რომელია ყველაზე მოთხოვნადი კურსები და ტრენინგები?

განათლების მისაღებად უმაღლესი და პროფესიული სასწავლებლების გარდა კიდევ ბევრი არაფორმალური გზა არსებობს. ესა თუ ის პროფესია, რომელიც შედარებით ახალია და უნივერსიტეტების პროგრამების ჩამონათვალში ჯერჯერობით არ იძებნება, ტრენინგებისა და მოკლე თუ გრძელვადიანი კურსების გავლით მარტივად შესწავლადია. მთავარია მონდომება და ძებნის უნარის სწორად გამოყენება. სწავლა და სწავლება ციფრულ ეპოქაში გამარტივდა ონლაინ გაკვეთილების დახმარებით, ბევრ სტუდენტს დაუზოგა გზის დრო და ხარჯები და სახლიდან გაუსვლელად, კომფორტის ზონაში გახდა შესაძლებელი სასურველი დისციპლინის დაუფლება და ახალი ცოდნის მიღება. გამოიკვეთა ესა თუ ის სფეროები, რომელიც შედარებით მოთხოვნადი გახდა დროსთან მიმართებით და უფრო და უფრო მეტი ახალგაზრდის ინტერესის საგანი გახდა. ზოგიერთი დარგი პოპულარული და მოთხოვნადი იქიდან გამომდინარე გახდა, რომ ტექნოლოგიების განვითარებამ მეტი ციფრული უნარების განვითარების მოთხოვნა დააყენა დღის წესრიგში, ადამიანები ცდილობენ ყოველდღიურობაში მეტად ავტომატიზირებული და კომფორტის მომტანი დეტალები შემოიტანონ და ამ კუთხით მუშაობენ შესაბამისი მოწყობილობების შექმნასა და დახვეწაზე.

პროგრამირება

პროგრამირება ბოლო პერიოდში ალბათ ერთერთი ყველაზე ბევრჯერ მოძებნილი, ნათქვამი და გაგებული სიტყვაა. პროგრამირების შესწავლისას, შეისწავლით კოდის წერას, რომელიც დაგეხმარებათ შექმნათ პროექტები, ვებგვერდები, ფლობდეთ სხვადასხვა კომპიუტერულ ენებს და მათი დახმარებით მრავალფეროვანს და მომხმარებელზე მორგებულს ხდიდეთ თქვენს ნამუშევარს. პროგრამირება ერთი შეხედვით შესაძლოა რთულად გამოიყურებოდეს, თუმცა ერთერთი ყველაზე მოთხოვნადი დარგია, რომლით დაინტერესებაც არამხოლოდ ბაზარმა გამოიწვია, არამედ ინდივიდები თავადაც დაინტერესდნენ და ალღო აუღეს. პროგრამირების მეშვეობით, სხვა ციფრული პროფესიების მსგავსად, სამსახურის ძიების არეალი შეუზღუდავი გახდა და არამხოლოდ ლოკალურად, არამედ დისტანციურად მთელი მსოფლიოს მასშტაბით გახდა შესაძლებელი დამსაქმებელთან ურთიერთობა და პროექტის აღება.

გრაფიკული დიზაინი

გრაფიკული დიზაინის შესწავლა წლების წინ შესაძლოა სამხატვრო აკადემიაში ჩაბარებასა და ილუსტრატორში მუშაობასთან ყოფილიყო ასოცირებული. დღესდღეობით კი მეტი და მეტი ადამიანი ინტერესდება გრაფიკული დიზაინის კურსებით. აქ გაერთიანებულია როგორც ფოტოშოფის, ასევე ილუსტრატორისა თუ სხვადასხვა რელევანტური პროგრამების შესწავლა, რომელთა ცოდნაც, სამომავლოდ საშუალებას მოგცემთ, რომ შექმნათ სხვადასხვა ტიპის დიზაინები, ფოტოები, სარეკლამო პოსტერები, ფლაერები, მოძრავი გრაფიკული გამოსახულებები, ლოგოები და ა.შ. პროგრამირების მსგავსად, გრაფიკული დიზაინის მიმართულება საშუალებას იძლევა, რომ სახლიდან გაუსვლელად და საკუთარი დროის თავად კონტროლის მეშვეობით მიიღოთ შემოსავალი და იმუშაოთ იმდენი, რამდენსაც თავად ჩათვლით საჭიროდ. თუმცა, რა თქმა უნდა, აღსანიშნავია ისიც, რომ სრულ განაკვეთზე სტანდარტული გრაფიკით მომუშავე გრაფიკული დიზაინერებიც დასაქმებულები არიან კომპანიებში. მნიშვნელოვანი ფაქტორია ისიც, რომ თითქმის ყველა მსგავს პროგრამას იდენტური ინტერფეისი აერთიანებს და სხვადასხვა ახალი პროგრამებისთვის ალღოს აღება მარტივი ხდება და ერთის სწავლით, ფაქტობრივად, სხვა მსგავსი პროგრამების შესწავლისთვისაც ამზადებთ თქვენი რესურსების ნიადაგს.

თუკი გრაფიკული დიზაინერი ცალკე აღებულ დიზაინებზე მუშაობს, აქვე შესაძლოა ვახსენოთ UI/UX დიზაინერებიც, რომლებიც ქმნიან მომხმარებელზე ორიენტირებულ ვიზუალურ მხარეს მაგალითად ვებგვერდებისთვის ან მობილური აპლიკაციებისთვის და მომხმარებლის გამოცდილებაზე დაყრდნობით კომფორტულს ხდიან სხვადასხვა ხელსაწყოებით მუშაობას. მათი შექმნილი დიზაინების მეშვეობით კი დეველოპერები მათ ნამუშევარს უკვე გარდაქმნიან მუშა ღილაკებიან ფუნქციონალებად.

სოციალური მედია და ციფრული მარკეტინგი

იქიდან გამომდინარე, რომ ადამიანების შეუცვლელი მეგობარი სმარტფონი და სოციალური ქსელები გახდა, ბრენდებმაც ამ სივრცეში გადაინაცვლეს და თავიანთი პროდუქტის შეთავაზების საუკეთესო გზად ციფრული არხები გახადეს. ამისთვის საჭიროა ადამიანი, რომელიც სოციალურ ქსელებსაც მართავს და ციფრული მარკეტინგის ბაზისებშიც გარკვეულია, რათა სწორად შეძლოს ციფრული არხების ტექნიკური შესაძლებლობებისა და ფუნქციონალების გამოყენება, განსაზღვროს სოციალური მედიის მარკეტინგის მიზნები, სტრატეგიები, წარმატებით შექმნას ონლაინ კამპანიები. აღნიშნულ სფეროში ტრენინგები და კურსები მუდმივად მოთხოვნადია და შესაბამისად მისი მიწოდებაც უწყვეტად მიმდინარეობს სხვადასხვა ტრენინგცენტრებისგან.

ახალი ცოდნა-უნარების შეძენა შესაძლებელია ნებისმიერ დროს. ამისთვის საჭირო არ არის, რომ თავიდან მიიღოთ 4 წლიანი უმაღლესი განათლება, ხშირად ტრენინგებისა და კურსების დახმარებით, ასევე თქვენი ძალისხმევით და ვარჯით სავსებით შესაძლებელია ახალ პროფესიას დაეუფლოთ და თქვენი კარიერის მიმართულება სრულებით შეცვალოთ. ამას მოწმობს დღესდღეობით საქართველოში მოთხოვნადი ტრენინგების და კურსების შინაარსიც.