2026 წლის ტენდენციური ფერები Pinterst-იდან - როგორ მოვარგოთ ინტერიერის დიზაინს

მინიმალისტური დეკორი, დახვეწილი შტრიხები და ნეიტრალური ფერთა გამა, რომელთა გრადაციებიც სახლში სიმშვიდესა და ჰარმონიას ქმნის - ეს 2026 წლის ინტერიერის დიზაინის ტენდენციებია, რომელშიც მთავარ როლს ფერები ასრულებს. წამყვანი ტონები კი, Pinterest-ის მიხედვით არის ღია ცისფერი, კარალიოკისფერი/ტერაკოტას ფერი, ნეფრიტისფერი და ვასაბისფერი მწვანეები და შავი ქლიავისფერი.  აღნიშნული ფერები პლატფორმის მომხმარებელთა შორის ყველაზე დიდი პოპულარობით სარგებლობს, სიაც სწორედ ამის მიხედვით არის შედგენილი.

თითოეული მათგანი გვავსებს დედამიწის ენერგიით და შთაგვაგონებს ბუნებით, რომელთან სიახლოვე ასეთი მნიშვნელოვანია სულიერი სიმშვიდისთვის. მის მიღწევაში თავისი წვლილის შეტანა იმ გარემოსაც შეუძლია, სადაც ყველაზე დიდ დროს ვატარებთ. ჩვენი სახლი სწორედ ჩვენი სულიერი მდგომარეობის ანარეკლია.

წელს დედამიწის ბუნებრივი ფერებით შთაგონებულია მოდის, ინტერიერის დიზაინისა თუ ტექნოლოგიების სფეროები, რომლებიც აქცენტს არა მხოლოდ ვიზუალზე, არამედ  ემოციებისა და განწყობის შექმნაზეც აკეთებენ. 

ინტერიერის დიზაინში 5 ტენდენციურ ფერს წელს ძირითადად ასეთი აქცენტებით შევხვდებით:

• ღია ცისფერი

ღია ცისფრის ეს ტონი ყინულით არის შთაგონებული, თუმცა სრულიად საწინააღმდეგო, თბილ განწყობას ქმნის.

წელს ის ხშირად იქნება გამოყენებული რბილი ავეჯისა და კედლებისთვის. ასევე ისეთი აქსესუარებისთვის, როგორიც ხალიჩები ან დეკორაციული ჭურჭელია.

• ნეფრიტისფერი და ვასაბისფერი მწვანეები

გასულ წელს მწვანე ტონალობებში, კულინარიაში, კოსმეტიკასა თუ დიზაინში ლიდერი ფსტა იყო, ახლა კი მას  პიტნისფერი, ნეფრიტის ქვისა და ვასაბისფერი მწვანეები ჩაანაცვლებს. 

დედამიწისფერი ტონები ინტერიერს დახვეწილ ელფერს შესძენს, შექმნის ჰარმონიასა და სიმშვიდეს, რომელიც ასე გვჭირდება სახლში. 

მწვანეს გრადაციები ხშირად შეგვხვდება დეკორის შტრიხებში, სამზარეულოებსა და სააბაზანოებში, ასევე აქსესუარებსა და ავეჯში (მაგალითად, ფარდა, სავარძელი, სამზარეულოს მაგიდა და სხვა). 

• შავი ქლიავისფერი

ერთი შეხედვით რთულია, შავი ქლიავისფერი ინტერიერის მთავარ ტონად წარმოიდგინო, თუმცა რეალურად ის განუმეორებელ და ელეგანტურ სტილს ქმნის. აღნიშნული ფერი შეიძლება კლასიკური დიზაინის მთავარ ელემენტად იქცეს, ხაზი გაუსვას თქვენს გემოვნებას და შექმნას თბილი და მყუდრო გარემო.

შავი ქლიავისფერი ძირითადად აქსესუარებისთვის იქნება აქტუალური, თუმცა ამ ტონალობაში გადაწყვეტილი კედლის დეკორი სახლს თავის ხასიათს შესძენს.

• კარალიოკისფერი/ტერაკოტას ფერი

კარალიოკისფერი და ტერაკოტას ტონები ინტერიერს მატებს სითბოს და ახალისებს მას. სწორედ ამიტომ, ნუ შეგეშინდებათ, თუ ნეიტრალურ ფერებში გადაწყვეტილ გრადაციებს ხალისიანი ფერის ავეჯით ან აქსესუარებით გამოაცოცხლებთ.