ისტორიები უბნებზე - საბურთალო, თბილისი

საბურთალო ქალაქის დასავლეთით, მდინარე მტკვარსა და ვერეს შორის, მტკვრის მარჯვენა სანაპიროზე მდებარეობს. 1962 წელს, დღევანდელ მიცკევიჩის ქუჩაზე, შემთხვევით აღმოჩენილ იქნა კაჟის ხელ-შუბისპირი, რაც ამ ტერიტორიაზე ქვის ხანის ადამიანის არსებობისკენაც მიგვანიშნებს.

საბურთალო ადრე დიდ ველს წარმოადგენდა. არსებობს მოსაზრება, რომ აქ, ძველად ბაღები უნდა ყოფილიყო, რომლებიც მდინარე ვერედან გამოყვანილი არხით ირწყვებოდა. საბურთალოზე იმართებოდა სხვადასხვა სპორტული ასპარეზობები, მათ შორის ბურთაობა და სწორედ ამას მიუთითებს მისი სახელწოდებაც.

მე–19 საუკუნეში წარმოქმნილი მრავალფეროვანი საბურთალოს დასახლება თბილისს ოფიციალურად 1917 წელს შემოუერთდა. მის ქალაქურ მოწყობას საფუძველი საბჭოთა ხელისუფლების დროს ჩაეყარა. 30–იან წლებში ჩნდება სამსართულიანი საცხოვრებელი სახლები, ე.წ. „სპეციალისტების სახლები“. ამის შემდეგ დაიწყო უბნის ინტენსიური განვითარება. ომის წინა წლებში მიმდინარეობდა იმ ტერიტორიის აქტიური განაშენიანება, რომელიც უშუალოდ გმირთა მოედანს ემიჯნება. 50–იან წლებში კოსტავას ქუჩის, მაშინდელი ლენინის ქუჩის, გასწვრივ შენდება დიდი საზოგადოებრივი და საცხოვრებელი სახლები. 60–იან წლებიდან  იქმნება თბილისის პირველ საცხოვრებელი მასივი.

მე-20 საუკუნის 20-იანი წლებიდან იწყება პეკინი და ალ. ყაზბეგის გამზირების და მათი ირგვლივ არსებული ქუჩების განაშენიანება. ამ პერიოდშივე, ქალაქს შემოუერთდა ცალკე არსებული სოფელი „დელისი“, რომლის ადრეული დასახლება „გდელისი“ იყო.

მოგვიანებით, 50-იანი წლების დასაწყისში იქმნება ვაჟა-ფშაველას გამზირი, რომელსაც 1961 წლამდე „კომინტერნის ქუჩა“ ერქვა.

ამავე პერიოდიდან იწყება საბურთალოს ინტენსიური განაშენიანება. გარდა საცხოვრებელი სახლებისა, შენდებოდა და იქმნებოდა ისეთი საზოგადოებრივი დანიშნულების ნაგებობები:

·      სასწავლო

·      სამეცნიერო

·      ადმინისტრაციული

·      კულტურულ-საგანმანათლებლო და სხვ.

ქალაქის სხვა უბნებში, მეტწილად, განლაგებული იყო ქარხნები და საწარმოები, რამაც ასევე შეუწყო ხელი ვაკის და საბურთალოს დაწინაურებას და განვითარებას.

თანამედროვე საბურთალო თბილისის ერთ-ერთი კეთილმოწყობილი უბანია. აშენდა თანამედროვე ტიპის საცხოვრებელი სახლები, საწარმოები, სასწავლო და სამეცნიერო-კვლევითი დაწესებულებები. უბნების განაწილების კუთხით, დღეს თბილისში  საცხოვრებლად, ყველაზე მოთხოვნადი უბანი - საბურთალოა. ამჟამად, მაცხოვრებლების რაოდენობა, დაახლოებით, თბილისის საერთო მოსახლეობის 13%-ს შეადგენს.