როგორ შევქმნათ ეფექტური პორტფოლიო?

ეფექტური პორტფოლიოს შექმნა ძალიან მნიშვნელოვანია ყველა დიზაინერისთვის, რადგან ის მხოლოდ დათვალიერების მიზნით არ კეთდება, მისი დახმარებით მეტი პოტენციური დამკვეთი დაინტერესდება და შესაბამისად, თქვენი შეკვეთების გაზრდის პროპორციულად, შემოსავალსაც გაგიზრდით.

პორტფოლიოს შესაქმნელად გარდა პლატფორმის არჩევისა და ტექნიკური დეტალების ცოდნისა, მნიშვნელოვანი ასპექტია ვიზუალური მხარე. თქვენი პორტფოლიო უნდა იყოს თქვენ მიერ შერჩეულ დიზაინს მორგებული, ეცადეთ რომ ნამუშევრები თემატურად დაალაგოთ და საერთო ვიზუალი ძალიან გემოვნებიანი იყოს დამთვალიერებლისთვის. ტექნიკურ და ვიზუალურ ნაწილებზე რამდენიმე რჩევას გაგიზიარებთ.

შეარჩიეთ პლატფორმა თქვენი პორტფოლიოსთვის

დამსაქმებლებს, როგორც წესი, ურჩევნიათ თქვენი ნამუშევრები ნახონ ერთიანად, რომ შეაფასონ რამდენად შეძლებთ მოერგოთ მათ დაკვეთას, შეხედონ თქვენს სტილს და ხელწერას. ამისთვის როდესაც ვაკანსიას გამოეხმაურებით, რეზიუმეს გარდა, სასურველი და აუცილებელიცაა, რომ გაუგზავნოთ თქვენი პორტფოლიო, რომელიც რომელიმე პლატფორმაზე იქნება განთავსებული. მაგალითად დღესდღეობით ყველაზე პოპულარულ პლატფორმებად დიზაინერებისთვის ითვლება Behance, Dribbble, Flickr, Pinterest. არის როგორც უფასო, ისე ფასიანი ვერსიები, სადაც შეგიძლიათ ააწყოთ თქვენი პორტფოლიო. პირველ რიგში, გაიარეთ რეგისტრაცია, შექმენით თქვენი ანგარიში, შეარჩიეთ ვიზუალი, მიუთითეთ მცირე ინფორმაცია თქვენი და თქვენი გამოცდილების შესახებ. ზოგიერთი პლატფორმა მხოლოდ დათვალიერების ფუნქციონალითაა, ზოგს კი აქვს შესაძლებლობა თქვენს ნამუშევრებზე უკუკავშირი დატოვოს დამთვალიერებელმა ან/და შემოგივიდეთ შემოთავაზებები პირდაპირ პლატფორმაზე.

გაამარტივეთ თქვენი ნამუშევრების მოძებნის პროცესი

იმისთვის, რომ თქვენი ნამუშევრები ადვილად იპოვონ ინტერნეტში, დაარქვით მათ სახელები, დაურთეთ აღწერა და თეგები. თუ პორტფოლიოს პირველად ქმნით, სასურველია კონსულტაცია გაიაროთ SEO სპეციალისტთან, ან თავად გაიაროთ SEO-ს კურსი. აქციეთ პორტფოლიო თქვენს ბრენდად, დაურთეთ ნამუშევრებს ინფორმაცია დამკვეთის შესახებ, კლიენტების რეკომენდაციებიც. გარდა ამისა, შეგიძლიათ საბოლოო ნამუშევრის მიღმა, მისი შექმნის პროცესიც გამოაქვეყნოთ და დამთვალიერებელს მისცეთ საშუალება, ნახოს როგორ იქმნებოდა ნამუშევარი საბოლოო პროდუქტის მიღებამდე.

შეიმუშავეთ სტილი

ნამუშევრები დაალაგეთ თემატურად, არ დატოვოთ ქაოტური დიზაინის შთაბეჭდილება, თუმცა ეცადეთ, რომ არც მოსაწყენად იყოს ერთნაირ ფერებში გადაწყვეტილი ნამუშევრები ერთმანეთის მიყოლებით. შეეცადეთ, რომ საინტერესო გამოსავალი იპოვოთ და კრეატიულად მიუდგეთ მათი განთავსების პროცესს. დაათვალიერეთ ყველაზე ლამაზი და პოპულარული პროფაილები და დააკვირდით, რა ხდის მათ გამორჩეულს. არ მოიპაროთ სხვისი დიზაინი, თუმცა აიღეთ მაგალითები სხვებისგან და გაიზიარეთ მათი გამოცდილებები. არ დაგავიწყდეთ თქვეი პორტფოლიოების გაზიარება სოციალურ ქსელებშიც, როდესაც ახალ ნამუშევარს დაამატებთ. ამით გაზრდით თქვენი ვიზიტორების რაოდენობას და ასევე ინფორმატიულიც იქნება, რომ არ ჩერდებით და აქტიურად მუშაობთ ახალ ნამუშევრებზე, შეკვეთებისა თუ სამოყვარულო დონეზე.