რა უნდა გაითვალისწინოთ, თუ ბარისტას პროფესიის შესწავლას გეგმავთ - რჩევები Julius Meinl-ის ბარისტასგან

ყავის მომზადება ნამდვილ ხელოვნებად იქცა, რაც  მომხმარებლის მოთხოვნებმა და ჰორეკა სექტორის სწრაფად განვითარებამ განაპირობა. ამ პროცესში კი ბარისტა სერვისის ერთ-ერთი წამყვანი პოზიცია გახდა. ეს არის პროფესია, რომელიც მოითხოვს საქმის სიღრმისეულად ცოდნას, მუდმივ განვითარებას, ენთუზიაზმს და რაც მთავარია, მოტივაციასა და ხალისს, სტუმრებს ყოველთვის საუკეთესო შესთავაზო. იმისათვის, რომ იყო წარმატებული, უნდა ფლობდე ცოდნას, თუმცა ამავდროულად უნდა გიყვარდეს ყავა და ადამიანები.  Julius Meinl-ის პროფესიონალმა ბარისტებმა თენგიზ ოზმანოვმა და ერეკლე ჯანდიერმა ყავის ინდუსტრიაში თავიანთი თავები სწორედ სხვა ადამიანებისთვის დადებითი ემოციების გაზიარების სურვილით აღმოაჩინეს.  

ერეკლე ჯანდიერი/Julius Meinl

 „ბარისტობა არის პროფესია, სადაც ჩემი ენერგია, პოზიტივი და ემოცია პირდაპირ გადადის ადამიანებზე და ეს შეიძლება იყოს ყოველდღიური სიხარულისა და შემოქმედების წყარო. თითოეული ფინჯანი ჩემთვის არა მხოლოდ სამუშაო, არამედ შესაძლებლობაა, გავაკეთო განსაკუთრებული ყავა და ადამიანს სითბო გავუზიარო“ , - ერეკლე ჯანდიერი.

Julius Meinl-ის ბარიტა, ერეკლე ჯანდიერი გვიზიარებს დეტალებს, რა უნდა ვიცოდეთ, თუ ბარისტას პროფესიის შესწავლას გადავწყვეტთ, რა შესაძლებლობები არსებობს ამისთვის საქართველოში, როგორ უნდა ჩამოვყალიბდეთ საერთაშორისო დონის სპეციალისტად და როგორ უნდა გამოვიყენოთ ჩვენი ცოდნა პრაქტიკაში:

• როგორ და რა წყაროების დახმარებით შეისწავლეთ ბარისტას პროფესია? რამ შეასრულა გადამწყვეტი როლი ამ პროცესში?

პირველ რიგში, მინდა შევეხო „იულიუს მაინლის“ ტრენინგ ცენტრს, რომელიც როგორც დამწყებ, ასევე გამოცდილ ბარისტებს ცოდნის გაღრმავებისა და ახალ ეტაპზე გადასვლის საშუალებას აძლევს. ჩემი გამოცდილება კი დაიწყო ნულიდან, თავდაპირველად ყველაფრის სწავლას თავად ვცდილობდი, სოციალურ ქსელებში ვეძებდი, ვუყურებდი როგორ მზადდებოდა ყავა სწორად და ვეუფლებოდი ტექნიკას. რამდენიმე თვის წინ კი გავიარე SCA-ის (Specialty Coffee Association) საერთაშორისო ტრენინგი ავსტრიაში და ორგანიზაციის მიერ აკრედიტირებული ტრენერებისგან მივიღე უდიდესი ცოდნა. 

• როგორ და საიდან უნდა დაიწყოს სწავლა დამწყებმა ბარისტამ? 

დამწყებ ბარისტას ვურჩევდი, ეტაპობრივად მიიღოს ცოდნა, ეს ყველაზე ეფექტური მეთოდია. 

პირველ რიგში, მნიშვნელოვანია ყავის ტიპების, მარცვლის წარმოშობისა და ძირითადი მომზადების ტექნიკების საფუძვლების შესწავლა, ტრენინგების გავლა. 

