5 კლასიკური არქიტექტურული სტილი საქართველოს პატარა ქალაქებისთვის

665

10.10.2023 14:47:51

საქართველოში მშენებლობის ბუმი თავდაპირველად თბილისში დაიწყო, მოგვიანებით ქვეყნის ერთ-ერთ სტრატეგიულ მიმართულებად ტურიზმი გამოცხადდა და სამშენებლო ბიზნესმაც აქტიურად დაიწყო ახალი ნიადაგის ათვისება. სტიქიური განაშენიანება მოედო პატარა საკურორტო ქალაქებს და ბიზნესმა ბევრი ისტორიული ძეგლი თუ რეკრეაციული ზონა შთანთქა.

თბილისის შემდეგ პირველი ქალაქი ბათუმი იყო, რომლითაც სამშენებლო ბიზნესი დაინტერესდა და ის წლების განმავლობაში აქტიურად ვითარდებოდა. აღმშენებლობის დიდი ნაკადი ჯერ კიდევ 2004 წელს დაიწყო და მალევე გაიხსნა ტურისტებისთვის მიმზიდველი დიდი გასართობი ცენტრები, აშენდა სასტუმროები და განვითარდა სარესტორნო ბიზნესი, რაც ვიზიტორებს იზიდავს ევროპისა და, აზიის ქვეყნებიდან. მაგრამ სამწუხაროდ, საჯარო სივრცე ზედმეტად შეიზღუდა და დაირღვა ურბანული ბალანსი, რამაც ბათუმი მოუხერხებელ ქალაქად აქცია.

თუმცა ყველაზე მეტად პატარა დასახლებები დაზარალდა, სადაც აუთვისებელ ტერიტორიაზე უგემოვნო, ლანდშაფტთან თუ სხვა შენობებთან მიმართებაში სრულიად შეუსაბამო შენობები გაჩნდა. სულ მალე ქობულეთი ურეკი თუ შეკვეთილი ეკლექტიკამ მოიცვა და მათთვის დამახასიათებელი იერსახე მთლიანად წაართვა.

თანამედროვე დასახლებები წარმოუდგენელია აუცილებელი ინფრასტრუქტურის, ტროტუარების, გზაზე გადასასვლელებისა თუ კეთილმოწყობილი მოსაცდელების გარეშე, თუმცა აქ, დაბებსა თუ რაიონულ ცენტრებში ხშირად უმცირეს წესრიგსაც ვერ იპოვი, არ არის მუნიციპალური ტრანსპორტი და ყველაფერი ქაოსის კანონებით იმართება.

ამ ბლოგში გაიცნობ 5 დღემდე აქტუალურ კლასიკურ არქიტექტურულ სტილს, რომლებიც იდეალურია საქართველოს პატარა საკურორტო ქალაქებისთვის. ასევე, რასაკვირველია, შესაძლებელია მათი ეროვნული არქიტექტურული ელემენტებით გამდიდრება და თანამედროვე სტანდარტებით აღჭურვა, როგორებიც არის ეკომეგობრული მასალის გამოყენება და მწვანე სივრცეების შექმნა, თუ თანასწორი გარემოსთვის აუცილებელი პანდუსების მოწყობა და სხვა დეტალები.

კონტემპორარი

კონტემპორარი, როგორც ინტერიერის დიზაინის სტილი უკვე განვიხილეთ, თუმცა ყველაზე თანამედროვე დიზაინის სტილი არქიტექტურაშიც აქტუალურია, რამდენადაც სწორედ ის ასახავს დღევანდელობას.

ბოლო ათწლეულის განმავლობაში, კონტემპორარი წამყვანი სტილი გახდა როგორც არქიტექტურაში, ასევე ინტერიერის დიზაინში. ის იყენებს თანამედროვე სამშენებლო მასალებს, როგორიცაა ფოლადი და ბეტონი, ხოლო ექსტერიერში იგრძნობა სწორი ხაზები, ასევე ხშირია მორთული ზედაპირები. კონტემპორარის სახლის სტილში შერწყმულია ინოვაციური ტექნოლოგიები წარსულის ერთგულებასთან. აქ უხვადაა მარტივი ფორმები და გეომეტრიული ხაზები, რომელსაც რბილი ტექსტურები და დეკორატიული ორნამენტები ერწყმის.

მდგრადობა, ხშირად ერთ-ერთი ყველაზე მახასიათებელია კონტემპორარის სტილში აშენებული სახლებისთვის, რაც მწვანე ელემენტებს მოიცავს, როგორიცაა მზის პანელები, წვიმის წყლის შეგროვება და გეოთერმული გათბობა. ის პასუხებს გამოწვევებს, რომლებიც კლიმატის კრიზისს უკავშირდება. ეს არის სტილი, სადაც ეკოლოგიურობა, რესურსების გონივრული გამოყენება და ადამიანის კეთილდღეობის საკითხები დიზაინის ნაწილია და შემდგომი პერიოდის საზრუნავი.

