ადაპტაცია, კომუნიკაცია და ემოციური ინტელექტი - 3 მთავარი უნარი, რომელსაც დღეს დამსაქმებლები ითხოვენ

სწრაფად განვითარებადი ბაზრის პირობებში იცვლება გამოწვევებიც. დამსაქმებლისთვის მხოლოდ საინტერესო რეზიუმეს წარდგენა აღარ კმარა. კიდევ უფრო მნიშვნელოვანი გახდა, დასაქმებულს ღია კომუნიკაციის, მოქნილობისა და ადაპტაციის უნარები ჰქონდეს, რათა სწორად და დროულად აუწყოს ფეხი კომპანიის სამუშაო რიტმს. 

უფრო დეტალურად, რა მთავარ უნარებს ითხოვენ დღეს დამსაქმებლები, რა უნდა გაითვალისწინოთ ახალი სამსახურის დაწყებისას და როგორ უნდა წარმოაჩინოთ თავი სამუშაო ადგილზე, HR და კარიერული კონსულტანტი; Match UP Consulting- ის დამფუძნებელი, ნატა კოტარია საუბრობს. 

ნატა კოტარიას მრავალწლიანი გამოცდილება აქვს სტარტაპ და ჰოლდინგურ კომპანიებში როგორც ადამიანური რესურსების მართვის, ასევე ბიზნესის სტრატეგიული განვითარების მხარდაჭერის მიმართულებით. 

 ამასთან, ის კარიერული კონსულტაციის მიმართულებით პროექტების მენტორი, დასაქმებისა და HR საკითხებთან დაკავშირებული საავტორო კურსებისა და ვორქშოპების ავტორია. 

• ახალი სამსახურის დაწყებისას, ძირითადი მოვალეობების გარდა, რაზე უნდა გაამახვილოს დასაქმებულმა ყურადღება პირველსავე თვეებში, რათა გუნდის სრულფასოვან წევრად იქცეს?

ახალი სამსახურის დაწყება ყველა ადამიანისთვის მნიშვნელოვანი გადაწყვეტილებაა. გარდა ძირითადი მოვალეობისა, გასაუბრების ეტაპიდანვე, ადამიანი უნდა დააკვირდეს კომპანიის კორპორაციულ კულტურას, ღირებულებებსა და გარემოს. დაკვირვებისა და ინტეგრაციისთვის მნიშვნელოვანია  პირველი 90 დღე. იმ შემთხვევაში, თუ კანდიდატისა და კომპანიის კორპორაციული კულტურა განსხვავდება მივიღებთ შეუთავსებლობას, რაც აუცილებლად გამოიწვევს სამუშაო პროცესებში დისკომფორტს. 

მეორე მნიშვნელოვანი საკითხი მოლოდინებია. გაუზიარეთ თქვენს ხელმძღვანელს თქვენი ისინი და ასევე ჰკითხეთ, რა შედეგებს ელოდება თავად თქვენგან უახლოეს 3 ან 6 თვეში. შედეგად გეცოდინებათ რაზე კონცენტრირდეთ და გაურკვევლობასაც აირიდებთ თავიდან. გუნდთან კომუნიკაციისას იყავით გახსნილი, არ დაელოდოთ სხვების ინიციატივას.

• დამწყებებს ხშირად აქვთ შიში, რომ ბევრი კითხვის დასმის შემთხვევაში, შესაძლოა, მათ კომპეტენციაში შეიტანონ ეჭვი. როგორც HR კონსულტანტი, რას ურჩევდით მათ, ვისთან, რა ფორმით და რა შემთხვევაში უნდა დასვან კითხვები? 

როგორც წესი, თანამშრომლის გუნდთან და სამუშაოსთან ადაპტაციის პროცესში,  აუცილებლად უნდა არსებობდეს მინიმუმ ერთი ადამიანი, რომელთანაც მას ნებისმიერი კითხვის დასმის საშუალება ექნება. შესაბამისად, კითხვების დასმა აუცილებელიც კია. სხვაგვარად შედეგები  ძალიან გაჭიანურდება ან  საერთოდ ვერ მივიღებთ მათ. HR პროფესიონალები მუდამ მზად ვართ კითხვებისთვის, ასევე თანამშრომელს შეუძლია მიმართოს გუნდის წევრს და უშუალო ხელმძღვანელს ნებისმიერი კითხვის, უკუკავშირისა და დისკომფორტის გაზიარებისთვის. 

