როგორ ავხსნათ კარიერული წყვეტა რეზიუმეში?

გასაუბრების პროცესში აუცილებლად მოისმენთ რეკრუტერისგან, რომ თქვენი სამუშაო გამოცდილების შესახებ მეტი ინფორმაციის მიღება სურს და ჩაუღრმავდება მიზეზებს, თუ რატომ წყვეტდით თანამშრომლობას კონკრეტულ დამსაქმებლებთან და რას აკეთებდით იმ პერიოდში, ვიდრე ახალ ორგანიზაციაში გადახვიდოდით სამუშაოდ. მოგიწევთ დამაჯერებლად და ნათლად ახსნათ ის ფაქტორები და მიზეზები, თუ როგორ მიმდინარეობდა ერთიდან მეორე კომპანიაში გადასვლის პროცესი და აუცილებლად ახსენოთ კარიერული წყვეტების მიზეზებიც, ასეთის არსებობის შემთხვევაში. ვიდრე რეკრუტერისგან მოისმენთ შეკითხვას იმ პერიოდის თაობაზე, როცა სამუშაოთი დაკავებული არ ყოფილხართ, უფრო უპრიანი და მომგებიანია, თუკი თქვენ თავად წამოიწყებთ საუბარს თქვენი კარიერული წყვეტის მიზეზებზე. არსებობს 5 გავრცელებული მიზეზი, რის გამოც ყველაზე ხშირია დასაქმებულის პაუზა თავის კარიერულ გზაზე.

1)    შვილები და სახლის საქმეები

თუკი სამსახურისთვის თავის დანებება ბავშვების აღზრდისა და სახლის საქმეების მიხედვის გამო მოგიწიათ, აუცილებლად ახსენეთ, როგორ იყენებდით ამ დროს სხვადასხვა უნარების გასაუმჯობესებლად, ცოდნისა თუ გამოცდილების დასაგროვებლად, რაც შემდგომი სამუშაოს დაწყებისთვის დაგეხმარებოდათ. მაგალითად, ბავშვების სასკოლო თუ ბაღის ცხოვრებაში იმდენად იყავით ჩართული, რომ ხშირად გამოთქვამდით მოხალისეობის სურვილს, ჩართული იყავით ღონისძიებების ორგანიზებასა და ფანდრაიზინგში. კარგად გაიხსენეთ, იქნებ სწორედ ის მშობელი იყავით, რომელიც სპორტული გუნდის აქტივობებისთვის მოგზაურობას გეგმავდა? მთელი ეს საქმიანობები შესაძლოა მომავალი დამსაქმებლის ენაზე ისე გადაითარგმნოს, როგორც ვაკანსიისთვის შესაბამისი უნარების ქონა. მაგალითად, რადგან ფანდრაიზინგი ვახსენეთ, თუკი ეხმაურებით ისეთ ვაკანსიას, რომლის მთავარი მოთხოვნა ფონდების მოძიებაა, შეგიძლიათ ინტერვიუერს უთხრათ, რომ მიუხედავად იმისა, რომ ბავშვების აღზრდით იყავით დაკავებული და ძირითად დროს სახლში ატარებდით, ამავდროულად აქტიურად იყავით ჩართული მათი პროგრამებისა თუ ღონისძიებების დაგეგმვაში, ფონდების მოძებასა და ფინანსური საკითხების მოგვარებაში, რაც დაგეხმარათ იმაში, რომ სამუშაო ფორმიდან არ ამოვარდნილიყავით.

2)    ავადმყოფი ოჯახის წევრის მოვლა

თუკი დროის გამოთავისუფლება იმისთვის დაგჭირდათ, რომ ის მშობლისთვის ან ოჯახის წევრისთვის დაგეთმოთ მისთვის მნიშვნელოვან მომენტში და მის ჯანმრთელობაზე გეზრუნათ, აუცილებლად მიიღებდით გამოცდილებას სამედიცინო დაწესებულებთან, ჯანდაცვის ორგანიზაციებთან და დაზღვევასთან ურთიერთობით. უნდა აღინიშნოს, რომ ოჯახის წევრის მოვლის გამო კარიერული პაუზა მეორე ყველაზე გავრცელებული მიზეზია ბავშვების მოვლის შემდეგ.

თუკი მომხმარებელთან ურთიერთობის სფეროში  გსურთ დასაქმება, აუცილებლად აღნიშნეთ გასაუბრებაზე, რომ გარდა მათზე ზრუნვისა, ჯანდაცვის პროვაიდერებთან მათ წარმომადგენლობასაც ითავსებდით, რაც დაგეხმარათ როგორც ეფექტური კომუნიკაციის ჩამოყალიბებაში ორგანიზაციებთან, ისე ორგანიზაციული უნარების დახვეწაში ფინანსური, სადაზღვევო და იურიდიული სფეროს წარმომადგენლებთან კოორდინირებული ურთიერთობისას. ამ ყველაფრის გათვალისწინებით კი პრობლემის გადაჭრაზე ორიენტირებული და სტრესულ სიტუაციაში მშვიდი ხართ.

