როგორ შევამოწმოთ დეველოპერული კომპანია ბინის ყიდვამდე?

დღესდღეობით მიმდინარე თუ დაგეგმილი მშენებლობების უპრეცედენტო რაოდენობიდან გამომდინარე, ბაზარზე გამოჩნდა ახალი დეველოპერული კომპანიები, მათი რაოდეობა მზარდია და შესაბამისად მაღალი კონკურენციის პირობებში, ყველა სამშენებლო კომპანია კონკურენტულ პირობებს სთავაზობს მომხმარებელს, რათა მოიზიდონ ისინი.

ბინის მაძიებლებმა კარგად უნდა მოიკვლიოთ დეველოპერული კომპანიის საქმიანობა მანამ, სანამ მათთან თანამშრომლობას გადაწყვეტთ და გაითვალისწინოთ რიგი საკითხები, რაც მოგცემთ საშუალებას, რომ თქვენი მომავალი სახლი კონკრეტულ მათგანს ჩააბაროთ. შესაძლოა, მათი პირობები იმდენად მომხობვლელი აღმოჩნდეს თქვენთვის, რომ სრულიად გადაგავიწყდეთ დეტალებში ჩაძიება და საბოლოოდ ყველაფერი ისე არ აღმოჩნდეს, როგორც ზედაპირზე ჩანდა. იქიდან გამომდინარე, რომ არაერთი სამშენებლო კომპანიის მაგალითი ვიცით, რომლის მიერ მოტყუებული მომხმარებლები დღემდე საკუთარი ბინის გარეშე არიან, აუცილებელია, რომ კარგად ჩავიხედოთ კანონში, დეტალურად გავერკვიოთ პირობებში და საკუთარი უფლებები და ინტერესები დავიცვათ.

პირველ რიგში, თვალი გადაავლეთ დეველოპერული კომპანიის უკვე დასრულებულ პროექტებს, თუ რომელიმე მათგანში თქვენი ნაცნობი ცხოვრობს, შეამოწმეთ ხარისხი, ჰკითხეთ  შთაბეჭდილებები, ასევე მოიკვლიეთ საქმიანი ურთიერთობის დროს რამდენად დროულად აბრუნებდა კომპანიის წარმომადგენელი უკუკავშირს და ზოგადად, რამდენად მარტივი და ხელმისაწვდომი იყო მათთან კომუნიკაცია, რადგან მშენებლობის დროს კომუნიკაციის შესაძლებლობას უდიდესი მნიშვნელობა აქვს. ჰკითხეთ უკვე მათ პროექტში მცხოვრებლებს, რაიმე ტიპის ხარვეზი თუ შეხვდათ ჩაბარებულ ბინაში და რამდენად სერიოზული აღმოჩნდა ეს ხარვეზი, თუკი რაიმე ასპექტში თქვენ გაქვთ პრიორიტეტები ან მოთხოვნები, დააზუსტეთ, რამდენადაა გათვალისწინებული მათ პროექტებში ეს დეტალები.

გაიკითხეთ და მოიკითხეთ სამშენებლო კომპანიის რეპუტაცია ზოგადად, არამხოლოდ თქვენს ნაცნობებში, რომებიც ზემოთ ვახსენეთ, არამედ ზოგადად მოიკვლიეთ როგორი რეპუტაციით სარგებლობს ბაზარზე ესა თუ ის სამშენებლო კომპანია, აქვს თუ არა ან ჰქონია თუ არა სასამართლო დავები მაგალითად, მათი პროექტები ჯდება თუ არა წინასწარ შეპირებულ ვადებში, მნიშვნელოვანი ვადაგადაცილების ან პირობების დარღვევის ფაქტი ხომ არ ჰქონიათ და ა.შ.

გაეცანით ზოგადად მათ გამოცდილებას, რამდენი ხანია რაც ოპერირებენ ბაზარზე, რა დროში რამდენი პროექტი აქვთ დასრულებული, რამდენად პროფესიონალი პირებისგან ჰყავთ გუნდი დაკომპლექტებული, გაესაუბრეთ კომპანიის წარმომადგენელს წინასწარ, დაუსვით რაც შეიძლება მეტი კითხვა და სთხოვეთ ამომწურავი პასუხები სამშენებლო მასალების ხარისხთან დაკავშირებითაც კი.

დეველოპერული კომპანიის შერჩევისას ასევე შეადარეთ კომპანიების მიერ შემოთავაზებული დამატებითი ბენეფიტები და ფასები, მაგალითად სამშენებლო კომპლექსის შემთხვევაში საკუთარი რეკრეაციული ზონა, დახურული ან ღია პარკინგი, კომპლექსის დაცვა, ლიფტისა და სადარბაზოს მომსახურების ოფცია და ა.შ. რომელ კომპანიაში რა დაგიჯდებათ. ზოგ შემთხვევაში, შესაძლოა მოულოდნელად და საეჭვოდ დაბალი ფასი იყოს განსაზღვრული, რაც რა თქმა უდნა კითხვებს გააჩენს ხარისხთან დაკავშირებით, ზოგჯერ კი უცერემონიოდ გაბერილ ფასს წააწყდეთ. შეარჩიეთ ნეიტრალური და ადეკვატური ფასები დამატებითი ბენეფიტების გათვალისწინებით.

იკითხეთ და მოიკვლიეთ თუ ვინ არიან კომპანიების ფინანსური პარტნიორები, რადგან ფინანსური მდგრადობა ერთერთი გადამწყვეტი ფაქტორია დეველოპერული კომპანიის შეუფერხებელი მუშაობისთვის. გადაამოწმეთ რამდენად მწყობრში აქვთ იურიდიული დოკუმენტაციაც, რათა შემდგომში არ შეიქმნას პრობლემები კორპუსის ექსპლუატაციაში შესვლასთან ან ნებართვებთან დაკავშირებით.

გირჩევდით, რომ თუკი პირველად გაქვთ შეხება დეველოპერულ კომპანიასთან და თქვენთვის მსგავსი საკითხები ნაცნობი არ არის, პროფესიონალთან ერთად გაიაროთ ყველა ის ნაბიჯი, რომელიც სამშენებლო კომპანიის საბოლოოდ შერჩევამდე გაქვთ გასავლელი.