როგორ იცვლებოდა საშუალო ხელფასი საქართველოში ბოლო 5 წლის განმავლობაში

1336

31.05.2024 15:37:46

საშუალო ხელფასი მნიშვნელოვან ინდიკატორს წარმოადგენს, რომელიც ერთი მხრივ, ქვეყანაში დასაქმებულთა შემოსავლების ზოგად სურათზე წარმოდგენას გვიქმნის, მეორე მხრივ კი, სხვა ქვეყნებთან ამ მაჩვენებლით შედარების საშუალებას იძლევა. საქართველოში საშუალო ნომინალურ ხელფასს და ზოგადად, დასაქმება—უმუშევრობასთან დაკავშირებულ მონაცემებს საქსტატი ითვლის. სტატისტიკის მიხედვით, ბოლო 5 წლის განმავლობაში საქართველოში საშუალო ნომინალური ხელფასი ეროვნულ ვალუტაში ზრდადი იყო. ამასთანავე, ანაზღაურების მიხედვით ცვლილებები შეეხო სხვადასხვა საქმიანობის სახეებსაც და ბოლო წლებში რამდენიმე მაღალანაზღაურებადი სფერო გამოიკვეთა. გარდა ამისა, შეიცვალა საშუალო ხელფასის გადანაწილება რეგიონების მიხედვითაც.

საშუალო თვიური ნომინალური ხელფასის ცვლილება ბოლო წლების განმავლობაში

საქსტატის მონაცემებით, ბოლო 5 წელში საშუალო თვიური ნომინალური ხელფასი 81%-ით გაიზარდა. გრაფიკზე ხელფასის რაოდენობა ლარებში არის დათვლილი, 2023 წლის მონაცემებს კი 4 კვარტლის მიხედვით ხედავთ.

საშუალო თვიური ნომინალური ხელფასი საქმიანობის სახეების მიხედვით

2019 წელს საშუალო ხელფასის მიხედვით, ყველაზე მაღალანაზღაურებადი სფერო საფინანსო და სადაზღვევო საქმიანობები იყო, რომელმაც 2023 წელს მე-2 ადგილზე გადაინაცვლა. ინფორმაციისა და კომუნიკაციების მიმართულებით 2019 წელს 1621 ლარი იყო საშუალო ხელფასი, რომელიც 2023 წლის ჩათვლით 265%-ით გაიზარდა, დღეს კი ეს დარგი საქართველოში ყველაზე მაღალანაზღაურებადია. 2023 წლის მონაცემებით მაღალი ხელფასები შემდეგ დარგებში დაფიქსირდა:

ინფორმაცია და კომუნიკაცია — 4 309.2 ლარი (წინა წლის შესაბამის პერიოდთან შედარებით გაიზარდა 17.3%-ით);
საფინანსო და სადაზღვევო საქმიანობები — 3 110.0 ლარი (გაიზარდა 14.1%-ით);
მშენებლობა — 3 062.5 ლარი (გაიზარდა 20.8%-ით);
პროფესიული, სამეცნიერო და ტექნიკური საქმიანობები — 2 920.5 ლარი (გაიზარდა 19%-ით).

საშუალო თვიური ხელფასი სქესის მიხედვით

მართალია, ბოლო 5 წლის განმავლობაში სქესის მიხედვით ქალის და კაცის ხელფასთა სხვაობა რაოდენობრივად შეიცვალა, თუმცა პროცენტული სხვაობა მცირედითაა შეცვლილი. 2019 წლის I კვარტალში ქალების საშუალო ხელფასი კაცებისაზე 365 ლარით ნაკლები იყო (32%-ით ნაკლები), 2023 წლის IV კვარტალში კი სხვაობამ 856,5 ლარი შეადგინა (დაახლოებით 35%-ით ნაკლები).

საშუალო თვიური ნომინალური ხელფასი რეგიონების მიხედვით

2019 წლის მონაცემებით, საშუალო ნომინალური ხელფასი ყველაზე მაღალი თბილისში იყო. ბოლო 5 წლის სტატისტიკის მიხედვით, ვითარება ამ მხრივ არ შეცვლილა. 2019 წელთან შედარებით თბილისში საშუალო ნომინალური ხელფასი დაახლოებით 211%-ით გაიზარდა და 2023 წლის IV კვარტალში 2392,9 ლარი შეადგინა.

2019 წელთან შედარებით, საშუალო ნომინალური ხელფასის განაწილების მხრივ ცვლილებაა რეგიონების მიხედვით მე-2 და მე-3 ადგილს შორის. 2019 წელს აჭარა საშუალო ხელფასით 952,9 ლარი მე-2 ადგილზე იყო, 2023 წლის IV კვარტლის სტატისტიკის მიხედვით კი, მე-2 ადგილი მცხეთა-მთიანეთმა 1828,2 ლარით დაიკავა. აღნიშნული რეგიონში ბოლო 4 წლის მონაცემებით საშუალო ნომინალური ხელფასი აჭარაზე მეტი იყო.