როგორ ვმართოთ საოჯახო ხარჯები ეფექტიანად და დავზოგოთ მეტი? – 5 ხერხი

ტექნოლოგიების განვითარებასა და ინფორმაციაზე ხელმისაწვდომობის ზრდასთან ერთად იცვლება ადამიანის მოთხოვნები. მისი ბუნება - ხვალ უნდოდეს იმაზე მეტი, ვიდრე დღეს აქვს და გარემო ფაქტორები აღნიშნულ მოთხოვნების სიას კიდევ უფრო დაუსრულებელს ხდის.  

სურვილებსა და საჭიროებებს შორის ბალანსის დაცვა სრულფასოვანი და მშვიდი ცხოვრებისთვის უმნიშვნელოვანესია, განსაკუთრებით მაშინ, როცა საქმე ოჯახს ეხება. „ადამიანები ფულით ბევრ სიგიჟეს აკეთებენ, მაგრამ სულაც არ არიან გიჟები“, - წერს ბიჰევიორისტული ფინანსებისა და ისტორიის ექსპერტი მორგან ჰაუზელი თავის წიგნში „ფულის ფსიქოლოგია“. ამ გიჟური ქმედებების კონტროლი კი მხოლოდ ჩვენს ხელთაა, მთავარია, სწორი პოზიცია დავიკავოთ იმ სოციალურ და ეკონომიკურ წესრიგში - კონსუმერიზმში, რომელიც მომხმარებელს სულ უფრო მეტი რაოდენობის პროდუქციისა და სერვისის შეძენისკენ უბიძგებს. რადგან როგორც მორგან ჰაუზელი წერს, „არავინაა ჩვენი საკუთრებით ისეთი აღფრთოვანებული, როგორც თავად ჩვენ“. მნიშვნელოვანია, არ გავხდეთ სურვილების მსხვერპლი და გონივრულად გადავანაწილოთ როგორც პირადი, ისე საოჯახო ხარჯები.

გაზრდილი ინფლაციისა და ცხოვრების ხარისხის მიმართ უფრო მაღალი მოთხოვნის ფონზე უნდა ვცადოთ და სწორი ფინანსური მიზნების დასახვით ხარჯვის მიმართ დამოკიდებულება შევცვალოთ. თავდაპირველად, ამისთვის საჭიროა შინაგანი მზაობა  და შემდეგ ცხოვრების ხარისხიც ნელ-ნელა გაუმჯობესდება.

გთავაზობთ რამდენიმე რეკომენდაციას იმისათვის, რომ  საოჯახო ხარჯები უფრო ეფექტიანად ვმართოთ და მეტის დაზოგვა შევძლოთ:

დაითვალეთ, ყოველთვიური გადასახადების გადახდის შემდეგ რა თანხა დაგრჩებათ

მაგალითად, თუ ყოველთვიურად კომუნალური ხარჯები, საბანკო სესხები, ბავშვის/ბავშვების წრეების გადასახადი, საწვავისა და პარკინგის საფასური და კვების ხარჯები 2500-3000 ლარამდე ადის, თქვენი ოჯახის შემოსავალი კი დაახლოებით 3500-4000 ლარამდეა, ეს იმას ნიშნავს, რომ გართობისთვის, ტანსაცმლის საყიდლებისთვის ან სხვა სურვილების ასასრულებლად დაახლოებით 1000 ლარი გრჩებათ, რომელშიც ასევე გაუთვალისწინებელი ხარჯებიც უნდა იყოს გათვალისწინებული.

იმისათვის, რომ ყველა გადასახადი დროულად დავფაროთ და თანხა გაუთვალისწინებელი ხარჯებისთვისაც დაგვრჩეს, მნიშვნელოვანია, ზუსტად ვიცოდეთ, რამდენის დახარჯვა გვიწევს ყოველთვიურ საჭიროებებში და რამდენი „გვითავისუფლდება“.

