4 გავრცელებული შეცდომა რემონტის დაგეგმვისას — რა უნდა გაითვალისწინო

2226

14.04.2025 23:01:02

რემონტის დაწყება ერთდროულად სასიხარულო და შრომატევადი პროცესია. ერთი მხრივ, შანსი გეძლევა, რომ საცხოვრებელი სივრცე მთლიანად შენს გემოვნებაზე მოაწყო, მეორე მხრივ კი რემონტის დაგეგმვას არაერთი გამოწვევა ახლავს თან. ხშირად პატარა დეტალები, რომლებიც თავიდან უმნიშვნელოდ გვეჩვენება, საბოლოო შედეგზე დიდ გავლენას ახდენს. იმისთვის, რომ შედეგად კომფორტული, ფუნქციური და სასიამოვნო ვიზუალის მქონე ინტერიერი მიიღო, რემონტის დაგეგმვისას შემდეგი შეცდომები არ უნდა დაუშვა:

ზედმეტად მკვეთრი განათება დასასვენებელ სივრცეში

ოთახის იმ ნაწილში, სადაც დივანი, სკამები ან სხვა ტიპის დასასვენებელი სივრცეა მოწყობილი, მკვეთრი განათების დამონტაჟება ერთ-ერთი გავრცელებული შეცდომაა. დასასვენებელ ზონაში პირდაპირ ზემოდან მომავალი მკვეთრი განათება იწვევს თვალების დაძაბვას, თავის ტკივილს და შესაძლებელია დროდადრო ჩაძინებაც უფრო გაგიჭირდეს. ასევე, მკვეთრი განათების ქვეშ ხშირად ყოფნამ კანის დაზიანებებიც შეიძლება გამოიწვიოს, ხოლო ვინც განათების მიმართ სენსიტიურია, მაღალ შუქზე მეტი გაღიზიანება და სტრესი შეიძლება განიცადოს.

დასასვენებელ სივრცეში რბილი განათების დამონტაჟებაა რეკომენდებული. ასევე, ეცადე, რომ განათებას სხვადასხვა წყარო ჰქონდეს, როგორც გვერდებიდან, ისე ოთახის კუთხეებიდან, რათა კომფორტული და მყუდრო ატმოსფერო შეიქმნას.

მხოლოდ ერთი ცენტრალური ნათურა

ოთახის ცენტრში ჩამოკიდებული ერთი ნათურა განათების კუთხით მარტივ გადაწყვეტილებას ჰგავს, რეალურად კი მხოლოდ ეს ერთი დეტალი არაეფექტურ შედეგებს იძლევა. ცენტრალური ნათურა ვერ უზრუნველყოფს ოთახის სრულფასოვან განათებას: ვერ სწვდება ყველა კუთხეს, ჩნდება ჩრდილები, ხელს გვიშლის ყოველდღიურ საქმიანობაში (მაგალითად, კითხვა, მუშაობა და ა.შ.).

უმჯობესია, რემონტის დაწყებისთანავე მრავალდონიანი განათება დაგეგმო —
ჭერზე, კედლებზე, იატაკზე. ასე ოთახი უფრო ნათელი გახდება და იმასაც შეძლებ, რომ განათება საჭიროებების მიხედვით კონკრეტულ ნაწილში გამოიყენო.

ელექტრობის დაგეგმვა ავეჯის განლაგებამდე

თუ ჯერ არ იცი, სად განთავსდება საწოლი, დივანი, სამუშაო მაგიდა ან თუნდაც ტელევიზორი, ვერც იმას განსაზღვრავ, თუ სად უნდა განთავსდეს შუქის ჩამრთველი ან დენცქვიტა. თუ ავეჯის განლაგება წინასწარ არ გაქვს წარმოდგენილი, დიდი შანსია, ჩამრთველები, დენცქვიტა, განათება და ელექტრობასთან დაკავშირებული სხვა დეტალები უფუნქციო აღმოჩნდეს. მაგალითად, დენქცვიტა კარადის ან დივნის უკან შეიძლება მოექცეს და დასრულებულ კედელზე ახლის გაყვანა დაგჭირდეს, რაც ზედმეტ ხარჯსაც ქმნის.

ამიტომ, ჯერ გაიაზრე სად განთავსდება ავეჯი და რომელ ადგილას დაგჭირდება განათება, დამტენი და ა.შ. მხოლოდ ამის შემდეგ უნდა დაიწყო ელექტრობის დაგეგმვა, რათა ყველა დეტალი შენს საჭიროებებს მოარგო.

მუქი და დეკორით გადატვირთული კედლები

ინტერიერში მუქი ფერის გამოყენება სივრცეს მეტ დახვეწილობას მატებს, მაგრამ ზომიერების შენარჩუნება აუცილებელია. ერთი კედლის ხის ან სხვა მასალით გაფორმება ინტერიერს ვიზუალურად უფრო მიმზიდველს ხდის, თუმცა ამ ფაქტორმა შეცდომაში არ უნდა შეგიყვანოს. თუ ოთახში ორი ან მეტი კედელი ერთდროულად მუქ ტონებშია გადაწყვეტილი ან გადატვირთულია დეკორით, სივრცე გაცილებით ბნელი ხდება, კარგავს სოლიდურობას და თვალისთვისაც დამღლელია.

შეცდომის თავიდან არიდება ბალანსის დაცვით შეგიძლია — მუქი ტონებისა და გამოკვეთილი დეკორის როლი დახვეწილი ვიზუალის შექმნაა, ამიტომ დომინანტ ელემენტებად არ უნდა აქციო. თუ ერთი კედლის დეკორით გაფორმებას გადაწყვეტ, გახსოვდეს, რომ დანარჩენ სივრცეში ნათელი ფერები უნდა იყოს წამყვანი, რათა ინტერიერში კომფორტი და ესთეტიკა ერთდროულად შეინარჩუნო.