3)    ხანგრძლივი მოგზაურობა

მესამე გავრცელებული მიზეზი - მოგზაურობაა. კორპორატიულ, სრულ განაკვეთიანი სამუშაო კულტურაში დაბრუნება ხანგრძლივი მოგზაურობისა და აღმოჩენების შემდეგ ნამდვილად გაგიხსნით ახალ პერსპექტივებს. მაგალითად, თუკი მულტიკულტურულ/ საერთაშორისო ორგანიზაციაში აპირებთ დასაქმებას, შეგიძლიათ გასაუბრებაზე სხვადასხვა კულტურული ნიუანსები მიმოიხილოთ, ინტერაქციაში შეხვიდეთ სხვადასხვა ეროვნების ადამიანებთან, გაუზიაროთ თქვენი გამოცდილებები და მოისმინოთ - მათი. თუკი იმდენად ბევრი იმოგზაურეთ, რომ რჩევების გაზიარება შეგიძლიათ სხვებისთვის, ეს უნარი აუცილებლად უნდა გამოიყენოთ სამოგზაურო/ტურიზმის ინდუსტრიაში მგზავრობის ექსპერტად, დაუგეგმოთ სამოგზაურო ტურები ადამიანებს და მოამზადოთ თუ რა მოლოდინები უნდა ჰქონდეთ ამა თუ იმ ქვეყნისგან. ასევე, თუკი მოგზაურობის დროს რამდენიმე ენაც შეისწავლეთ, ნამდვილად მოთხოვნადი კანდიდატი იქნებით, როგორც პოლიგლოტი.

4)    სწავლის გაგრძელება

ზოგჯერ ისეც ხდება, რომ ადამიანები ზრდასრულ ასაკში აგრძელებენ სწავლას ახალი ხარისხის მოსაპოვებლად ან ახალი დისციპლინის შესასწავლად. თუკი თქვენი კარიერული პაუზა სწორედ სასწავლო პროცესს უკავშირდება, თამამად შეგიძლიათ აღნიშნოთ გასაუბრებაზე, თუ რა ახალი ცოდნები და გამოცდილებები შეიძინეთ სწავლის პროცესში, რა კვლევები ჩაატარეთ, როგორ და რამდენ პროექტზე იმუშავეთ ინდივიდუალურად და ჯგუფურად.

გარდა იმისა, რომ სწავლა ცოდნას გვაძლევს, ახალ ნაცნობებსაც გვძენს თანაკურსელებისა და ლექტორ-მასწავლებლების სახით. ნეთვორქინგი კი ნამდვილად ეხმარება ადამიანებს ნაბიჯების წინ გადადგმაში. სწავლის პროცესში მიღებული ცოდნა და გამოცდილება, დახვეწილი უნარები და შესაძლებლობები შეგიძლიათ თამამად აღნიშნოთ რეზიუმეში და  განავრცოთ გასაუბრების პროცესში.

5)    შრომითი ურთიერთობის შეწყვეტა

შრომითი ურთიერთობის შეწყვეტა დამსაქმებლის მხრიდან არც თუ ისე იშვიათ შემთხვევებში ხდება. რეორგანიზაციისა თუ სხვადასხვა ცვლილებების გამო, რაც შესაძლოა უკავშირდებოდეს როგორც ფინანსურ პრობლემებს, ისე კომპანიის შიდა პოლიტიკის რადიკალურ ცვლილებას. შემცირებაში მოყოლა შესაძლოა ახალ პოტენციურ დამსაქმებელთან სულაც არ წარმოადგინოთ დრამატულად და პირიქით, ამაში დანახული ბენეფიტებიც კი ჩამოუთვალოთ. მაგალითად, რომ არა თქვენი კომფორტის ზონის თუნდაც იძულებით დატოვება, ვერ წარდგებოდით ახალი გამოწვევების წინაშე და შესაბამისად ვერ მიიღებდით ახალ გამოცდილებებს.

ყოველთვის აღნიშნეთ რა ისწავლეთ ახალი თქვენი სამსახურიდან, რა გამოცდილება დააგროვეთ და რა ცოდნები წამოიღეთ. ნეგატიური გამოცდილება კი აუცილებლად გასწავლით, თუ რა ტიპის შეცდომები აღარ უნდა გაიმეოროთ და მსგავს სიტუაციაში უფრო ეფექტური ნაბიჯები როგორ გადადგათ.

იმ შემთხვევაში, თუკი ტოქსიკურ სამუშაო გარემოში იმყოფებოდით და თქვენი ინიციატივით სწორედ ამ მიზეზის გამო დატოვეთ სამუშაო ადგილი, არ წამოიღოთ ეს ნეგატივი ახალ სამუშაო გარემოში. მხოლოდ პოზიტიურ პერსპექტივებზე ისაუბრეთ და მიღებული გამოცდილების შესახებ გაუზიარეთ ინტერვიუერს.