რა დოკუმენტებია საჭირო უძრავი ქონების ყიდვა-გაყიდვისათვის?

უძრავი ქონების ყიდვა-გაყიდვის დროს ორი მხარე თანხმდება, რომ ქონების მესაკუთრე მეორე ადამიანი ხდება, რასაც აუცილებლად სჭირდება დოკუმენტური მტკიცებულებები და მხოლოდ თანხის გადახდით არ სრულდება პროცესი. იურიდიულად გამართული დოკუმენტაციის მიხედვით, საჯარო რეესტრში უნდა აისახოს ახალი მესაკუთრის ვინაობა.

თუკი ბინის ან მიწის ნაკვეთის ყიდვას გადაწყვეტთ, პირველ რიგში, შეამოწმეთ ხომ არ არის უძრავი ქონება იპოთეკით დატვირთული ან/და ხომ არ ადევს ყადაღა. უმჯობესია, თუკი გადამოწმებისა და შემდგომ უკვე გადაფორმების პროცესს გაივლით იურისტთან ერთად, სპეციალისტი დაგეხმარებათ, რომ სწრაფად გაიაროთ ყველა საჭირო პროცედურა და თავიდან აიცილოთ ზედმეტი ხარჯები ან/და პრობლემები. იურისტი ასევე დაგეხმარებათ რისკების გაანალიზებასა და ქონების გადაფორმების ტექნიკურ საკითხებში.

შეძენამდე აუცილებელია, რომ დარწმუნდეთ, ნამდვილად შეესაბამება თუ არა საჯარო რეესტრში მითითებული ინფორმაცია იმას, რასაც რეალობაში ხედავთ. მაგალითად, სახლისა თუ ნაკვეთის ფართობისა და მფლობელის შესახებ ინფორმაცია, რისი გადამოწმებაც შეგიძლიათ ქონების საკადასტრო კოდის მეშვეობით. პირი, ვისგანაც ყიდულობთ უძრავ ქონებას, აუცილებლად უნდა იყოს ამ ქონების მფლობელი ან ჰქონდეს მფლობელისგან მინდობილობა ქონების განკარგვაზე, რომელიც ნოტარიულად დამოწმებული იქნება. მესაკუთრის ვინაობა სწორედ საჯარო რეესტრის ამონაწერის მიხედვით დგინდება.

მიწის ნაკვეთის ყიდვის შემთხვევაშიც, აუცილებელია მსგავსი პროცედურის გავლა და ამასთან, იმის იდენტიფიცირება, არსებობს თუ არა ნებართვა, რომ ნაკვეთზე მშენებლობა წამოიწყოთ და თუ არსებობს, ხომ არ აქვს შეზღუდვა, მაქსიმუმ რამდენი კვადრატული შენობა-ნაგებობის აშენებაა ნებადართული.

ყიდვის პროცესში ასევე, აუცილებელია, რომ გაფორმდეს შესაბამისი ხელშეკრულება, რომელიც ასევე იურისტის ჩართულობით მომზადდება და დარეგისტრირდება შესაბამის სარეგისტრაციო ორგანოში.

ზემოთ მოცემული ინფორმაცია და პროცედურები ისეთ შემთხვევაშია ყურადსაღები, როდესაც ფიზიკური პირისგან ყიდულობთ უძრავ ქონებას. იმ შემთხვევაში კი, თუ ქონებას მშენებარე კომპლექსში შეიძენთ, გასათვალისწინებელია, რომ ხელმისაწვდომი იყოს კანონის მიხედვით არსებული დოკუმენტაციის ნუსხა, რომელიც სამშენებლო კომპანიას უნდა ჰქონდეს. ასეთი დოკუმენტებია მიწის ნაკვეთის გეოლოგიური დასკვნა, სადაც მშენებლობა მიმდინარეობს, მიწის ფლობის დამადასტურებელი დოკუმენტები/ამონაწერი, აუცილებლად სთხოვეთ შესაბამის თანამშრომელს შეხვედრა და თქვენს იურისტთან ერთად აღნიშნული დოკუმენტაციის გავლა, სანამ უშუალოდ თანხის გადახდას დაიწყებთ.

ნებისმიერ შემთხვევაში, უძღავ ქონებას შეიძენთ ფიზიკური პირისგან თუ კომპანიისგან, საჭიროა პროცედურების დაცვა და იურიდიული პირის კონსულტაცია, რათა შემდგომ მოულოდნელი უსიამოვნო ოსურპრიზები თავიდან აიცილოთ.