საკითხავი მშობლებისთვის: რითი დავაკავოთ შვილები ზაფხულში?

ზაფხულის პერიოდი ბავშვებისთვის არდადეგებთან და შესაბამისად, დასვენებასა და გართობასთან ასოცირდება. სკოლის დასრულების შემდეგ ნანატრი თავისუფლების შეგრძნებით მიაშურებენ ხოლმე სოფლებსა თუ კურორტებს და მეცადინეობისგან ისვენებენ. სექტემბერში სასწავლო პროცესის რუტინასთან დაბრუნება კი რთულდება და როცა ბავშვები კალაპოტიდან ამოვარდებიან, ძნელია მათი კვლავ რეჟიმში ჩასმა.

სასწავლო წლის დაწყება რომ ძალიან არ გაურთულდეთ ბავშვებს, პერიოდულად ზაფხულის განმავლობაშიც უმჯობესია, რომ გონებრივი სავარჯიშოებით დავაკავოთ. მთელი წლის მანძილზე მეცადინეობისგან დაღლილებს, ხშირად, წიგნებისგან დასვენება და თამაში სჭირდებათ, თუმცა თამაშთან ერთად განმავითარებელი აქტივობების დაგეგმვაც სრულიად შესაძლებელია. ზაფხულში მეცადინეობის ტრადიციულმა ფორმამ შესაძლოა ბავშვებს გული აუცრუოს სასწავლო პროცესზე და ნეგატიურად განაწყოს. ამიტომ, დიდი მნიშვნელობა აქვს, თუ როგორ მივაწოდებთ შვილებს საზაფხულო აქტივობების განხორციელების აუცილებლობას.

Ø  დაგეგმეთ ოჯახური აქტივობები: ზაფხულის განმავლობაში, დიდი შანსია შვებულებების დახმარებით ბავშვებთან მეტი დრო გაატაროთ. არდადეგებზე სასკოლო საგნების მეცადინეობის ნაცვლად, ხშირად დაგეგმეთ ოჯახური აქტივობები, რაც ბავშვს სოციალიზაციაში დაეხმარება და ურთიერთობების ჩამოყალიბებასა და როლების გადანაწილებაში პრაქტიკას მისცემს. მაგალითად, ერთად დაგეგმეთ ქალაქგარეთ გასვლის პროცესი, ჰკითხეთ მას აზრი, მიეცით დავალებები და აუხსენით ყველა საჭიროების მიზანი და შინაარსი, რათა შემდგომში ლოგიკური გადაწყვეტილებების მიღების უნარი ჩამოუყალიბდეს. ასწავლეთ პრაქტიკული რაღაცები, მაგალითად მარტივი საუზმის ან დესერტის მომზადება, ველოსიპედის ელემენტარული ნაწილის შეკეთება და სხვა ისეთი აქტივობები, რაც ცხოვრებაში გამოადგებათ, დროსაც გაიყვანენ და შედეგსაც თვალნათლივ დაინახავენ. ასეა თუ ისე, მსგავსი აქტივობები მათ ფიზიკურად დააკავებთ და მშობლებთან თუ ოჯახის სხვა წევრებთან სოციალიზაციაში დაეხმარებათ.

Ø  მიაწოდეთ ინფორმაცია და აუმაღლეთ ზოგადი ცოდნა: მნიშვნელოვანია, რომ ზაფხულის პერიოდი ნაყოფიერად გამოიყენოთ კლასგარეშე ცოდნების მიღებისთვისაც. მაგალითად, შეიმუშავეთ რუტინა, რომლის მიხედვითაც ყოველდღიურად ან დღეგამოშვებით თითო საინტერესო ფაქტის შესახებ მოუყვებით ისტორიიდან, ტექნოლოგიური სიახლეებიდან თუ სპორტიდან. ამით იზრუნებთ მისი ზოგადი ცოდნის ამაღლებაზე და დამახსოვრების უნარზე. ურჩიეთ, ან ერთად უყურეთ დოკუმენტურ ფილმებსა და შემეცნებით გადაცემებს. მაქსიმალურად შეზღუდეთ ურთიერთობა გაჯეტებთან და კომპიუტერი გამოიყენეთ მიზნობრივად, საინტერესო ინფორმაციის მოძიებისა და ინტელექტის ასამაღლებლად. თუ გსურთ, რომ ბავშვი იყოს ბედნიერი და მენტალურად ჯანმრთელი, შეზღუდეთ ეკრანთან გატარების დრო მაქსიმალურად და მიეცით ბავშვს საშუალება, რომ ცოცხალი ურთიერთობებით დაკავდეს. მიეცით ინტერნეტისთვის ლიმიტირებული დრო და ამ მხრივაც უსაფრთხოების ზომები მიიღეთ, თუ რა კონტენტს გაეცნობა ბავშვი.

Ø  მოიძიეთ საზაფხულო ბანაკი: მიეცით ბავშვს შესაძლებლობა, რომ ენერგია დახარჯოს თანატოლებთან, გაიფართოვოს სანაცნობო წრე, გაიჩინოს ახალი მეგობრები და მიიღოს ახალი გამოცდილებები. ბანაკში ყოფნისას ბავშვი ეჩვევა დამოუკიდებლობას, ცვლის ინფორმაციას თანატოლებთან და იძენს ახალ ინტერესებს, ეჩვევა დისციპლინასაც. ბავშვის ასაკიდან გამომდინარე, შეგიძლიათ არჩევანი გააკეთოთ ადგილობრივ და ქვეყნის გარე ბანაკებზე. ეს უკანასკნელი ბავშვს კიდევ უფრო გაუზრდის თვალსაწიერს, მრავალეროვან და მულტიკულტურულ გარემოში ყოფნა კი მისცემს უდიდეს გამოცდილებას.

Ø  თავად შეარჩევინეთ წიგნები: წიგნის კითხვისთვის, შესაძლოა ბავშვებმა დიდი დროის დათმობა არ ისურვონ, რადგან სკოლაში ისედაც წიგნებთან აქვთ ურთიერთობა და დასვენება სურთ, თუმცა მხატვრული ლიტერატურით მათი დაინტერესება ჟანრების მიხედვით შეიძლება. არ დააძალოთ კონკრეტული წიგნის წაკითხვა, მოკლედ უთხარით რამდენიმე მათგანის შინაარსის შესახებ და მიეცით საშუალება, თავად ამოირჩიოს. მაგალითად, დღესდღეობით, გამომცემლობები გვანებივრებენ ეკრანიზაციებით, სპეციალურად თინეიჯერებისთვის შექმნილი სერიებით და ა.შ. მიეცით ბავშვებს მაგალითიც, იკითხეთ წიგნები თავადაც და შვილებს როგორც რუტინა, ისე დაუსახეთ დღიურ გეგმად გარკვეული რაოდენობის გვერდების მინიმუმი, რასაც დღეში წაიკითხავენ.

ზაფხულის დასვენების პერიოდი ბევრი ახალი რამის სწავლის საშუალებასაც იძლევა. თუკი სკოლაში სიარულის დროს გაკვეთილებისა და სამეცადინო მასალის გამო ბავშვები სხვადასხვა აქტივობებით დაკავებას ვერ ახერხებენ, ზაფხული საუკეთესო პერიოდია სურვილების რეალიზებისათვის.