სახლის დათვალიერება პანდემიის დროს
1006
21.04.2020 18:21:04



როგორ მოვემზადოთ დათვალიერებისთვის


მსოფლიოსა და ქვეყანაში COVID 19-ის გავრცელების საშიშროებამ, ცხოვრების რეჟიმი, თითქმის, სრულად შეცვალა. ახალი რეალობა გაურკვეველი ვადით ითხოვს ცხოვრებისა და საქმიანობის დისტანციურ გაგრძელებას.  თუმცა, ამ შეზღუდული შესაძლებლობების რეჟიმში, არის რიგი საკითხები, რომელიც აუცილებელ გადაწყვეტასა და განხორციელებას საჭიროებს. ერთ-ერთი ასეთი, შესაძლოა, ახალი საცხოვრებელი ადგილი აღმოჩნდეს, რომლის მოძებნაც პრე-ვირუსულ პერიოდშიც გქონდათ დაგეგმილი ან მოულოდნელად დაგჭირდათ. ჩვენ მოგიყვებით, როგორ უნდა მოიქცეთ ახალი ბინის შერჩევისას სტანდარტული დეტალების და უსაფრთხოების ნორმების გათვალისწინებით.


სანამ ბინის დასათვალიერებლად წახვალთ, აუცილებლად გაითვალისწინეთ, როგორც საკუთარი, ასევე გარშემომყოფების უსაფრთხოება. შეიმოსეთ შესაბამისად, გაიკეთეთ სამედიცინო ხელთათმანი, რადგან სავარაუდოდ საკმაოდ ბევრ რამესთან მოგიწევთ შეხება. აუცილებლად გაიკეთეთ სამედიცინო პირბადე ან სახის დამცავი ფარი. თან იქონიეთ სადეზინფექციო ხსნარი. თუ გრძელ თმას ატარებთ, უმჯობესია, შეიკრათ.


შერჩეულ ბინაში ვიზიტამდე გაეცანით რა დაწესებულებებია ახლო-მახლო, ხომ არ არის ისეთი ნეგატიური ფაქტორები, რომლებსაც თქვენ ვერ შეცვლით: ეს შესაძლოა იყოს ავტომაგისტრალი, მავნე ან ხმაურიანი წარმოება, სავაჭრო ცენტრი 24 საათიანი სამუშაო რეჟიმით. თუ სართული დაბალია, უნდა დაინტერესდეთ, მის ქვემოთ ხომ არ გადის მეტროპოლიტენის ხაზი.
ვიზიტამდე აუცილებლად გაითვალისწინეთ პანდემიის გავრცელების რისკი და უსაფრთხოების დაცვის მიზნით, ეცადეთ გაარკვიოთ, იმავე ან მიმდებარე შენობებში, ხომ არ დაფიქსირებულა ვირუსის გავრცელება. ამ შემთხვევაში უმჯობესია ბინის მონახულება სხვა დროისთვის გადადოთ.
 
 


დღის რომელი მონაკვეთი უნდა შეარჩიოთ


რადგან საქართველოში 21:00-დან 00:06-მდე კომენდანტის საათია ამოქმედებული, ვიზიტი არ დაგეგმოთ საღამოს საათებში. მითუმეტეს მაშინ, როცა ბინის დათვალიერება ისედაც დღის ნათელ მონაკვეთში სჯობს- ასე თქვენ შეძლებთ გაიგოთ ბინა ნათელია თუ ბნელი. ამასთან, დღის შუქზე ნებისმიერი პრობლემა ნათლად გამოჩნდება.


სასურველია, ბინა დაათვალიეროთ მარტომ, როგორც უსაფრთხოების დაცვის მიზნით, ასევე სხვა პირთა სუბიექტური შეფასებების გარეშე. თუ კი, ბინის დათვალიერება მეპატრონესთან ერთად ხდება, შეეცადეთ დაიცვათ დისტანცია, რაც გულისხმობს ახლო კონტაქტის არქონას.


 
როგორ დავათვალიეროთ ბინა


გამყიდველი, როგორც წესი,  არ აჩქარებს მყიდველს, თუ თავად არ ჩქარობს. თუ დათვალიერება მფლობელის გარეშე ტარდება, უძრავი ქონების აგენტი დათვალიერების დროს არ ზღუდავს, თუმცა დღევანდელი მოცემულობიდან გამომდინარე, უმჯობესია, უცხო ადამიანებთან ერთად, დახურულ სივრცელში ნაკლები დრო გაატაროთ.  
 
1) დათვალიერებისას ყურადღება მიაქციეთ შემდეგს:
2) სადარბაზოსა და მიმდებარე ტერიტორიის მდგომარეობას;
3) ლიფტის არსებობას;
4) შესაძლებელია თუ არა მისი გადაკეთება;
5) კედლების, ჭერის, იატაკის, ფანჯრებისა და კარებების მდგომარეობას;
6) ვენტილაციისა და გათბობის სისტემებს;
7) სანტექნიკას;
8) გაზის მილებს;
9) ხმაურის დონეს.


სტატიის ავტორია ss.ge