ზამთრის დასასვენებელი კურორტები საქართველოში: ფასები და პირობები

ზამთარი მოახლოვდა და ნელ-ნელა სამთო-სათხილამურო კურორტებიც იწყებს გამოღვიძებას. ტურისტული სეზონი საქართველოში ფაქტობრივად მთელი ზამთრის განმავლობაში გრძელდება და ამინდის მიხედვით, ზოგჯერ ადრეულ გაზაფხულზეც ვრცელდება. ტურიზმის სფერომ განსაკუთრებული ზიანი მიიღო კოვიდ პანდემიის პერიოდში, რადგან შეჩერებული იყო ქვეყნებს შორის მიმოსვლა, საქართველოს სამთო-სათხილამურო კურორტები კი არამხოლოდ შიდა ტურიზმისთვისაა პოპულარული, არამედ მრავალი ქვეყნიდან ჩამოსულ ტურისტებსაც მასპინძლობს.

თხილამურებითა და სნოუბორდით სრიალის მოყვარულთათვის, საქართველოში სამი ყველაზე პოპულარული კურორტია ზამთრის პერიოდისთვის, ესენია გუდაური, ბაკურიანი და სვანეთი. სამივე მათგანს თავისი ადგილი უკავია ტურიზმის რუკაზე და შესაბამისად განსხვავებულია სამივე კურორტის დასასვენებელი დეტალები.

ბაკურიანი

მიუხედავად იმისა, რომ ბაკურიანი უფრო მეტად პოპულარული ზამთრის სეზონზეა, ის არც ზაფხულში კარგავს აქტუალობას, რადგან მისი გამორჩეული ჰავა განსაკუთრებით კარგია ჯანმრთელობისთვის და პატარა ბავშვებისთვის. სწორედ ამიტომ, ზაფხულშიც და ზამთარშიც, ყველაზე მეტ ბავშვს და ოჯახური დასვენების მოყვარულ დამსვენებელს სწორედ ბაკურიანში შეხვდებით. ბაკურიანში არის როგორც პროფესიონალური, ასევე სასწავლო/საბავშვო სასრიალო ტრასები და სხვადასხვა ტიპის გასართობი აქტივობები  - მაგალითად ყინულის მოედანი, მცირე ატრაქციონები, გასართობი პარკი და სხვა. დასასვენებელ ადგილებს რაც შეეხება, ძირითადად სასტუმროები და კოტეჯებია და ფასები განსხვავდება მათი მდებარეობის მიხედვით. ერთი ღამის მინიმალური ფასი სასტუმროში საშუალოდ 100 ლარია და მინიმალურ პირობებს ყველა მათგანი აკმაყოფილებს, როგორიცაა გათბობა და ცხელი წყალი. ფასების მატება და კლება დამოკიდებულია სასტუმროს ადგილმდებარეობაზე, გათბობისა და ინტერნეტის ხარისხზე, კვებასა და ნომრის აღჭურვილობაზე. 150-170 ლარია საშუალო ფასი ბინის ქირაობის შემთხვევაში, რისი უპირატესობაც იმაში მდგომარეობს, რომ იზოლირებული საძინებელი ოთახი და მეტი ტექნიკა აქვს. ბაკურიანში წასვლა თბილისიდან შესაძლებელია როგორც მსუბუქი ავტომობილით, ისე მიკროავტობუსით ან მინივენით. დედაქალაქიდან 198 კმ-ით არის დაშორებული და ჭარბი თოვლისა და მოყინული გზის გათვალისწინებით საშუალოდ თბილისიდან 2 საათ-ნახევარი დაგჭირდებათ ბაკურიანში ჩასასვლელად.გასაქირავებელი ბინების განცხადებები შეგიძლიათ ss.ge-ზე დაათვალიეროთ. ბაკურიანში საკუთარი უძრავი ქონების ფლობის შემთხვევაში, დამსვენებელს არ მოუწევს ყოველწლიურად თავისი ბიუჯეტის გადახედვა ზამთარში დასვენების დასაგეგმად, ამ საკითხის მოგვარებაში კი house.ge-ს მეგობარი დეველოპერული კომპანიებიც გვეხმარებიან და გვთავაზობენპროექტებსბაკურიანში, რომელთაგან ნაწილი უკვე დასრულებულია, ნაწილი კი მალე დასრულდება. რომელიმეს შეძენის შემთხვევაში ზამთარშიც და ზაფხულშიც გექნებათ საკუთარი დასასვენებელი სივრცე, რომელიც დარჩენილ პერიოდში თქვენთვითონაც შეგიძლიათ აქციოთ თქვენი შემოსავლის წყაროდ.