ამ გზით დამწყები ბარისტა სწავლობს არა მხოლოდ ყავის სწორად მომზადებას, არამედ გემოს ამოცნობას, ტექნიკის დახვეწასა და კვალიფიკაციის კიდევ უფრო ამაღლებას. ამის შემდეგ შეიძლება პრაქტიკული გამოცდილების მიღება კაფეებში, ექსპერიმენტების ჩატარება სხვაასხვა მეთოდით და რაც მთავარია, მუდმივი თვითგანვითარება.  

• რა უნარები დაგეხმარათ პროფესიონალად ჩამოყალიბებაში? 

პროფესიონალად ჩამოყალიბებაში მნიშვნელოვანი როლი შეასრულა ჩემი საქმის სიყვარულმა და ინტერესმა. როდესაც გიპყრობს რამე, ბუნებრივად გინდა მთელი ძალისხმევა და ენერგია მის განვითარებას მოახმარო. გარდა ამისა, დამეხმარა დეტალებზე დაკვირვება, ახალი ტექნიკების, არომატებისა და მომზადების მეთოდების შესახებ ცოდნის მიღება. 

თენგიზ ოზმანოვი/Julius Meinl

• თენგიზ, რამდენად მნიშვნელოვანია ისეთი პროფესიონალების ატმოსფეროში მოხვდე, რომლებიც მუდმივად სიახლეების ძიებაში არიან და ცდილობენ, მაქსიმალურად გაგიზიარონ დაგროვილი ცოდნა და გამოცდილება? 

ნამდვილად მნიშვნელოვანია. ეს გარემო არა მხოლოდ ცოდნის შევსებას უწყობს ხელს, არამედ ემოციურად და მენტალურადაც გაძლიერებს. საკმაოდ დიდი დრო და ძალისხმევა დამჭირდა ჩემი თავის განსავითარებლად, რადგან დიდი ნაწილი იმისა, რაც ჩემს გამოცდილებას ეხება, თავად მივიღე. თუმცა, როდესაც გვერდით პროფესიონალი ადამიანი გყავს, ის არა მხოლოდ თეორიულად, არამედ პრაქტიკულადაც გეხმარება. 

როცა ხედავ, როგორ ხარჯავს სხვა ადამიანი დროს და ძალისხმევას, როგორ ეძებს სიახლეებს, მით უფრო მეტად გიჩნდება სურვილი,  თავადაც განვითარდე და არ ჩამორჩე მას. ასეთ გარემოში მოხვედრა დიდი სტიმულია და ხშირად მენტორთან ან უბრალოდ გამოცდილ კოლეგასთან ურთიერთობა იქცევა მოტივაციისა და ახალი ენერგიის წყაროდ. 

• რამდენად მნიშვნელოვანია, ბარისტა ყავის მომზადების პროცესს შემოქმედებითად უდგებოდეს? 

დღეს ბარისტას პროფესია ნამდვილად  ხელოვნების დონემდეა აყვანილი. თუ საერთაშორისო დონეზეც შევხედავთ, უკვე დიდი ხანია აღიარებულია და ერთგვარ შემოქმედებად იქცა.  საქართველოშიც ყოველწლიურად ვხედავთ მნიშვნელოვან პროგრესს, ახალ ტალღასა და განვითარებულ მიდგომებს. 

ამ ყველაფერს განაპირობებს რამდენიმე მნიშვნელოვანი ფაქტორი: ერთი მხრივ, მომხმარებელი გახდა უფრო მომთხოვნი, ადამიანებმა დაიწყეს უკეთესი ხარისხის, უფრო დახვეწილი და განსხვავებული გემოს მქონე ყავის მოთხოვნა.  მეორეს მხრივ, დიდი წვლილი სწორედ ყავის ენთუზიასტებსა და ბარისტებს მიუძღვით, რომლებიც ცდილობენ არა მხოლოდ იდეალურობის მიღწევას, არამედ ახალი, უნიკალური და განსხვავებული პროდუქტის შექმნას. 

