როგორ მოვუაროთ სახლში ავეჯს?

სახლში სისუფთავის შენარჩუნება ძალიან მნიშვნელოვანია ბაქტერიების თავიდან აცილების, ინტერიერის იერსახის შენარჩუნებისა და სხვა მრავალი მიზეზების გამო. სხვადასხვა ავეჯს განსხვავებული ზედაპირი აქვს, რომლებიც იმის მიხედვით განსხვავდება, თუ რომელი უხდება საერთო ინტერიერს, რომელია მარტივი მოსავლელი ან კომფორტული, თუმცა ფაქტია, რომ ყველა ტიპის ზედაპირი ერთნაირად არ იწმინდება და ინდივიდუალური მიდგომა სჭირდება.

ხის ავეჯი

ხის მასალა ერთერთი ყველაზე ძვირადღირებულია და ის გამოირჩევა სიჯანსაღითა და მდიდრული იერით, ასევე, მისი გამძლეობის გათვალისწინებით ის ერთერთი ყველაზე მოთხოვნადი მასალაც არის. ხისგან მზადდება მაგიდები, კარადები, საწოლები და სხვადასხვა ავეჯის დეტალები, სადაც ხე შესაძლოა დამხმარე ელემენტის როლს ასრულებდეს. ხის ავეჯის მფლობელებმა უნდა იზრუნონ, რომ რაც შეიძლება ნაკლებად მოხვდეს მას მზე და წყალი, რადგან სწორედ ეს ორი აფუჭებს ხეს. მზის სხივების პირდაპირი და ხანგრძლივი ზემოქმედება ხის ავეჯს ფერს უცვლის და იერსახეს აკარგვინებს, წყალი კი ხის დამახასიათებელ ფორებში შთაინთქმება და აზიანებს მას. ხის ავეჯის ზედაპირული წმენდა შესაძლებელია ბამბის ქსოვილის დახმარებით, ღრმულების ამოსაწმენდად გამოიყენეთ რბილი ჯაგრისები, ხოლო ზოგადი იერსახის შესანარჩუნებლად - არ დატოვოთ ხის მასალა დაუმუშავებელი. რეკომენდებულია, რომ ის დაამუშაოთ ლაქით ან ცვილით. ეს უკანასკნელი დიდ ზემოქმედებას არ ახდენს ავეჯის ფერის ცვლილებაზე და ბუნებრივ იერსახეს უტოვებს მას, თუმცა ასევე უსაფრთხოების გარანტიაც არის. რაც შეეხება ლაქს, ის ნაკაწრებისგან იცავს ავეჯს. იმ შემთხვევაში, თუკი თქვენს ხის ავეჯზე ლაქები შეამჩნიეთ, ამისთვის გირჩევთ, რომ რბილი ბამბის ქსოვილი დაასველოთ ზეითუნის ზეთისა და თეთრი ძმრის თანაბარ პროპორციაში და ზედმეტი დაწოლის გარეშე, მსუბუქი წრიული მოძრაობით გაწმინდოთ.

პრიალა ზედაპირები

პრიალა ზედაპირები ძირითადად სამზარეულოში გვხვდება, მისი დადებითი მხარე იმაში მდგომარეობს, რომ შუქს ირეკლავს და სივრცეს უფრო დიდს და ნათელს აჩენს. ასევე მარტივი გასაწმენდი და იოლად მოსავლელია, მდგრადია დაზიანებების მიმართ, თითქმის ყველაფრის მოცილება შესაძლებელია წყალში დასველებული ქსოვილის დახმარებით. ასევე, არსებობს სპეციალური სითხეები და საშუალებები, რომლებიც პრიალა ზედაპირებიდან ნაკაწრებსაც კი აშორებს. იმ შემთხვევაში, თუკი ცხელი ჭურჭლის გამო დაზიანდა ზედაპირი და ლაქა დარჩა, შეგიძლიათ სპირტისა და ზეთის ნაზავში დასველებული ქსოვილით ნაზად გაწმინდოთ.

რბილი ავეჯი

რბილი ავეჯის მოვლა ერთერთი საკვანძოა ბინაში, სტუმრების მისაღებად დივანი არამარტო ვიზუალურად უნდა გამოიყურებოდეს მუდმივად ახალივით, არამედ კომფორტულიც უნდა იყოს. რბილი ავეჯი მარტივად იღებს ისეთი ტიპის მტვერს, რაც მყარი ზედაპირის შემთხვევაში ქსოვილის ერთი მოსმით  შეიძლება გაიწმინდოს, რბილ ავეჯზე კი უფრო სიღრმისეული ჩარევა გახდეს საჭირო. მაგალითად, თუ სახლში ცხოველი გყავთ, ჩათვალეთ, რომ ეს შრომა გაგიასმაგდებათ, რადგან მისი ბეწვი საკმაოდ მყარად ჩაჯდება რბილი ავეჯის ქსოვილებში. ასეთ დროს ყველაზე მარტივი, თუმცა არა სიღრმისეული წმენდის შემცვლელი ხრიკი არის ბეწვის მოცილება წებოვანი ლენტის დახმარებით. გარდა ოთხფეხა მეგობრების მიერ გამოწვეული პრობემებისა, შესაძლოა გაუთვალისწინებლად მოხვდეს ზედაპირზე სხვადასხვა საჭმლისა თუ სასმლის ნარჩენები და ლაქებად დააჩნდეს დივანსა თუ სავარძელს. ერთერთი მარტივი გამოსავალი იქნებოდა მისი დაცვა გადასაფარებლის დახმარებით, თუმცა თუ ვიზუალის წარმოჩენაა თვენთვის პრიორიტეტული და მისი დაფარვა რეცხვადი გადასაფარებლით არ გსურთ, ლაქების ამომყვანი სითხეები თქვენს განუყრელ მეგობრებად უნდა აქციოთ. ზედაპირი მთლიანად უნდა დაინამოს პირველ ეტაპზე, დამუშავდეს ჯაგრისით და ასე მოშორდეს ჭუჭყი, ხოლო შემდეგ წყლით განეიტრალდეს. მშრალი მტვერის აღება ასევე მტვერსასრუტით არის შესაძლებელი. სიღრმისეული წმენდა კი ქიმწმენდის დახმარებით შეგიძლიათ.