როგორ დავწეროთ კარგი სამოტივაციო წერილი

თუ გსურთ, რომ სამსახურში თქვენი მიღების შანსი მნიშვნელოვნად გაიზარდოს, უნდა გახსოვდეთ, რომ დამსაქმებელზე, CV-ზე უფრო მეტად, კარგ შთაბეჭდილებას - კარგი სამოტივაციო წერილი ქმნის. დამსაქმებელთან გაგზავნილ სამოტივაციო წერილს ორი მთავარი მიზანი გააჩნია:

1.     უნდა დაარწმუნოს, თქვენი პოტენციური დამსაქმებელი, რომ დაგიბაროთ გასაუბრებაზე;

2.     უნდა წარმოაჩინოს ის მნიშვნელოვანი დეტალები, რომლებიც არ ჩანს თქვენს CV-ში.

სამოტივაციო წერილის შექმნისას, უნდა იფიქროთ, როგორც მის შინაარსსა და ზომაზე, ასევე სტრუქტურასა და სტილისტიკაზე. დავიწყოთ სტილით:

სამოტივაციო წერილის სტილი

გამოიყენეთ მხოლოდ და მხოლოდ ფონტი - Sylfaen. მისი არ ქონის შემთხვევაში, ეცადეთ შეარჩიოთ სადა და მარტივი ფონტი. შრიფტის ზომა უნდა იყოს 12 კეგელი. გახსოვდეთ, რომ მთელი დოკუმენტი ერთი ზომისა და ფონტის უნდა იყოს. დასაშვებია მხოლოდ სათაურისთვის, შედარებით დიდი ზომის - 14 კეგელის გამოყენება ან უმჯობესია გამოიყენოთ B (Bold) ფუნქცია. აღნიშნული ფუნქციის გამოყენება შეგიძლიათ ასევე ქვესათაურებზეც. დაიცავით სტანდარტული Word დოკუმენტის არეები.

სამოტივაციო წერილის სტრუქტურა

თქვენ უნდა შექმნათ სამოტივაციო წერილის 4 ნაწილი, რომელიც დაყოფილი იქნება აბზაცებად. შესაბამისად, წერის დაწყების წინ, ფიქრიც ამ ნაწილების მიხედვით გაანაწილეთ, კერძოდ:

პირველი ნაწილი - საკუთარ თავზე ისაუბრეთ რაც შეიძლება უშუალოდ და მარტივად. ნუ დაიწყებთ წინადადებით „ჩემი სახელია...“ ამის ნაცვლად გამოიყენოთ - „მე მქვია...“ ან „მე ვარ...“ უკეთესი იქნება თუ დაიწყებთ,  მაგალითად შემდეგი სიტყვებით: „უკვე 25 წლის ვარ და...“ ან უბრალოდ თქვით, თუ როგორ შეიტყვეთ ვაკანსიის შესახებ, რადგან უმრავლეს შემთხვევაში, დამსაქმებელს უკვე წაკითხული აქვს თქვენი CV და „გიცნობთ“. მას შემდეგ როცა იტყვით, თუ როგორ შეიტყვეთ ვაკანსიის შესახებ, აუცილებლად ახსენეთ რატომ არის მიმზიდველი თქვენთვის ეს ვაკანსია.

მეორე ნაწილი - უნდა მოჰყვეთ თქვენი იმ უნარებისა და გამოცდილების შესახებ, რომელიც მხოლოდ და მხოლოდ აღნიშნულ ვაკანსიას უკავშირდება. მეორე ნაწილმა უნდა გაამყაროს სამოტივაციო წერილის პირველი ნაწილი, ამიტომ ხაზი გაუსვით იმას, თუ რამდენად აკმაყოფილებთ ვაკანსიაში მოცემულ მოთხოვნებს. შეიძლება ითქვას, რომ პირველ ნაწილში ამბობთ, თუ რატომ არი მიმზიდველი ვაკანსია თქვენთვის, ხოლო მეორე აბზაცში, კი ნაჩვენები უნდა იყოს ის, თუ რატომ ხართ შესაფერისი კანდიდატი თქვენ.

მესამე ნაწილი - პასუხი გაეცით კითხვას: „რატომ გსურთ აღნიშნული პოზიციის დაკავება?“ აღნიშნეთ ის უნარები, რომელსაც ამ პოზიციაზე დასაქმების შემთხვევაში შეიძენთ. ამასთან, არ დაგავიწყდეთ იმის თქმაც, თუ რა სარგებელს მოუტანთ ორგანიზაციას თქვენი ამ ვაკანსიაზე აყვანით.

მეოთხე ნაწილი - ხშირ შემთხვევაში და სამწუხაროდ, მეოთხე ნაწილს სამუშაოს მაძიებლები ყურადღებას არ აქცევენ და უგლებელყოფენ. თუმცა, დამსაქმებელზე, საბოლოო წარმოდგენას სწორედ დასკვნითი ნაწილი ქმნის. თქვენ უნდა გამოხატეთ გასაუბრების სურვილი, რომ უფრო დეტალურად გააცნოთ თქვენი შესაძლებლობები მათ. ასევე, აუცილებლად გამოთქვით მზაობა დამატებითი ინფორმაციის მისაწოდებლად და მადლობა გადაუხადეთ, რომ გამონახეს დრო, თქვენი დოკუმენტაციისა და სამოტივაციო წერილის გასაცნობად.

სამოტივაციო წერილის შინაარსი და ზომა

ისაუბრეთ მხოლოდ იმ გამოცდილებაზე, რომელიც კონკრეტულ ვაკანსიას შეესაბამება. თუ შესაბამისი გამოცდილება ჯერ არ დაგიგროვებიათ, ან ეს თქვენი პირველი სამსახურია, იყავით თამამი და თქვით აღნიშნულის შესახებ. დაამატეთ, რატომ გადაწყვიტეთ ამ კომპანიაში CV-ის გაგზავნა და მოიყვანეთ თუნდაც ერთი მაგალითი, კომპანიის მოღვაწეობიდან. მაგალითად მოგეწონათ გამოფენა, რომელიც კომპანიამ გამართა, ან კონკრეტული პროდუქტი, რომელსაც კომპანია აწარმოებს და ა.შ. თქვენი არგუმენტები რეალური უნდა იყოს, ამიტომ კარგად გაეცანით კომპანიის ისტორიას და მოღვაწეობას.

რაც შეეხება სამოტივაციო წერილის ზომას, ის უნდა იყოს Word დოკუმენტის მინიმუმ  ნახევარი - 100-150 სიტყვა და მაქსიმუმ 2 გვერდი - 350-400 სიტყვა.

და ბოლოს, გახსოვდეთ - იყავით გულწრფელი!

გისურვებთ წარმატებებს!