ბარისტა უბრალოდ სიტყვა არ არის. ეს არის პროფესია, რომელიც მოითხოვს ცოდნას, სიღრმისეულ მიდგომას, ტექნიკურ უნარებს, გემოს ანალიზს, პროცესების გააზრებას და შემოქმედებით აზროვნებას. 

• როგორ უნდა იმუშაოს ბარისტამ საკუთარ თავზე, რომ არ ჩამორჩეს დასაქმების ბაზრის მოთხოვნებს და თანხვედრაში იყოს მასთან?

ბარისტა, რომ არ ჩამორჩეს ბაზარს, მუდმივად უნდა იმუშაოს თვითგანვითარებაზე: სწავლობდეს ახალ ტექნიკებს, იცნობდეს სხვადასხვა რეგიონის ყავას და გადამუშავების სპეციფიკას, ავითარებდეს გემოს ამოცნობის უნარს, მონაწილეობდეს ტრენინგებში და აქტიურად აკვირდებოდეს მსოფლიო ტენდენციებს. ასევე მნიშვნელოვანია სტუმართან სწორად კომუნიკაცია და პროფესიული პასუხისმგებლობა. სწორედ ეს ეხმარება ბარისტას, იყოს თანამედროვე სტანდარტებთან შესაბამისობაში და კონკურენტული დასაქმების ბაზარზე. 

• რა უნდა გაითვალისწინოს ბარისტამ დამსაქმებლის შერჩევისას, რათა გააგრძელოს განვითარება და სრულად გამოავლინოს თავისი პოტენციალი? 

ბარისტამ დამსაქმებლის შერჩევისას უნდა გაითვალისწინოს, აქვს თუ არა კაფეს განვითარებაზე ორიენტირებული გარემო, სწავლების, ტრენინგების და ახალი ტექნიკების დაუფლების შესაძლებლობა. მნიშვნელოვანია, რომ ობიექტი იყენებდეს ხარისხიან მარცვალსა და თანამედროვე აღჭურვილობას, აფასებდეს პროფესიონალიზმს. 

სამუშაო ადგილის შერჩევისას ბარისტამ ასევე უნდა შეაფასოს სამუშაო კულტურა, არის თუ არა ადგილზე გუნდური დამოკიდებულება და სივრცე ინიციატივებისა და შემოქმედებითი მიდგომისთვის.  ასეთი გარემო ბარისტას აძლევს შანსს, სრულად გამოავლინოს თავისი უნარები და კარიერულად განვითარდეს. 

• 3 მთავარი რჩევა მათ, ვინც ახლა იწყებს ამ პროფესიაში საკუთარი თავის აღმოჩენას.

ეს საქმე მხოლოდ ტექნიკა და რეცეპტები არ არის. ეს არის ყოველდღიური ზრდა, ადამიანებთან ურთიერთობა და საკუთარი სტილის პოვნა. ჩემმა სამსახურმა მომცა შესაძლებლობა, მუდმივად აღმომეჩინა ახალი არომატები, შემესწავლა ახალი მეთოდები, მემუშავა გუნდურად და სტუმრისთვის შემექმნა იმგვარი გამოცდილება, რომელსაც არასდროს დაივიწყებს. ყველაზე დიდი სიხარულია, როცა გესმის, რომ შენი გაკეთებული ერთი ყავა ადამიანს ემოციურადაც კი ახსენდება.

რაც შეეხება რჩევებს: 

1. ისწავლე და არ შეგრცხვეს კითხვების დასმა - რაც მეტი ტექნიკა, გემო და დეტალი იცი, მით უფრო მარტივად ჩამოიყალიბებ საკუთარ სტილს; 

2. მოერიდე ავტომატიზებულ პროცესს - ყოველი ფინჯანი ახალი შესაძლებლობაა, სტუმრის მოთხოვნა კი მონოტონური არასდროს არ არის;

3. იყავი მომთმენი და მეგობრული - ბარისტობაში იმდენად მნიშვნელოვანია ურთიერთობა და ენერგია, რამდენადაც თვითონ ყავა.

თუ მსგავსი ვაკანსიები გაინტერესებს, ეწვიე jobs.ss.ge-ის და დასაქმდი მარტივად.