ვიქტორიანული სტილი

წარსულის კიდევ ერთი შესანიშნავი საჩუქარი ვიქტორიანული სტილია, რომლის ელემენტებიც ხშირად აქტიურად გამოიყენება თანამედროვე სახლების დიზაინში. ის მეცხრამეტე საუკუნის ბოლოს გაჩნდა, შემდეგ კი სწრაფად გავრცელდა ბრიტანეთის ფარგლებს გარეთაც. განსაკუთრებული პოპულარობა აშშ-სა და ავსტრალიაში მოიპოვა, ასევე გავრცელებული იყო ინდოეთშიც.

ვიქტორიანული სტილის სახლებისთვის დამახასიათებელია:

● შენობის რთული, ასიმეტრიული ფორმა;

● მრავალდონიანი სახურავი, ხშირად სხვენით;

● სხვადასხვა ისტორიული ეპოქის ელემენტების კომბინაცია;

● არქიტექტურული დეტალებისა და დეკორატიული ელემენტების სიჭარბე;

● ფერადი ფასადები,

● ფასადზე ხის ჩუქურთმების სიმრავლე.

ხმელთაშუა ზღვის სტილი

ბევრ ქალაქში, ხშირად ახალი შენობები ისტორიული სტილებით არის შთაგონებული, რომელიც ასევე აერთიანებს ინოვაციურ დეტალებს და საუკეთესო შემთხვევაში ადგილობრივი კონტექსტს ითვალისწინებს. ერთ-ერთი გამორჩეული სტილი არქიტექტურაში ხმელთაშუაზღვისაა, ანუ მედიტერანიული სტილი.

ხმელთაშუა ზღვის სტილის არქიტექტურა კლასიკური, მარადიული ტრადიციაა, რომელიც აერთიანებს პროპორციისა და დიზაინის ელემენტებს. მისი ფერადი და ტექსტურირებული ფასადი, ჭრელი მოაჯირები და გამორჩეული ხვეული ხაზები მას ელეგანტურ იერს აძლევს . ხმელთაშუა ზღვის სტილის სახლები ასევე ფოკუსირებულია ბუნებრივ შუქზე, დიდი ზომის ფანჯრებითა და წინა კარით, ღია სივრცეებით, რომლებიც კარგად ნიავდება.

სტილი ხმელთაშუა ზღვის აუზში ჩამოყალიბდა და ძლიერი იყო რომის იმპერიის ესთეტიკის გავლენა. მან ასევე აითვისა სანაპიროზე მდებარე ევროპისა და აფრიკის პროვინციული რეგიონების ეროვნული მახასიათებლები.

იტალიანატე

იტალიანატე, რომელიც ასევე მე-19 საუკუნეში ჩამოყალიბდა ძალიან პოპულარული გახდა აშშ-ში, სადაც მან ვიქტორიანული სტილის მკაცრი ხაზები ჩაანაცვლა და ამერიკელებს თავი იტალიური რომანტიკულობით შეაყვარა. შუასაუკუნეების იტალიური ვილებითა და ფერმის სახლებით შთაგონებული, იტალიური სახლის სტილი, როგორც წესი განიერი ფასადებითა და ჩუქურთმების განსაკუთრებული სიჭარბით გამოირჩევა.

აქ მაღალი, ვიწრო ფანჯრებია, დიდი ვერანდები და სახურავის ქვეშ გულმოდგინედ მოჩუქურთმებული კრონშტეინები. აშშ-ში მშენებლები ცდილობდნენ იტალიური რენესანსის ვილები ვიქტორიანული არქიტექტურის უკვე არსებულ ბაზაზე აღედგინათ, ადგილობრივი, უკვე ნაცნობი მასალების გამოყენებით. შედეგად, სწორედ აშშ-ში მიიღო იტალიურმა სტილმა უდიდესი აღიარება.

ესპანური კოლონიალური სტილი

ესეც ამერიკისთვის დამახასიათებელი სტილია. დასავლეთ სანაპიროზე, ერთ-ერთი ყველაზე ცნობადი სახლის სტილი, განსაკუთრებით კალიფორნიაში - ესპანური კოლონიური სტილია. ესპანეთის მისიების არქიტექტურით შთაგონებული, ამ ტიპის სახლები დიდი ეზოებით, მყარი თეთრი კედლებით, ბილიკებით და რუსტიკული წითელი კრამიტის სახურავებით გამოირჩევა.

ესპანური კოლონიალური შენობების გეგმარება განსაკუთრებულ ყურადღებას აქცევს გარე სივრცეების გამოწვევებს, როგორიცაა ეზოები, აივნები, ვერანდები თუ ფანჩატურები. ისინი დაცულია წვიმისა და მზისგან და თანაბრად კომფორტულად გამოსაყენებელია მთელი წლის განმავლობაში.

თითოეული ჩამოთვლილი არქიტექტურული სტილი შესანიშნავად ერგება საქართველოს კლიმატურ ზონებს. ასევე, სურვილი შემთხვევაში შესაძლებელია რამდენიმე სტილის გემოვნებით შერწყმა და ადგილობრივი შტრიხებით გამდიდრება.