თანხის შენახვის სხვადასხვა გზა და მათი უპირატესობები

ფულის დაზოგვა ის ჩვევაა, რომელიც ადამიანმა პატარა ასაკიდანვე უნდა გამოიმუშაოს. მნიშვნელოვანია, ბავშვი თავიდანვე მიაჩვიოთ საყვარელი სათამაშოსა თუ ტკბილეულისთვის ფულის შეგროვებას. უკვე ზრდასრულ ასაკში კი ფულის დასაზოგად შემდეგი რჩევები უნდა გაითვალისწინოთ: ყოველთვის აკონტროლეთ ხარჯები, განსაზღვრეთ მიზნები, რომლისთვისაც თანხას ზოგავთ და აგროვებთ, დაზოგვას მიეცით სისტემატური სახე და ეცადეთ, ყოველდღიურად მცირედი მაინც დაზოგოთ, გამოიყენეთ დაზოგვის ავტომატური გზები.

დაზოგვის გზებზე ბევრი შეგვიძლია ვისაუბროთ, თუმცა ამჯერად დაზოგილი თანხის შენახვის გზებზე ვკონცენტრირდეთ. მას შემდეგ რაც კონკრეტული მიზნისთვის თანხის შეგროვებას დაიწყებთ და დაზოგვის გზებსაც შეარჩევთ, უნდა გადაწყვიტოთ, როგორ შეინახავთ მას. არსებობს თანხის შენახვის ფორმალური და არაფორმალური გზები, რომელთაც თავისი დადებითი და უარყოფითი მხარეები აქვთ. მნიშვნელოვანია, რომ თანხის შენახვის გზა თქვენი მიზნიდან გამომდინარე შეარჩიოთ.

დაზოგვის ფორმალური გზა გულისხმობს თანხის ფინანსურ ორგანიზაციაში განთავსებას. არაფორმალურ გზაში კი თანხის უბრალოდ სახლში შენახვა იგულისხმება.

თანხის შენახვის არაფორმალური გზა

თანხის სახლში შენახვა ბევრს შეიძლება უფრო მარტივად მოეჩვენოს, რადგან ამ დროს არ გიწევთ ფინანსური ხელშეკრულების გაფორმება, ბანკთან ან სხვა ფინანსურ ორგანიზაციასთან ურთიერთობა, არ გაქვთ პერიოდული შენატანის ვალდებულება და ამავდროულად, დაზოგილი თანხა თქვენთვის ყოველთვის ხელმისაწვდომი იქნება. თუმცა ფულის სახლში შენახვას არაერთი რისკი ახლავს თან და ეს აუცილებლად უნდა გაითვალისწინოთ.

მთავარი რისკი დანაზოგის არამიზნობრივად და დაუგეგმავად დახარჯვაა. ახალი სურვილები და მოთხოვნები ხშირად უჩნდება ადამიანს და მათ შესასრულებლად სახლში შენახული თანხის დახარჯვის ცდუნება საკმაოდ მაღალია. შეიძლება იფიქროთ, რომ შემოსავლის მიღების შემდეგ ამ თანხას დააბრუნებთ, თუმცა ამის ალბათობა 100%-იანი არ არის. ასევე სახლში შენახული თანხა შეიძლება მარტივად გაასესხოთ, რაც რისკებს ასევე ზრდის.

მეორე მხრივ, სახლში შენახულ თანხაზე თქვენ არ იღებთ სარგებელს. ვალუტა კი ხშირად განიცდის ინფლაციას და ამიტომ მისი მსყიდველობითი უნარი გარკვეული პერიოდის შემდეგ დიდი ალბათობით შემცირდება. ფორმალური გზით შენახვის შემთხვევაში თქვენს თანხაზე გარკვეულ სარგებელს მიიღებთ. შეიძლება ის ბევრი არ იყოს, მაგრამ საბოლოოდ ინფლაციასთან დაკავშირებული რისკის გარკვეულწილად დაბალანსება მოხდება.

ალბათობა მცირეა, თუმცა მაინც არსებობს რისკი, რომ სახლში შენახული თანხა სხვადასხვა ტიპის საგანგებო სიტუაციის, მაგალითად, ხანძრის დროს, დაკარგოთ.

თანხის შენახვის ფორმალური გზა

თანხის შენახვის ფორმალური გზები ბევრი უპირატესობით გამოირჩევა. მთავარი უპირატესობა კი საპროცენტო სარგებლის მიღებაა. ბანკები მომხმარებელს სთავაზობენ  სხვადასხვა ტიპის ანაბარს, რომელთაც განსხვავებული საპროცენტო განაკვეთი აქვთ. მისი ოდენობა თანხის ვალუტის, ანაბრის ხანგრძლივობისა და თანხის ოდენობის მიხედვით განისაზღვრება. მიღებული სარგებლით ინფლაციასა და თანხის გაუფასურებასთან დაკავშირებული რისკები მეტ-ნაკლებად დაგიბალანსდებათ.

საბანკო ანგარიშზე თანხის შენახვა-დაგროვება დაგეხმარებათ, არამიზნობრივ ხარჯს აარიდოთ თავი. ამავდროულად, უფრო მარტივია დაგროვება, რადგან ხშირ შემთხვევაში ანაბრის გახსნის დროს ვალდებულებას იღებთ, რომ ყოველთვიურად გარკვეული თანხა შეიტანოთ. ასევე შესაძლებელია ავტომატურად დაგროვებადი ანაბარი გახსნათ, რომელიც ყოველ ტრანზაქციაზე კონკრეტულ თანხას გიგროვებთ.

ანაბარზე შენახული თანხა დაკარგვის ან ფიზიკურად განადგურებისგან დაცულია. უსაფრთხოების მხრივ, კიდევ ერთი გასათვალისწინებელი საკითხია, რომ საქართველოს კომერციულ ბანკში გახსნილი ყველა დეპოზიტი ავტომატურად დაზღვეულია გახსნისთანავე.

არ გადადოთ და დაიწყეთ თანხის დაზოგვა დღესვე. დასაზოგად და შესანახად კი თქვენთვის ოპტიმალური გზები შეარჩიეთ. შედეგად სასურველი თანხის დაგროვება და მიზნის მიღწევა ბევრად მარტივი გახდება.