სწორად მართეთ სეზონური ხარჯები

ზაფხულის ხარჯები ძირითადად დასვენებას უკავშირდება, შემოდგომის - სასწავლო სამზადისს, ხოლო ზამთრის - შობა-ახალ წელს. იმისათვის, რომ ოჯახს არცერთი მათგანი არ დააწვეს ტვირთად, დაზოგვის მექანიზმის დანერგვა აუცილებელია. ყოველთვიურად გარკვეული თანხის გადადება, იქნება ეს ანაბარზე თუ არააქტიურ საბანკო ანგარიშზე საშუალებას მოგვცემს, სადღესასწაულო თუ წინასასკოლო პერიოდში მშვიდად გავაკეთოთ სხვადასხვა შენაძენი და გადახარჯვა ან  სესხების დამატება ავირიდოთ თავიდან.

შესაძლებლობის გაჩენისთანავე სესხებისგან გათავისუფლება

დღეს უძრავი ქონების  სესხის გარეშე შეძენა ადამიანების უმეტესობისთვის მნიშვნელოვან გამოწვევას წარმოადგენს, ამიტომ მათი ძირითადი ნაწილი სწორედ ამ გზას მიმართავს. მნიშვნელოვანია, რომ უძრავი ქონებით უზრუნველყოფილ სესხთან ერთად აღარ დავიმატოთ სამომხმარებლო ან სხვა სახის სესხები და მეტი აქცენტი გავაკეთოთ დაზოგვაზე. ვალდებულების არსებობის შემთხვევაში კი მაქსიმალურად უნდა ვიზრუნოთ მის დროულად დაფარვაზე. რაც უფრო ნაკლები გადასახადები გვაქვს, მეტი ფინანსური რესურსი გვრჩება საჭიროებების დასაკმაყოფილებლად, სურვილების ასასრულებლად და რაც მთავარია, დანაზოგის გასაკეთებლად.

დაისახეთ მიზანი

როცა ოჯახის წევრები ერთად ისახავენ მიზანს, რომ მაგალითად, უნდა შეიძინონ კონკრეტული ავტომობილი, საყოფაცხოვრებო ტექნიკა ან თუნდაც დაისვენონ რომელიმე კურორტზე, მისი შესრულება უფრო მარტივი ხდება. ამასთან, მნიშვნელოვანია, განვსაზღვროთ, რეალურად რამდენის დაზოგვა შეგვიძლია, რათა არ მოვექცეთ ზეწოლის ქვეშ და საკუთარი თავისა და ოჯახის წევრების მნიშვნელოვნად შეზღუდვა არ მოგვიწიოს.

შეიმუშავეთ ჭკვიანურად ხარჯვის საკუთარი ფორმულა

როცა ადამიანს  სწორად აქვს შემუშავებული ხარჯვის ფორმულა, ის იმავეს მარტივად დანერგავს ოჯახშიც.

მაგალითად, თუ ხვდებით, რომ თქვენი შემოსავლის ძირითადი ნაწილი გარეთ კვებაში და ყავის ობიექტებში გეხარჯებათ და ამის გამო სხვა საჭიროებებისა და სურვილებისთვის საკმარისი თანხა აღარ გრჩებათ, შეგიძლიათ, ცხოვრების წესს გადახედოთ და შეძლებისდაგვარად შეცვალოთ. ამასთან, სახლში მომზადებული საუზმე და ვახშამი შეიძლება უფრო ჯანსაღი იყოს, ვიდრე რომელიმე კვების ობიექტში, რაც თქვენს ჯანმრთელობაზეც უფრო დადებითად აისახება.

მნიშვნელოვანია, ყოველთვის დავიცვათ ზომიერება და სწორად დავაბალანსოთ სურვილები და საჭიროებები. გონივრულად მართული ბიუჯეტი ჩვენი და ჩვენი ოჯახის წევრების მშვიდი და ჰარმონიული ცხოვრების გარანტია.