რა უნდა გავითვალისწინოთ სამშენებლო კომპანიის შერჩევისას

როდესაც საკუთარი ბინის შეძენას გადაწყვეტთ, გასათვალისწინებელია, რომ ეს მნიშვნელოვანი ნაბიჯი სანდო სამშენებლო კომპანიას მიანდოთ. ბინის შეძენა და კომპანიის სწორად შერჩევა მნიშვნელოვანია, როგორც თავისი შინაარსით - ვიცხოვროთ ჩვენს საკუთარ კომფორტულ კედლებში, ასევე ფინანსურადაც - ჩვენი გამომუშავებული თანხა მივანდოთ ისეთ კომპანიას, რომელიც ჩვენს მომავალ სახლს დროულად და ხარისხიანად ჩაგვაბარებს.

დღესდღეობით, საქართველოს ბაზარზე საკმაოდ ბევრი სამშენებლო კომპანია ოპერირებს, რომელთა სახელებიც მეტნაკლებად ცნობილია საზოგადოებისთვის. შესაბამისად, მომხმარებელს არჩევანის საშუალება ნამდვილად აქვს, მაგრამ არჩევანის სისწორეში დასარწმუნებლად და კომპანიის სანდოობის განსაზღვრისთვის, რამდენიმე ფაქტორზე უნდა გავამახვილოთ ყურადღება:

სამშენებლო კომპანიის გამოცდილება

კომპანიის გამოცდილების გასაცნობად, შეგიძლიათ მის ოფიციალურ ვებგვერდს ეწვიოთ, სადაც ნახავთ რამდენი ხანია, რაც ესა თუ ის კომპანია არსებობს ბაზარზე, რამდენად წარმატებით ფუნქციონირებს, რამდენი დასრულებული პროექტი აქვს და რა დრო სჭირდება საშუალოდ პროექტების დასრულებისთვის. ასევე, შეგიძლიათ გაესაუბროთ დეველოპერული კომპანიის წარმომადგენელს და სთხოვოთ, მცირე პრეზენტაცია ჩაგიტაროთ თავიანთი დასრულებული პროექტებისა და შეთავაზების შესახებ, მოგაწოდოთ ინფორმაცია სამშენებლო მასალების ხარისხსა და მწარმოებელზე, კომპლექსის ინფრასრტუქტურის თაობაზე, მომსახურებასა და დეტალურ საფასურზე. გარდა კომპანიის მხრიდან მოწოდებული ინფორმაციისა, შეგიძლიათ აღნიშნული საკითხები გადაამოწმოთ მოცემული კომპანიის მიერ აშენებულ საცხოვრებელ კომპლექსში უკვე შესახლებულ მცხოვრებლებთან, მიიღოთ რეკომენდაციები ან რჩევები, ნახოთ რამდენად კმაყოფილი მომხმარებელი ჰყავს კომპანიას. ტექნიკური და სპეციფიკური ინფორმაცია კი, პროექტის დაგეგმარებისა და სამშენებლო მასალების ხარისხის თაობაზე, შეგიძლიათ გაიაროთ დამოუკიდებელ სპეციალისტთან, რათა დარწმუნდეთ კომპანიის მიერ გამოყენებული მასალების და უსაფრთხოების ნორმების დაცვის სანდოობაში. კომპანიის გამოცდილებას, ასევე გაზომავთ მის წარმომადგენელთან საუბრითაც, იმის გათვალისწინებით, თუ რამდენად ამომწურავად და გასაგებად გაწვდით თქვენ მიერ მოთხოვნილ ინფორმაციას, რამდენად კვალიფიციური და გარკვეულია აღნიშნულ სფეროში.

კომპანიის ფინანსური მდგრადობა და პარტნიორები

აუცილებლად გადაამოწმეთ თქვენ მიერ შერჩეული სამშენებლო კომპანიის ფინანსური მდგომარეობა. ფინანსურად არამდგრადი კომპანიისგან, ნამდვილად არ უნდა ელოდოთ, რომ პროექტს დადგენილ ვადებში ჩაგაბარებთ, ან ხარისხიანად აშენებულ სახლში მოგიწევთ ცხოვრება. ფინანსური კრიზისის გამო, შესაძლოა, მშენებლობა გაურკვეველი ვადით შეჩერდეს ან სხვა სამშენებლო კომპანიას გადაეცეს, რაც მომხმარებელს წინასწარ არ ჰქონდა გათვლილი და ფინანსურ ხარჯებს მნიშვნელოვნად გაზრდის. მომხმარებელთა მნიშვნელოვანი ნაწილი მშენებლობის დასრულებამდე ქირით ცხოვრობს, რაც, რა თქმა უნდა, მშენებლობის პროცესის გადავადების ან ვადის გაზრდის შემთხვევაში გაუთვალისწინებელ ხარჯებს იწვევს და საბოლოოდ, მომხმარებელს აზარალებს. კომპანიის ფინანსური მდგრადობის შემოწმება მისი პარტნიორების ნახვითაა შესაძლებელი, თუკი დეველოპერულ კომპანიას აფინანსებს მსხვილი ფინანსური ორგანიზაცია, როგორიცაა ბანკი ან საინვესტიციო ფონდი, მაშინ ნაკლებია იმის რისკი, რომ კომპანია ფინანსური კრიზისის გამო გადაავადებს ან შეაჩერებს მშენებლობას. ასევე, გადაამოწმეთ სამშენებლო კომპანია იურიდიულ ჭრილშიც, რათა მშენებლობის ნებართვასთან დაკავშირებული პრობლემები გამოირიცხოს და გარდა ამისა, წინასწარ დააზუსტეთ, მომხმარებლებს ხომ არ აქვთ რაიმე სახის სასამართლო დავა კომპანიასთან. ასევე, აუცილებელია ხელშეკრულება ფორმდებოდეს სწორად და სასურველია, თუ მას იურისტთან ერთად გადახედავთ.

კომპანიის შემოთავაზებული ფასები

სამშენებლო კომპანიის ფასები თანხვედრაში უნდა იყოს შემოთავაზებულ ხარისხთან. ბუნებრივია, ყველა მომხმარებლისთვის მნიშვნელოვანია, რომ რაც შეიძლება ნაკლები დანახარჯი და გადასახადი ჰქონდეს, მაგრამ საეჭვოდ დაბალი ფასები ერთერთი ფაქტორია, რომლის გამოც შესაძლოა შერჩეული სამშენებლო კომპანიის რეპუტაცია და სანდოობა ეჭვქვეშ დააყენოთ. როგორც წესი, სამშენებლო კომპანიის ფასები საბაზრო ფასს უტოლდება, აქედან გამომდინარე, თუკი კომპანია 25 %-ზე მეტ ფასდაკლებას, ან საეჭვოდ ხელსაყრელ გადახდის პირობებს გთავაზობთ, ეს უკვე სარისკო ფაქტორია. ეს შესაძლოა მიუთითებდეს კომპანიის მხრიდან ნაღდი ფულის სწრაფად შეგროვებაზე, რაც თავის მხრივ, კომპანიის ფინანსურ მდგრადობას გამორიცხავს ან მშენებლობის დროს უხარისხო და იაფიანი მასალების გამოყენებაზე.

სამშენებლო კომპანიის შერჩევისას შეგიძლიათ House.ge-ზე ტოპ დეველოპერული კომპანიების ჩამონათვალს გადახედოთ და თქვენთვის სასურველი პირობებით და ლოკაციით შეარჩიოთ, თუ ვის ანდობთ თქვენი მომავალი ბინის მშენებლობას.