების მიღმა სხარტი ფიქრისთვის. ახალი წამოწყებები პატარა იდეიდან მზარდი მოგებისკენ გადადგმული ნაბიჯებით აგრძელებენ გზას, ავითარებენ მრავალ მიმართულებას: კომუნიკაციას, მარკეტინგს, ქოფირაითინგს, სოციალური მედიის მართვას, ბიზნესს. დიდ კომპანიებში კი ეს ყველაფერი უკვე გამოცდილი ადამიანებით დაკომპლექტებული გუნდების ხელშია და ტრადიციული მიდგომებით იმართება. მოკლედ რომ ვთქვათ, თავისი წილი გამოცდილების მოცემა ორივე მათგანს შეუძლია თქვენთვის, მთავარია რას ეძებთ თქვენ.

როცა სტარტაპში მუშაობ...

სტარტაპებში, როგორც წესი, აღნიშნვადაც არ ღირს, დიდ კომპანიებთან შედარებით რამდენად ცოტა ადამიანი მუშაობს. გააჩნია საქმიანობის სფეროს, არსებობს ორკაციანი სტარტაპებიც და 10 ადამიანისგან შემდგარი გუნდებიც. ასეა თუ ისე, ასობით თანამშრომლამდე თუ ადის რაოდენობა, ეს უკვე სტარტაპი აღარაა, წარმატებული შემდგარი კომპანია ყალიბდება, რომელმაც სტარტაპის სახელით დაიწყო. შესაბამისად, რაც უფრო ცოტა წევრია გუნდში, მით მეტი საქმის კეთება მოგიწევთ, რაც ერთი მხრივ შეიძლება დამღლელად მოგეჩვენოთ და ამავდროულად, უნდა გაითვალისწინოთ ისიც, რომ ანაზღაურების მოლოდინი დიდი არ უნდა გქონდეთ და სტაბილურობის განცდაც ნაკლებსავარაუდოა, თუმცა თუ მეორე მხრივ შეხედავთ, ასეთ გარემოში შეძლებთ ელვის სისწრაფით აითვისოთ იმდენად ბევრი რამ, რასაც დიდი კომპანიის შემთხვევაში ბევრი წლის მანძილზე მოუნდებოდით. შესაბამისად, თქვენი განვითარებისთვის, ახალი უნარების შეძენისა და გარკვეულწილად პიროვნულად ჩამოყალიბებისთვის, სტარტაპი შესაძლოა საუკეთესო ადგილი იყოს.

რა თქმა უნდა, როგორც ყველაფერს, სტარტაპში მუშაობასაც აქვს საკუთარი რისკები და უარყოფითი მხარე.  ვინაიდან საწყისი იდეაა და არც ისე მყარი ფინანსური საყრდენი აქვს,  შესაძლოა ყველაფერი გეგმის მიხედვით ვერ წავიდეს და მარცხი განიცადოს. სტარტაპთან თანამშრომლობის დადებითი და უარყოფითი მხარეები ჩვენს წინა ბლოგში შეგიძლიათ უფრო დეტალურად წაიკითხოთ.

როცა დიდი კომპანიის თანამშრომელი ხარ...

დიდ და სტაბილურ ორგანიზაციასთან თანამშრომლობასაც აქვს ასევე თავისი დადებითი და უარყოფითი მხარეები. თუკი კომპანია ბაზარზე დადებითი რეპუტაციითა და ცნობადობით გამოირჩევა, თქვენი რეზიუმესთვის და კარიერული გამოცდილებისთვის მათი ორგანიზაციული კულტურისა და გარემოს ნაწილად ყოფნა საკმაოდ წაგადგებათ. დიდ ორგანიზაციებს ნაკლებად აქვთ სტარტაპების მსგავსი შეცდომებისგან გამოწვეული მარცხის ალბათობები, რადგან მათ უკვე გაიარეს ეს ეტაპი, ბევრჯერ დატესტეს შესაძლო მარცხი, რისკი და ყოველი ახალი პროექტის სარგებელი და მიმდინარედ სტაბილურად იკავებენ პოზიციებს. დიდ კორპორაციებში შეგიძლიათ მიიღოთ ფორმალურ გარემოში მუშაობის გამოცდილება, ისწავლოთ უკუკავშირის კულტურა, კომპანიის პროცედურების, პოლიტიკების, შინაგანაწესისა და ორგანიზაციული კულტურის მნიშვნელობა და არსი. შეეჭიდოთ დიდ და მრავალფეროვან ამოცანებს და მიიღოთ უდიდესი გამოცდილება ძველი თუ ახალი თანამშრომლებისგან, ასევე თქვენივე საქმისგან.

რაც შეეხება მის უარყოფით მხარეს, სტარტაპისგან განსხვავებით დიდ კომპანიებში ყველას საქმე მკაფიოდ გამიჯნულია ერთმანეთისაგან. მიუხედავად იმისა, რომ შეიძლება ბევრი საქმე გქონდეთ, ის აუცილებლად ერთი საკითხის ირგვლივ იქნება, გექნებათ განსაზღვრული პოზიცია და შესაბამისად თქვენი სამუშაო აღწერილობა, სტარტაპისგან განსხვავებით ღიად ვერ ჩაერევით და ვერ შეიჭრებით სხვა პოზიციის როლებში და შესაბამისად შედარებით უფრო გაგიჭირდებათ რამდენიმე მიმართულებით გამოცდილების ერთდროულად დაგროვება, თუკი მიმართულების შეცვლას გადაწყვეტთ, ესეც პროცედურების დაცვით უნდა მოხდეს და ეტაპობრივად. ამისთვის კი გაცილებით მეტი დრო დაგჭირდებათ დიდ ორგანიზაციაში, ვიდრე სტარტაპში.

გარდა საქმისა და გამოცდილებისა, მნიშვნელოვანი ასპექტია ფინანსური სარგებელი - ხელფასიც. გაწეული შრომის საფასური შესაძლოა არც დიდ კომპანიაში იყოს შრომის პროპორციული, თუმცა გაცილებით უფრო სტაბილურია, ვიდრე სტარტაპში, რადგან ამ უკანასკნელში დიდი რესურსის ჩადება თავიდანვე თქვენ გიწევთ, რაშიც როგორც ინტელექტუალური, ფიზიკური და დროის რესურსი იგულისხმება, ასევე - ფინანსურიც. მოგებაზე სანამ გახვალთ, იქამდე შესაძლოა ფინანსური ზარალის წინაშეც კი აღმოჩნდეთ რაღაც პერიოდი და ენთუზიაზმზე იდეის ერთგულად მოგიწიოთ მუშაობა. ამიტომ გასათვალისწინებელია ახლა და ამჟამად რა არის თქვენი სურვილი,  თქვენი წამყვანი მოტივაცია და მოლოდინი. სწორედ ამის შემდეგ გააკეთებთ სწორ არჩევანს თუ სად არის თქვენი ადგილი - დიდ ორგანიზაციაში თუ სტარტაპში.