როგორც წესი, ადამიანები  საერთოდ არ ეკითხებიან  ან ეკითხებიან ყველაფერს, მათ შორის, ისეთ საკითხებს, რაზე პასუხის მოძიება თავადაც შეუძლიათ. როდესაც კითხვა გაჩნდება, ჯერ ეცადეთ პასუხი მოიძიოთ თავად, შემდგომ შეგიძლიათ თავისუფლად დასვათ კითხვები. დამსაქმებლებს გვიყვარს აქტიური, ინიციატივიანი და ინტერესიანი თანამშრომლები, შესაბამისად, კითხვების დასმა ყოველთვის მნიშვნელოვან კომპონენტად აღიქმება თანამშრომლის ადაპტაციის პროცესში. 

• დასაქმებულთათვის, იქნება ეს დამწყები თუ გამოცდილი, გამოწვევაა ხოლმე კრიტიკის ან შენიშვნების კონსტრუქციულად მიღება ისე, რომ ეს პერსონალურ ჭრილში არ განიხილონ. რას ურჩევდითმათ?

კრიტიკა და შენიშვნა უმჯობესია ჩავანაცვლოთ სიტყვა უკუკავშირით, რაც ნაკლებად მტკივნეულადაც ჟღერს და უფრო სამომავლო შედეგების გაუმჯობესებისკენაა მიმართული, ვიდრე დაშვებული ხარვეზის აღსანიშნად.

მნიშვნელოვანია, უკუკავშირი მხოლოდ იმ ფაქტის აღნიშვნა არ იყოს, რომ თანამშრომელმა რაიმეს თავი სწორედ ვერ გაართვა. უკუკავშირი უნდა ემსახურებოდეს რამდენიმე მიზანს, როგორიცაა: სწორედ შესრულებული სამუშაოს წახალისება, ხარვეზების გამოვლენა და რეკომენდაციები, პრობლემის გადაჭრის ვარიანტებზე მსჯელობა და ა შ.

დასაქმებულებს კიგახსოვდეთ, ნებისმიერი უკუკავშირი დაგეხმარებათ კარიერულ ზრდაში, ეთანხმებით თუ არა მას იმ კონკრეტულ პერიოდში. ეს არის შესაძლებლობა, შეხედოთ საკითხებს განსხვავებულად, იმოქმედოთ და განვითარდეთ. 

სანამ თქვენთვის უსიამოვნო უკუკავშირზე რეაგირებას მოახდენთ, რამდენიმე წუთით დაიცადეთ, რადგან ემოციური რეაქცია უფრო სწრაფია, ვიდრე რაციონალური.  ასევე, დასვით დამაზუსტებელი კითხვები, რათა სამომავლოდ სწორედ გესმოდეთ რისი მიღება სურთ თქვენგან.

• ხშირად, რამდენიმეწლიანი მუშაობის შემდეგ, ჩნდება განცდა, რომ რუტინაში აღმოვჩნდით - რა არის პირველი ნაბიჯები ამ კრიზისის დასაძლევად? 

ასეთ სიტუაციებში არ არის აუცილებელი სამსახურის შეცვლა. ღიად ისაუბრეთ ხელმძღვანელთან ამ საკითხზე,  სთხოვეთ, პროცესის გამრავალფეროვნების მიზნით მომიჯნავე ან მსგავსი დარგის რაიმე პროექტში ჩაგრთოთ. შედეგად, ცოდნასაც შეიძენთ და განვითარდებით. 

შეახსენეთ საკუთარ თავს, რომ ეს მხოლოდ მაღალი პასუხისმგებლობის მქონე, კომპეტენტურ ადამიანებს ემართებათ. აღნიშნეთ თქვენი პატარა თუ დიდი მიღწევები. ეს თვალსაჩინოს გახდის იმ ფაქტს, რომ თქვენი დღევანდელი კომპეტენცია და პოზიცია შემთხვევითი არ არის. 

როგორც წესი, კრიზისს მხოლოდ ნეგატიურ კონტექსტში აღვიქვამთ ხოლმე, თუმცა რეალურად, ის გაცილებით უფრო გვზრდის როგორც კარიერულად, ასევე - პიროვნულად. 

• როგორ უნდა დაამყაროს თანამშრომელმა ჯანსაღი და სასარგებლო კავშირები როგორც კოლეგებთან, ასევე სხვა დეპარტამენტებთან კონსტრუქციული და ნაყოფიერი მუშაობისთვის?

გამოხატეთ გულწრფელი ინტერესი, გაეცანით კოლეგების სამუშაო სპეციფიკას, გულისყურით მოუსმინეთ მათ. სთხოვეთ დახმარება და რჩევა სხვადასხვა საკითხზე. ეს ადამიანებს თავს მნიშვნელოვნად აგრძნობინებს.

