როგორ მოვაწყოთ სახლი სწორად

ახალ სახლში გადასვლა ცხოვრების ერთერთი გამორჩეული მომენტია, ის ასოცირდება ბედნიერ წუთებთან, თუმცა, ამასთანავე, შესაძლოა სტრესულიც იყოს, განსაკუთრებით მაშინ, როცა საქმე მის მოწყობას ეხება. როგორ უნდა გამოიყურებოდეს შენი სივრცე ისე, რომ ერთდროულად თანამედროვე ტენდენციებს მორგებულიც იყოს და შენს საკუთარ გემოვნებასა და სტილის შეგრძნებასაც გადმოსცემდეს? თუ სწორად დაგეგმავ სახლის მოწყობას, საბოლოოდ კომფორტული და ბედნიერი სივრცე გექნება შედეგად. ხოლო თუ მთელ შენს რესურსს არ მიუძღვნი მის  სწორად დაგეგმვას, შედეგიც არ იქნება დამაკმაყოფილებელი, უბრალოდ ავეჯით დატვირთულ არაფრისმთქმელ კედლებს მიიღებ. ოქროს შუალედისთვის საჭიროა, პროფესიონალი დიზაინერების რჩევებს მიჰყვე ნაბიჯ-ნაბიჯ და ყველაფერი წიანსწარ დაგეგმო.

არ დაიწყო ავეჯის შერჩევით

ახალი სახლის მოწყობისას მთავარია სიმშვიდე შეინარჩუნოთ და იმის გამო არ ჩავარდეთ პანიკაში, რომ ბინა ცარიელია. თქვენს უპირველეს ამოცანას არ წარმოადგენს ცარიელი სივრცის შერჩევა, არამედ ყველაზე მთავარია, რომ სწორად შეარჩიოთ ყველა დეტალი, რათა მოწყობის დასრულების შემდეგ კმაყოფილების გრძნობა გქონდეთ და ფერები და ზომები ზუსტად გქონდეთ შერჩეული. ცარიელ სივრცეს ავეჯი სწრაფად შეავსებს, ნამდვილად გჭირდებათ მისაღებ ოთახში დივანი, თუმცა თუ იჩქარებთ და არასწორი ზომის, ზოლებიან დივანს შეარჩევთ, მოგიწევთ მთელი სივრცის რემონტი ამ დივანზე ააწყოთ, რაც არასწორია. პირველი ნაბიჯი, რაც უნდა გადადგათ - ოთახის დეტალური ზომების აღებაა.

გაზომეთ ოთახი დეტალურად

ხშირად დაშვებულ შეცდომათა შორის არის არასწორი ზომის ავეჯი, მაგალითად ისეთი, რომელიც არ ეტევა ოთახის კარში, ზედმეტად პატარაა სივრცისთვის და ა.შ. კრიტიკულად მნიშვნელოვანია, რომ ავეჯის და ოთახის პარამეტრები თანხვედრაში იყოს. დიდი ზომის დივანმა და სავარძლებმა შესაძლოა პატარა ოთახის სივრცე სრულად დაიკავოს და აღარ დარჩეს ადგილი სხვა ავეჯისთვის, პატარა ზომის ავეჯი დიდ სივრცეში კი ისე დაიკარგება, რომ თავის დანიშნულებას ვერ მოიპოვებს. ოთახის დაკომპლექტებამდე გაზომეთ მისი სიგრძე და სიგანე, ჭერის სიმაღლე, აიღეთ ნებისმიერი დეტალის ზომები, ეს იქნება კიბე, სვეტები თუ სხვა კონსტრუქციები. ასევე მნიშვნელოვანია, გაზომოთ ფანჯრები ღია და დახურულ მდგომარეობაში. ფანჯრის გაღებისას შესაძლოა, სრულიად შეიცვალოს განლაგების აღქმა.  ნამდვილ სივრცეში ნივთების გადატანამდე შეგიძლიათ ტრადიციულ მეთოდს მიმართოთ და ფურცელზე გააკეთოთ ნახაზი, სად რას როგორ განალაგებდით, ნახაზის კეთებისას შეგეძლებათ ნებისმიერი ცვლილება ასახოთ და ეს ნამდვილად დაგეხმარებათ, რომ თქვენს საბოლოო იდეას ხორცი შეასხათ.

გადაწყვიტეთ, როგორ გსურთ ცხოვრება

სწორი და არასწორი გადაწყვეტილება არ არსებობს იმ საკითხში, თუ როგორ გსურთ ცხოვრება. ეს სრულად ინდივიდუალური გადაწყვეტილება და გემოვნების საკითხია. ოთახები შეიძლება იყოს ტრადიციული ან მოდერნის სტილის, დასასვენებელი ან ფორმალური, თბილ ან ცივ ფერებში გადაწყვეტილი ინტერიერით. დიზაინის არჩევისას, დაფიქრდით როგორი ცხოვრების სტილი გაქვთ და იმის მიხედვით გაანაწილეთ თქვენი სახლის სივრცე. რამდენი ადამიანი იცხოვრებთ? რას გააკეთებთ დროის უმეტეს ნაწილში? იქნებიან თუ არა ბავშვები თქვენი ოჯახის წევრები? ეს იმ შეკითხვების ნაწილია, რომელსაც სახლის მოწყობამდე უნდა უპასუხოთ. თუკი მუდმივად მასპინძლის როლში ხართ და თქვენს სახლში ხალხმრავლობა, სუფრა და დიდი შეკრებები ეწყობა, რადიკალურად განსხვავებული გადანაწილება დაგჭირდებათ მათგან, ვისთვისაც სახლში საჭმლის მომზადება იშვიათობას წარმოადგენს და ძირითადად გარეთ იკვებება. ასევე განსხვავებული იქნება იმ ადამიანების მოსასვენებელი ოთახები, ვინც მეგობრებთან ერთად ხშირად თამაშობს სამაგიდო თამაშებს და მისი, ვინც ტელევიზორის წინ დივანზე ძილს ანიჭებს უპირატესობას.

შეაგროვე იდეები

დააკვირდი სოციალურ ქსელში და სხვადასხვა დიზაინის ვებგვერდებზე შენ მიერ მოწონებულ კონტენტს. სოციალური ქსელების ალგორითმიც ხომ სწორედ ასე მუშაობს, შენ მიერ მოწონებული ფოტოების მსგავს იდეებს გთავაზობს. დააკვირდი იმ სტილს, რომელიც ყველაზე მეტად მოგწონს, დააკვირდი მათში გამოყენებულ ფერებს, ორნამენტებს, განლაგებას. აიღე თითოეული მათგანი სასურველი ფოტოებიდან და შექმენი უნიკალური დიზაინი საკუთარი სახლისთვის.

კიდევ ერთი მთავარი ეტაპი ბიუჯეტის დაგეგმვაა. მას შემდეგ, რაც თეორიულ ნაწილს დაასრულებთ, გაზომავთ სივრცეს, აარჩევთ თქვენი ცხოვრების სტილს და ნახავთ იდეებს ვიზუალურად, დაგეგმეთ მოსალოდნელი ხარჯები, არ გადაიხადოთ ნაკლებად მნიშვნელოვან ნივთებში ძვირი, რათა ცოტა თანხა არ დაგრჩეთ უფრო მნიშვნელოვანისთვის. თავდაპირველად დაიწყეთ კოსმეტიკური სამუშაოებით, დაელოდეთ მის საბოლოოდ გაშრობას, განალაგეთ შერჩეული ავეჯი და ბოლოს დაასრულეთ აქსესუარებითა და ხელოვნების ნიმუშებით, გემოვნების მიხედვით.