3 რამ, რაც ინტერიერის დიზაინში უნდა გავითვალისწინოთ - რჩევები პროფესიონალებისგან

ინტერიერის დიზაინი ფუნქციური სივრცის შექმნაში გადამწყვეტ როლ ასრულებს. დიზაინერების კომპლექსური ცოდნა არქიტექტურაში, სივრცით მოწყობაში, სამშენებლო და მოსაპირკეთებელ მასალებში, ფერთა გრადაციებსა თუ სხვა მიმართულებებში გვეხმარება, ჩვენს საჭიროებებზე მორგებული, კომფორტული გარემო შევქმნათ, სწორად ავითვისოთ სახლისა თუ ოფისის თითოეული კვადრატული მეტრი და თავიდან ავიცილოთ დროისა და ფინანსური რესურსების დამატებით ხარჯვა.

დიზაინერები თავდაპირველად ეცნობიან სივრცეს, დეტალურად ისმენენ ჩვენი სურვილებისა და საჭიროებების შესახებ და 3D ვიზუალიზაციის მეშვეობით წინასწარ გვიჩვენებენ, როგორი შეიძლება იყოს ინტერიერი სამუშაოების საბოლოოდ დასრულების შემდეგ. აღნიშნული პროცესი გვეხმარება, სწორად დავაგეგმაროთ სახლი, ეფექტურად გავანაწილოთ ჩვენი ბიუჯეტი და რემონტის დროს არ მოგვიხდეს ცვლილებების შეტანა და ხარჯების ზრდა. 

კომპანია „სამკუთხედის“ დიზაინერები დეტალურად განგვიმარტავენ, რას ითვალისწინებენ ისინი სივრცის დაგეგმარებისას და რა ნიუანსები უნდა ვიცოდეთ, სანამ რემონტსა და საყოფაცხოვრებო ნივთების განახლებას დავიწყებთ.

მათი განმარტებით, სივრცის დაგეგმარების პროცესში ყველაზე პრობლემურია ხელოსნებთან კომუნიკაცია, რადგან როგორც წესი, ისინი ზედმიწევნით არ ითვალისწინებენ ხოლმე ჩვენს მოთხოვნებს. აღნიშნული პრობლემის გადაჭრის გზა კი  წინასწარი გეგმაა ნახაზების სახით, რომელსაც ხელოსნები მიჰყვებიან და შეცდომის დაშვების ალბათობაც მინიმუმამდე მცირდება. 

„სწორედ ამიტომ, ხელოსნებისა და ავეჯის ძებნამდე მუშაობა უნდა დავიწყოთ ინტერიერის დიზაინერთან, რომელიც ჩვენი სურვილების გათვალისწინებით შექმნის ნახაზს და უფრო გაამარტივებს რემონტის პროცესს. გარდა ამისა, არსებობს სტანდარტები, რომელიც სხვადასხვა ტიპის სივრცის მოწყობისას აუცილებლად უნდა დავიცვათ და რასაც სპეციფიკური ცოდნა სჭირდება. ნახაზებიც სწორედ აღნიშნული სტანდარტების გათვალისწინებით იქმნება“, - განმარტავენ „სამკუთხედის“ დიზაინერები.

მათივე თქმით, სწორად დაგეგმარების შემთხვევაში,გასაყიდი ან გასაქირავებელი უძრავი ქონების საბაზრო ფასი მნიშვნელოვნად იზრდება:

„სწორი რემონტით ან ავეჯის განლაგების ცვლილებითაც კი შესაძლებელია, მნიშვნელოვნად გავზარდოთ გაქირავების ფასი, განსაკუთრებით მაშინ, როცა ეს პრემიუმ კლასის საცხოვრებლებს ეხება. ნებისმიერი წარმატებული უძრავი ქონების საბროკერო კომპანია თუ აგენტები თანამშრომლობენ ინტერიერის დიზაინერებთან, რაც ცხადყოფს, რომ მათი ცოდნა და გამოცდილება ეფექტურ შედეგს იძლევა“, - აღნიშნეს დიზაინერებმა. 

„სამკუთხედის“ 3 რჩევა სივრცის სწორად ასათვისებლად:

1. ისარგებლეთ ეკოლოგიურად სუფთა მასალებით. აღნიშნული მასალები  დიდ სარგებელს მოუტანს თქვენს სახლსა და გარემოს, რადგან ხასიათდება ეკომეგობრულობით და არ შეიცავს ტოქსიკურ ნივთიერებებს. აღნიშნული მასალები საშუალებას იძლევა, სახლში იტრიალოს ჯანსაღმა ჰაერმა და ჩვენი საცხოვრებელი უსაფრთხო გახდეს. მისი მთავარი უპირატესობები ენერგოეფექტურობა და გამძლეობაა, რაც გრძელვადიან პერსპექტივაში დაგვიზოგავს ხარჯებს.  გარდა ამისა, ნატურალური მასალები  ქმნის უნიკალურ ესთეტიკასა და ხასიათს, რაც თქვენს სახლს არა მხოლოდ მდგრადს, არამედ ელეგანტურსაც ხდის. 

2. მაქსიმალურად გაზარდეთ ბუნებრივი განათება. ამისათვის კედლები შეღებეთ ღია ფერებში (ან ღია ფერის შპალერი შეარჩიეთ), გამოიყენეთ სარკეები, რაც დაგეხმარებათ ბუნებრივი სინათლის ასახვასა და გაძლიერებაში და სივრცეს უფრო დიდსა და  მიმზიდველს გახდის. მაქსიმალური შედეგის მისაღებად სარკეები უნდა მოვათავსოთ ფანჯრის მოპირდაპირე მხარეს ან ბნელ კუთხეებში. 

3. შეარჩიეთ შეკრული ფერების პალიტრა, დაიცავით თანმიმდევრული ფერის სქემა მთელს სივრცეში, რათა ჰარმონიული ატმოსფერო შეიქმნას. აირჩიეთ 2-3 ძირითადი ფერი და რამდენიმე დამატებითი აქცენტი. ეს ხელს შეუწყობს თქვენი სახლის სხვადასხვა სივრცის ერთმანეთთან დაკავშირებას და შექმნის ერთიანობის  განცდას.

დიზაინერის რჩევების გათვალისწინებით თქვენს საჭიროებებზე მორგებული, კომფორტული სივრცის შექმნა კიდევ უფრო მარტივია.