როგორ უნდა შეადგინოთ სრულყოფილი ვაკანსია

• ზუსტი სათაური

ვაკანსიის სათაური პირველია, რაც დასაქმების მსურველს თვალში ხვდება. ამიტომ, სათაური უნდა იყოს ზუსტი და კონკრეტულად ასახელებდეს იმ სამუშაო პოზიციას, რომელზეც კომპანია ახალ კადრს ეძებს. გაითვალისწინე, რომ სწორედ ვაკანსიის სათაური განსაზღვრავს, დასაქმების მსურველი სრულ ტექსტს წაიკითხავს თუ უბრალოდ გვერდს აუვლის.

• სამუშაოს აღწერა და მოვალეობები

"ზუსტად რისი გაკეთება მომიწევს?" — პირველი კითხვა, რომელიც დასაქმების მსურველს უჩნდება. ამიტომ, სრულყოფილი ვაკანსიის ტექსტი დეტალურად უნდა აღწერდეს რას გულისხმობს ამ პოზიციაზე მუშაობა და რა ვალდებულებების შესრულებას მოიცავს. 

• სამუშაო პირობები 

კიდევ ერთი ფაქტორი, რომელიც დასაქმების მსურველის გადაწყვეტილებაზე დიდ გავლენას ახდენს, სამუშაო პირობებია. ამიტომ, ეს პუნქტიც სრულყოფილად უნდა იყოს აღწერილი შემდეგი ინფორმაციით: 

1. ლოკაცია;

2. სამუშაო ტიპი (ოფისიდან, ჰიბრიდული, დისტანციური);

3. სამუშაო გრაფიკი;

4. ანაზღაურება (კონკრეტული ან სახელფასო დიაპაზონი) 

5. ზეგანაკვეთური საათები (როგორ ანაზღაურდება: დროით, თანხით და ა.შ.);

6. საბონუსე სისტემა (როგორ მუშაობს: თვიური, წლიური და ა.შ.).

• მოთხოვნები

დასაქმების მსურველი სწორედ მოთხოვნებიდან გამომდინარე ხვდება, რამდენად შეესაბამება მისი გამოცდილება და უნარები მოცემულ ვაკანსიას. ამიტომ, ამ პუნქტის აღწერისას არ უნდა გამოტოვო არც აუცილებელი და არც დამატებითი/სასურველი მოთხოვნები. 

• ბენეფიტები

ბენეფიტებზე ხაზგასმით დასაქმების მსურველისთვის კომპანია უფრო მიმზიდველი შეგიძლია გახადო. ცალკე პუნქტად იმის აღწერა, თუ რა დამატებით სარგებელს (სამედიცინო დაზღვევა, კორპორაციული შეღავათები და ა.შ.) სთავაზობთ დასაქმებულებს, პოტენციური კადრის გადაწყვეტილებაზე დადებით გავლენას იქონიებს.

• ინფორმაცია დამსაქმებლის შესახებ

ვაკანსიაში კომპანიის მოკლე აღწერა და მისი მკითხველისთვის გაცნობა მნიშვნელოვანი ინფორმაციაა, რომელიც არ უნდა გამოგრჩეს. დასაქმების მსურველი სწორედ ასე იგებს ვინ აცხადებს ვაკანსიას, როგორია კომპანიის სამუშაო ეთიკა, ღირებულებები და სხვა, რაც სასურველი კადრის პოვნაში კიდევ უფრო დაგეხმარება.

• ვაკანსიის დედლაინები

ვაკანსიის ტექსტში აუცილებელია იმის მითითება, თუ რა დრომდეა შესაძლებელი CV-ის გამოგზავნა, რათა დასაქმების მსურველს დედლაინი არ გამორჩეს. ასევე, იმ ინფორმაციის მითითება, თუ კონკრეტულად რომელ რიცხვამდე დაუკავშირდებით დაინტერესების შემთხვევაში, პოტენციურ კადრს დაარწმუნებს, რომ კომპანია მის დროს აფასებს.