რა არის NFT და ღირს თუ არა მისი შეძენა?

NFT, იგივე non-fungible token - არაჩანაცვლებადი ტოკენი არის ციფრული აქტივი, რომლის მფლობელიც უნიკალურ ვიდეოს, უძრავ ქონებას, მუსიკას, ნახატს ან რაიმე სხვას ფლობს, ოღონდ მხოლოდ ციფრულ ფორმატში.

მის შესაქმნელად გამოყენებულია იგივე ტიპის პროგრამირება, როგორიც კრიპტოვალუტისთვის. ეს არის კრიპტოგრაფიული აქტივები - ვიდეო, გრაფიკული ფოტო და სხვა, რომლებიც ბლოკჩეინის ტექნოლოგიაზეა დაფუძნებული. კრიპტოვალუტისგან განსხვავებით, თითოეულ კრიპტოგრაფიულ აქტივს ერთმანეთისგან განსხვავებული ღირებულება აქვს (მაგალითად, როგორც კრიპტოვალუტების ბიტკოინისა და ეთერიუმის შემთხვევაში).

NFT-ის ტექნოლოგიის არსი იმ საკუთრების უნიკალურობაშია, რასაც ფლობ, ოღონდ მას ფიზიკურად ვერ ეხები და გაცვლა-გაყიდვა მხოლოდ ციფრულ ფორმატში შეგიძლია. ვინც შეიძენს მაგალითად, კონკრეტულ ციფრულ ვიდეოს, მისი მფლობელიც ის იქნება, ექნება ამის დამადასტურებელი საბუთიც და მისგან შემოსავლის მიღება მხოლოდ თავად შეეძლება.

NFT არის კრიპტოვალუტა ეთერიუმის ბლოკჩეინის ნაწილი (ეთერიუმი შექმნა ვიტალიკ ბუტერინმა 2013 წლის ბოლოს, ხოლო ქსელში 2015 წელს გამოჩნდა).

ღირს თუ არა NFT-ს შეძენა?

NFT-ს ღირებულება აქვს იქამდე, სანამ მისი მყიდველი ფიქრობს, რომ ასეა. იგივე ხდება სხვა ფიზიკური აქტივების შემთხვევაშიც, კონკრეტულად ხელოვნების ნიმუშების, რომლებიც ღირებულებას კონკრეტული წრის აღიარების შემდეგ იძენს. დროის გასვლასთან ერთად NFT ხდება ბრენდი, რომელსაც ბევრი ცნობილი სახე (მაგალითად, ჯიმ ქერი, ემინემი, ჯიმი ფელონი, მადონა და სხვა) ენდო და ციფრული აქტივი შეიძინა, რაც მის მიმართ რწმენასა და ინტერესს კიდევ უფრო აღრმავებს.

რამდენად ლიკვიდური აქტივი იქნება NFT სამომავლოდ, ამის დარწმუნებით თქმა დღეს შეუძლებელია, რადგან მის მიმართ არსებული ნდობა შეიძლება ერთ დღესაც გაქარწყლდეს და სისტემა ჩამოიშალოს, ამიტომ თქვენი გადასაწყვეტია, დააბანდებთ თუ არა ფულს მასში.

რას ფიქრობენ მილიარდერები NFT-ს შესახებ?

სანამ ციფრული აქტივის შეძენის გადაწყვეტილებას მივიღებდეთ, საინტერესოა, გავეცნოთ რას ფიქრობენ NFT-ს შესახებ მილიარდერები, რომელთაც სწორად ინვესტირებაში ბადალი არ ჰყავთ.

Microsoft-ის დამფუძნებლის ბილ გეითსის აზრით, „კრიპტო და NFT 100%-ით უდიდესი სისულელის თეორიაზეა დაფუძნებული“, რადგან გადაჭარბებული ფასის მქონე აქტივების ფასი გაიზრდება მანამდე, სანამ ინვესტორების საკმარისი რაოდენობა გადაწყვეტს მასში მეტის გადახდას. გეითსმა იხუმრა, რომ „მაიმუნების ძვირად ღირებული ციფრული სურათების“ ფასს შეუძლია „მსოფლიო უზომოდ გააუმჯობესოს“ და მიუთითა ბოლო პერიოდში გაპოპულარებულ Bored Ape Yacht Club NFT-ს კოლექციაზე, რომელსაც ბევრი ცნობილი სახეც ფლობს.

კრიპტოვალუტას სკეპტიკურად უყურებს მილიარდერი ინვესტორი უორენ ბაფეტიც. როგორც მან განაცხადა, „ეს არ არის პროდუქტიული აქტივი და არ ქმნის რაიმე ხელშესახებს“.

„გაიზრდება თუ არა ის მომავალ წელს, 5 ან 10 წელიწადში, არ ვიცი, მაგრამ ერთ რამეში დარწმუნებული ვარ, რომ ის არაფერს არ ქმნის,“ -აღნიშნა მან.

საინტერესოა, რომ უორენ ბაფეტის სკეპტიციზმს არ იზიარებს მისი 45 წლის შვილიშვილი ნიკოლ ბაფეტი, რომელიც მედია არტისტია და თავადაც უცდია NFT-ს შექმნა.

ციფრული აქტივის მიმართ ინტერესი გამოთქვა მილიარდერმა ინვესტორმა მარკ კუბანმაც, რომელიც  აცხადებს, რომ პირველად კრიპტოვალუტით დაინტერესდა მაშინ, როცა ერთი წლის წინ NFT შეიძინა.

არსებობს მაგალითები, როცა NFT-ს შექმქმნელებმა დიდი შემოსავლები მიიღეს. მაგალითად, 2021 წელს ბრიტანი პიერმა თავისი ფოტოგრაფიული ნამუშევრების NFT-ების გაყიდვით 109,000$-ზე მეტი გამოიმუშავა. 

როგორც CNBC წერს, მანამდე მას თავისი ჩიკაგოს აპარტამენტის ქირის გადახდა ან სასურსათო მარკეტში პროდუქტების შეძენაც კი არ შეეძლო.