თავადაც შესთავაზეთ დახმარება, თუ ამის კომპეტენცია და მზაობა გაქვთ.  პატივისცემით მოექეცით თითოეულ თანამშრომელს, განურჩევლად პოზიციისა. გამოიყენეთ არაფორმალური შეკრების ადგილები ზოგადი კომუნიკაციებისთვის. 

• თავიანთ პროფესიაში გამოცდილ, თუმცა მაინც განვითარების ეტაპზე მყოფ პროფესიონალებს ხშირად უჩნდებათ კითხვა,  აუცილებელია თუ არა მენეჯერულ პოზიციაზე გადასვლა წინსვლისთვის? რა რჩევებს მისცემდით მათ, როგორც კარიერის დაგეგმვის კონსულტანტი? თუ მენეჯერულ პოზიციაზე გადასვლა აუცილებლობას არ წარმოადგენს,მაშინ როგორ შეიძლება განვითარდე, როგორც ვიწრო მიმართულების ექსპერტი?

სამწუხაროდ, პოზიციების დასახელებებთან დაკავშირებით საქართველოში მანკიერი პრაქტიკაა დამკვიდრებული. პოზიციების უმეტესობას აღწერის ბოლოს მენეჯერი აწერია, თუმცა ფუნქციურად ხშირად სპეციალისტის საქმიანობაა, რაც ცხადია,  არასწორ მოლოდინებს აჩენს.  როდესაც პოზიცია მენეჯერულია, დასაქმებული მინიმუმ დამოუკიდებლად უნდა მართავდეს პროცესებს, ხოლო მაქსიმუმ - გუნდს. 

კარიერა იმით არ განისაზღვრება ადამიანი გუნდს მართავს თუ არა. შესაბამისად, თუ თქვენ არ გსურთ, ადამიანების, პროცესების და გუნდის მართვა, თუმცა გსურთ განვითარება, განვითარდით თქვენი სპეციალობით, მიიღეთ მეტი ცოდნა და გამოცდილება კონკრეტულ სფეროში.
გარდა მიმდინარე სამსახურისა, შეგიძლიათ გაიაროთ ტრენინგები, კურსები, გაიღრმაოთ აკადემიური და პრაქტიკული ცოდნა, იაქტიუროთ LinkedIn-ზე, გააზიაროთ თქვენი ექსპერტული გამოცდილება და თვალი ადევნოთ სიახლეებს თქვენთვის საინტერესო სფეროში.

• როცა მენეჯმენტისგან თანამშრომელს ბევრი დავალება აქვს და ყველაფერი მოკლე დროშია მოსასწრები, როგორც უნდა აიცილოს  სტრესი და რა მეთოდით უნდა იხელმძღვანელოს  პრიორიტეტების დასალაგებლად?

თანამედროვე კორპორაციულ გარემოში სტრესი კარგ ტონად არ აღიქმება და კომპანიების გამოწვევაა, ნაკლებად შეუქმნან ასეთი სიტუაციები დასაქმებულებს. სტრესის ყველაზე დიდი წყარო ხშირად არა შეზღუდული ვადა, არამედ გაურკვევლობაა. გაესაუბრეთ მენეჯერს, დააზუსტეთ რომელი დავალებაა სასწრაფო, ხოლო რომელი ნაკლებად აქტუალური. 

პრიორიტეტების დასალაგებლად მნიშვნელოვანია, თანამშრომელი ხედავდეს მთლიან სურათს. ამასთან, გასათვალისწინებელია ე.წ დედლაინებიც. ვიწყებთ სასწრაფო დავალებებით, შემდგომ გადავდივართ შედარებით გრძელვადიანი დავალებების სტრუქტურაზე და მათ შესრულებაზე. დავალებების მართვა შეგვიძლია როგორც ე.წ  ჩექ ლისტებით, ისე სპეციალური პროგრამებით. 

• რა არის ის მთავარი შეცდომა, რომელსაც შუა რგოლის პროფესიონალები უშვებენ მაშინ, როცა ჰგონიათ, რომ განვითარებისთვის ყველაფერს აკეთებენ?

ხანდახან, როდესაც დასაქმებული ყველაფერს სწორად აკეთებს, საქმეს კარგად ასრულებს და ვითარდება, მაგრამ ეს მენეჯმენტისგან შეუმჩნეველი რჩება, შეიძლება გამოწვეული იყოს იმით, რომ არ საუბრობს თავისი შედეგების შესახებ და არ ითხოს უკუკავშირს. არამედ ელოდება, თუ როდის შეამჩნევს ხელმძღვანელი და დააფასებს მას. 