გუდაური

მეორე ცნობილი სამთო კურორტი საქართველოში- გუდაურია. გუდაური ბაკურიანთან შედარებით 88 კმ-ით ახლოსაა თბილისთან და სულ რაღაც 110 კმ აშორებს დედაქალაქს, თუმცა გასათვალისწინებელია, რომ გუდაურისკენ მიმავალი გზა ვლადიკავკაზისკენ მიმავალი ტრაილერებისთვისაც წარმოადგენს მთავარ გადასაადგილებელ გზას და რიგ შემთხვევებში უფრო მეტად არის ხოლმე დატვირთული და ფრთხილად გასავლელია. ამიტომ შესაძლოა გუდაურში ჩასასვლელად დროის მცირე განსხვავება დაგიფიქსირდეთ და საშუალოდ 2 საათი და რამდენიმე წუთი მოანდომოთ. გუდაურში დასასვენებლად, ძირითადად ჩამოდიან ტურისტები სხვადასხვა ქვეყნებიდან და ახალგაზრდა დამსვენებლები საქართველოს სხვადასხვა ქალაქებიდან. აქ, უმეტესად კოტეჯები და აპარტამენტებია გასაქირავებლად, რომელთა ფასიც დიდწილად დოლარშია მოცემული და საშუალოდ 1 ღამის ღირებულება 1-ოთახიან ბინაში $135-ია. რასაკვირველია, ფასები განსხვავდება მდებარეობის მიხედვითაც. მიუხედავად იმისა, რომ გუდაური საკმაოდ პატარაა, სათხილამურო ტრასებთან ან/და სტრატეგიულ ობიექტებთან სიახლოვე უდაოდ დიდი პლუსია. გუდაურში გასაქირავებელი ბინების ჩამონათვალიც ასევე შეგიძლიათ ss.ge-ს განცხადებებში დაათვალიეროთ.  რაც შეეხება უძრავი ქონების მფლობელობაში გადმოტანას გუდაურში, house.ge-ს პარტნიორი კომპანიები აქაც გვთავაზობენ დასრულებულ პროექტებს და შეგიძლიათ თქვენთვის სასურველი მათგანი შეარჩიოთ.

სვანეთი

სვანეთის სათხილამურო ტრასები ერთერთი ყველაზე პოპულარული და მაღალი დონისაა, ჰაწვალის და თეთნულდის სათხილამურო ზონას უამრავი უცხოელი ტურისტი სტუმრობს. სათხილამურო ტრასა „თეთნულდი“ კავკასიაში ყველაზე გრძელია. ადგილობრივებისთვის დედაქალაქიდან სვანეთში მოხვედრა ზამთარში გარკვეულ სირთულეებთან არის დაკავშირებული, თუმცა დამსვენებლების რაოდენობით თუ ვიმსჯელებთ, შეუძლებელიც არ არის და ამ სირთულეების გადალახვა ნამდვილად ღირს. ფრენები სრულდება ნატახტარის აეროპორტიდან მესტიის მიმართულებით, თუმცა ზამთარში უამინდობის გამო ხშირად იცვლება მათი განრიგი და წინასწარ დაგეგმილი მგზავრობის თარიღების ცვლილება სრულიად მოსალოდნელია. სხვა შემთხვევაში, შესაძლებელია ავტომობილით წასვლა ან მიკროავტობუსით თბილისი-ზუგდიდი და ზუგდიდი-მესტიის მიმართულებით. ზუგდიდამდე, ასევე, შეგიძლიათ მატარებლითაც ისარგებლოთ. საჰაერო ტრანსპორტის შემთხვევაში 50 წუთს მოანდომებთ, ხოლო სახმელეთო გზით 9 საათზე მეტი დაგჭირდებათ თბილისიდან მესტიაში ჩასასვლელად. რაც შეეხება დასარჩენს, მესტიაში მისი  ქირაობა საშუალოდ 200 ლარი დაგიჯდებათ, სურვილის შემთხვევაში განცხადებების ნახვაც შეგიძლიათ ss.ge-ზე. მესტიაში დასარჩენი ობიექტები ძირითადად საოჯახო სასტუმროები ან კლასიკური სასტუმროებია.