რა უნდა გაითვალისწინო, როდესაც ბინის ჩაბარების მომენტი დგება

რა უნდა გაითვალისწინო, როდესაც ბინის ჩაბარების მომენტი დგება

შენი ბინის პირველად ხილვა და მასთან პირველი ფიზიკური კონტაქტი ამაღელვებელი მომენტია. მშენებარე ბინის ლოდინი სტრესული პროცესია, იქამდე სანამ საბოლოოდ არ დასრულდება მშენებლობა. ამ დროს მნიშვნელოვანია ყველაფერი შეამოწმოთ, რასაც დეველოპერი დაგპირდათ. რას უნდა მიაქციოთ ამ დროს ყურადღება და რა უნდა გაითვალისწინოთ, როდესაც ბინის ჩაბარების მომენტი დგება.

რას ითვალისწინებს კანონი

საქართველოში, ახალი აშენებული ნაგებობები რეგულირდება მოქმედი კანონმდებლობის მიხედვით. კერძოდ, ის განსაზღვრულია საქართველოს მთავრობის დადგენილება №255-ით, რომელიც მშენებლობის ნებართვის გაცემისა და შენობა-ნაგებობის ექსპლუატაციაში მიღების წესს არეგულირებს. კანონი განსაზღვრავს სამშენებლო სამუშაოების სახეებს და შენობა-ნაგებობების კლასებს. 

აღნიშნული კანონის II თავის, 2-ე პუნქტის მიხედვით „შენობა-ნაგებობების ახალი მშენებლობა ისეთი მშენებლობაა, რომელიც ხორციელდება მიწის ნაკვეთის იმ ნაწილში, სადაც არ დგას შენობა-ნაგებობა ან ხდება არსებულის მთლიანად ჩანაცვლება. ახალი მშენებლობაა ასევე დროებითი შენობა-ნაგებობის მონტაჟი/განთავსება“. სხვადასხვა თავი ეძღვნება მშენებლობის სხვადასხვა ტიპს, პროცესს, ადგენს ვადებს და სტანდარტებს. ამრიგად, თქვენი მომავალი სახლის უსაფთხოება კანონითაც არის განსაზღვრული.

ყველაზე გავრცელებული დეფექტები ახალ კორპუსებში 

შესაძლო ხარვეზების სრული სია შეიძლება ძალიან გრძელი იყოს, მაგრამ არის რაღაცები, რაც ბინის ჩაბარებისას ყველაზე ხშირად გვხვდება:

• ფანჯრების და კარების მექანიკური დაზიანება;

• დაზიანებული სანტექნიკა;

• კარებისა და ფანჯრების დახრილი ღიობები, კედლების სიმაღლე;

• არასწორად მოჭიმული იატაკის ბეტონის ფენა;

• არასწორად დაკავშირებული ელექტრული სადენები და ძაბვის ქსელები.

რას მივაქციოთ ყურადღება პირველ რიგში

თუ სტუდიოს ტიპის ბინა შეიძინეთ ახალ აშენებულ ეკონომ კორპუსში, მაშინ უამრავი დეტალი უნდა გაითვალისწინოთ. წინასწარ განსაზღროთ ავეჯის ზომები კედლებთან მიმართებაში. ბინაში შესვლისას ყურადღება უნდა მიაქციოთ თვალსაჩინო მექანიკურ დაზიანებებს. თეთრი კარკასის ბინებს ბევრი სიკეთე მოყვება, ბევრი რამის თავიდან გაკეთება თავად აღარ მოგიწევთ, მაგრამ ისინი უნაკლო უნდა იყოს. ყურადღბა მიაქციეთ კარებს და მასზე ნაფხაჭნებს, ფილებს, სანიტარული მოწყობილობების ბზარებს, მინას და ფანჯრების საკეტებს, გამწოვებს და ა.შ.

რა წავიღოთ, როდესაც ბინის სანახავად მივდივართ

იმისთვის რომ ბინა დაათვალიეროთ, გარკვეული ნივთები დაგჭირდებათ, გასაზომად, ჩასაწერად და იმისთვის, რომ მტვერში არ დაისვაროთ.

• ფანარი;

• რაიმე ექტრო მოწყობილობა ჩამრთველების შესამოწმებლად;

• ბახილები და კომფორტული ფეხსაცმელი;

• საზომი რულეტი;

• ბლოკნოტი და კალამი.

რა როგორ უნდა გამოიყურებოდეს

ბინის ჩაბარებისას ყურადღებით დაათვალიერე შემდეგი დეტალები:

ყველა ხილული ზედაპირის მექანიკური დაზიანება. შეამოწმეთ კედლები, ჭერი და სხვა. ხომ არ არის სადმე ბზარები;

ფანჯრები და ჩარჩოები: შეამოწმეთ საკეტები, ბზარები და ნაკაწრები, როდესაც ფანჯრები იღება და იხურება;

აივნები და ლოჯიები: შეამოწმეთ კარების და მოაჯირების მდგომარეობა;

ჭერი შემოწმდება ვიზუალურად. მისი ზედაპირი უნდა იყოს გლუვი და თანაბრად შეღებილი.

სველ წერტილებში არ უნდა იყოს გუბეები და გაჟონვის კვალი. შეამოწმეთ ონკანების მდგომარეობა და წყლის წნევა;

სამზარეულოში შეამოწმოეთ ონკანი და წყლის გადინების სისტემა. ასევე, ვენტილაცია, ასეთის არსებობის შემთხვევაში;

თუ ყველაფერი რიგზეა, ახალ ბინაში თამამად შეგიძლიათ გადახვიდეთ. მაგრამ, გაითვალისწინეთ რომ ახალ კორპუსებს სჭირდება დრო „დაჯდომისთვის“.