სთხოვეთ ხელმძღვანელს უკუკავშირისთვის დაგითმოთ დრო. ხელმძღვანელთან  ერთად პერიოდულობით, მაგალითად კვარტალში ერთხელ განიხილეთ შესრულებული სამუშაოს შედეგები და სამომავლო გამოწვევები, რათა უფრო შესამჩნევი გახდეს თქვენი საქმიანობა.

თუ მის აზრს გაიზიარებთ და მომავალში გაითვალისწინებთ, გარკვეული პერიოდის შემდგომ თამამად შეგიძლიათ კომუნიკაცია, იმასთან დაკავშირებით, რომ საჭირო გამოწვევებს უპასუხეთ და  ცვლილებების მოლოდინი გაქვთ.

• დაბოლოს, სამუშაო ადგილზე ადაპტაციისა და საკუთარი თავის წარმოსაჩენად, რა ყველაზე მნიშვნელოვანი უნარებია დღეს საჭირო და ასრულებს თუ არა ის გადამწყვეტ როლს წინსვლასა და განვითარებაში? 

ბაზარი სწრაფად იცვლება. ტექნიკური ცოდნა მნიშვნელოვანია, მაგრამ ეს 3 უნარი თანამედროვეობაში ვფიქრობ, ყველაზე მნიშვნელოვანია: ადაპტაცია, კომუნიკაცია და ემოციური ინტელექტი.

დასაქმების ბაზარზე, განსაკუთრებით დამწყებ პოზიციებზე ძირითადად ამ უნარებს აქცევენ ყურადღებას, რადგან ამა თუ იმ საქმიანობის დასწავლა შედარებით მარტივია.  

თუ გსურთ, რომ თანამედროვე, სწრაფად ცვალებად გარემოში კარგად წარმოაჩინოთ თავი, მნიშვნელოვანია ფოკუსირდეთ შემდეგზე.

დღეს კომპანიების სტრატეგია, ტექნოლოგიები და პროცესები სწრაფად იცვლება. აუცილებელია ცვლილებების მიმღებლობა და  ახალი ინსტრუმენტების სწრაფად დაუფლება (მაგალითად ხელოვნური ინტელექტი).

HR პროფესიონალები ვეძებთ ადამიანებს, რომლებსაც შეუძლიათ მოსმენა, ემპათია, კონსტრუქციული უკუკავშირის მიღება და გუნდურობის შექმნა. იაქტიურეთ, ნუ დაელოდებით როდის მოგცემენ დავალებას. დაინახეთ პრობლემა, შესთავაზეთ გუნდს გადაჭრის გზები და აიღეთ პასუხისმგებლობა შედეგზე.

თუ თქვენი მიზანი განვითარებაა, ჩემი მთავარი რჩევა იქნება, ინვესტირება მოახდინოთ რბილ უნარებში (ე.წ Soft Skills). იდეების გამოთქმისას იყავით თამამი, მაგრამ მოქნილი და ღია სხვების აზრის მიმართ. სწორედ ამ ბალანსის მეშვეობით გახდებით ნებისმიერი გუნდისთვის მაღალი ღირებულების მქონე პროფესიონალი. 

თუ ახლა ეძებთ სამსახურს და გსურთ, შრომის ბაზრის მოთხოვნებთან შესაბამისი რეზიუმე შექმნათ და სწორად წარმოაჩინოთ თავი გასაუბრებაზე, შესაძლებლობა გაქვთ, დაესწროთ HR პროფესიონალის, ნატა კოტარიას ვორქშოპს, სადაც დასაქმებასთან დაკავშირებით თქვენთვის ყველა საინტერესო კითხვაზე აღმოაჩენთ პასუხს.  

ვორქშოპი მოიცავს რეზიუმეს/CV-ის შექმნას, გასაუბრების იმიტაციებს, HR სპეციალისტის უკუკავშირს და სხვა მნიშვნელოვან კომპონენტებს, რაც თქვენთვის სასურველი სამსახურის მოძიებაში დაგეხმარებათ. 

Match UP Consulting-ის ორი სახის ვორქშოპი გაგიხსნით ახალ შესაძლებლობებს დასაქმების ბაზარზე. 

Jobs.ss.ge-ს მომხმარებლებს შესაძლებლობა აქვთ, აღნიშნულ ვორქშოპებზე 20%-იანი ფასდაკლებით დარეგისტრირდნენ ბმულზე. შეთავაზებით სარგებლობისთვის მიუთითეთ პრომოკოდი SS.GE.