მზადება ბინის შეცვლისთვის: პრაქტიკული რჩევები მათთვის, ვინც ბინას იცვლის

საცხოვრებელი ბინის შეცვლა დაკავშირებულია ბევრ წვრილმან დეტალთან და გარკვეულ ხარჯებთანაც კი. გარდა იმისა, რომ ყველა ნივთის ლოკაცია უნდა შეცვალოთ, მნიშვნელოვანია, რომ მათი ტრანსპორტირება და ერთიდან მეორე პუნქტამდე გადატანა მოხდეს უსაფრთხოდ და დაზიანების გარეშე.

თუკი ბინის შეცვლა გადაწყვიტეთ, პირველ რიგში, მოიკვლიეთ გადამზიდი კომპანიები და რა თქმა უნდა, არჩევანი ბიუჯეტურ და ხარისხიან მათგანზე შეაჩერეთ. ამაში შესაძლოა დაგეხმაროთ მეგობრებისა და ნაცნობების რჩევებიც, რომლებმაც ახლახან შეიცვალეს ბინა და მოეპოვებათ გადამზიდი მანქანების მძღოლების ნომრები. ზოგადად, რემონტის დროს ბევრი საჭრო საკონტაქტო ნომერი გვიგროვდება, რაც აუცილებლად უნდა შევინახოთ, რადგან ვინ იცის კიდევ როდის რა დაგვჭრდება ჩვენ ან ჩვენს ახლობლებს. მას შემდეგ რაც მძღოლსა და სატვირთო მანქანას იპოვით, პირველ რიგში მსხვილი ტექნიკის გადაზიდვაზე იზრუნეთ, კარგად შეფუთეთ ისინი, რომ არც გზაში და არც უშუალოდ ბინაში ატანისას არ დაზიანდეს.

წინასწარ განსაზღვრეთ ახალ ბინაში სად რა უნდა განათავსოთ. აუცილებლად გქონდეთ მონახაზი, რომ ნივთების მიტანის შემდეგ გაუგებრობაში არ აღმოჩნდეთ და სასოწარკვეთაში არ ჩავარდეთ იმის გამო, რომ ვერ შეუსაბამეთ ავეჯი გარემოს, ოთახში ყველაფერი ისე არ დაგეტიათ, როგორც წარმოგედგინათ და ა.შ. გაითვალისწინეთ ავეჯისა და ტექნიკის ზომები, სივრცე, ახალი სახლის დიზაინი და შერწყმა. იმისთვის, რომ ახალ ბინას ახალი სიცოცხლე შესძინოთ, ეცადეთ, რომ ახალი ნივთებიც შეიძინოთ და ძველი ისეთი ნივთები მოიშოროთ, რასაც არ იყენებდით. ამით მეტ თავისუფალ სივრცესაც შექმნით ახალ ბინაში და ზედმეტი ნივთებისთვისაც არ მოგიწევთ ადგილის ძებნა.

მოიმარაგეთ ყუთები, გადაფუთეთ თემატური ნივთები ერთად და ყუთებს დააწერეთ გარედან სად რა დევს, რომელ ყუთშია მსხვრევადი ნივთები განთავსებული და ა.შ. ამით გაგიმარტივდებათ ყუთების გახსნისა და ამოლაგების პროცესი, შეძლებთ რომ დააპრიორიტეტოთ პირველ რიგში რომელი ყუთი გახსნათ და ბოლოს - რომელი.

გახსოვდეთ, რომ ბინაში ნივთების გადატანისას აუცილებლად რამდენიმე რეისი დაგჭირდებათ და ვინაიდან გადამზიდის დაქირავება და ბინაში აზიდვა გარკვეულ თანხებთანაა დაკავშირებული, ეცადეთ, რომ წვრილი ტექნიკის, ტანსაცმელისა და სხვა მარტივი ნივთების გადაზიდვაზე თავად აიღოთ პასუხისმგებლობა და საკუთარი ან ახლობლების ავტომობილებით გადაზიდოთ. ასეთ დროს, კარგი მეგობრები უარს ნამდვილად არ გეტყვიან დახმარებაზე.

რაც მთავარია, ახალ ბინაში გადასვლამდე, აუცილებლად ნივთების შეტანამდე გენერალურად დაასუფთავეთ ის, რომ საცხოვრებლად გადასვლისას ყველა კუთხე დალაგებული და სუფთა იყოს.

ასევე, გასათვალისწინებელია უსაფრთხოების საკითხებიც. ახალ ბინაში გადასვლისთანავე შეცვალეთ საკეტები, დააყენეთ სახანძრო უსაფრთხოების დეტექტორები და იზრუნეთ მაქსიმალურ უსაფრთხოებაზე თქვენს ახალ სახლში.