მინიმალიზმი — მარტივი, ესთეტიკური და ფუნქციური დიზაინის საიდუმლო

რა ქმნის მინიმალიზმს?

მინიმალიზმის სიმარტივემ არ მოგატყუოს, თითქოს, ამ დიზაინის შექმნა დიდ შრომას არ მოითხოვს. რაც უფრო ნაკლები დეტალია დიზაინში, თითოეული გადაწყვეტილების მიღებისას მით მეტი სიფრთხილე და დაკვირვებაა საჭირო. მინიმალისტური მიდგომა მხოლოდ აუცილებელი ელემენტების გამოყენებას გულისხმობს, იქნება ეს სინათლე, ავეჯის ფორმა, ნივთების რაოდენობა და ა.შ. უფრო დეტალურად კი მინიმალიზმის მთავარი პრინციპები შემდეგია:

ხაზებისა და ფორმების სიმარტივე

მინიმალიზმი მკაფიო, მარტივი და სუფთა ხაზებით გამოირჩევა. ეს იმას ნიშნავს, რომ ინტერიერში არ გვხდება ზედმეტი დეტალები, ჭარბი ორნამენტები ან დეკორი, რომლებიც კონკრეტულ ფუნქციას არ ასრულებს. ხშირია გეომეტრიული ფიგურების მქონე ნივთებისა თუ ავეჯის გამოყენება, რაც ვიზუალურად მარტივი აღსაქმელია;

ღია სივრცე

ოთახში ბევრი ცარიელი ადგილის დატოვება სიმშვიდისა და ჰარმონიის განცდას ქმნის. მინიმალიზმი სწორედ სივრცეს აქცევს განსაკუთრებით დიდ ყურადღებას და რაც უფრო მეტი თავისუფალი ადგილი გხვდება ოთახში, მით უფრო იზრდება ფუნქციონალურობაც. ამ მიზნის მისაღწევად საჭიროა ავეჯის მხოლოდ აუცილებელი რაოდენობა და მათი სწორი განლაგება;

ნეიტრალური ფერები 

მინიმალიზმში უმეტესად თეთრი, ნაცრისფერი და პასტელური ტონები გამოიყენება. დიზაინში ფერები ოთახის ატმოსფეროსა და ვიზუალურ აღქმას განსაზღვრავს, ნეიტრალური ფერები კი სივრცეს უფრო ნათელს, მშვიდსა და ელეგანტურს ხდის. ამასთანავე, მინიმალიზმში შავი დეტალებიც გვხვდება, რაც სივრცის აღქმას კიდევ უფრო ამძაფრებს.

ფუნქციური ავეჯი

პრაქტიკულისა და ესთეტიკურის სინთეზში ავეჯი ყველაზე დიდ როლს თამაშობს. ამ მხრივ მინიმალიზმის მიდგომა ასეთია — ნაკლები, მაგრამ მაქსიმალურად პრაქტიკული ავეჯი, რომელიც სასურველია მრავალფუნქციური იყოს. თითოეული ნივთი კარგად უნდა ერგებოდეს ინტერიერსა და სივრცეს, მაგალითად, ჩაშენებული კარადები, ფარული სათავსოები, დასაკეცი ავეჯი და ა.შ.

ბუნებრივი განათება

დიდი ფანჯრები და დღის განმავლობაში სინათლის მოძრაობა მინიმალისტურ ინტერიერში განსაკუთრებით მნიშვნელოვანია. მძიმე ფარდების ნაცვლად კი ძირითადად თეთრი ან გამჭვირვალე ფარდები გამოიყენება, რომლებიც სინათლეს არ აფერხებს და სასიამოვნო ატმოსფეროსაც ქმნის.

როგორ შევქმნა მინიმალისტური ინტერიერი?

თუ მინიმალისტური ინტერიერით დაინტერესდი და გსურს, მცირე დეტალები საკუთარ სახლში შეიტანო, ცვლილებების დაწყება ახლავე შეგიძლია. ინტერიერის შეცვლა შემდეგი ნაბიჯებით დაიწყე:

• გაასუფთავე სივრცე — მოიშორე ყველა ზედმეტი ნივთი და მხოლოდ ის დატოვე, რაც აუცილებელია;

• აირჩიე ნეიტრალური ფერები — თუ ავეჯის განახლებას ან კედლების შეღებვას გეგმავ, მშვიდი ფერები უნდა გამოიყენო;

• შეიძინე ფუნქციური ავეჯი — ასე სივრცეს უფრო ორგანიზებულად გამოიყენებ და კომფორტსაც შექმნი;

• შეინარჩუნე წესრიგი — მინიმალიზმი სისუფთავეს და ორგანიზებულობას მოითხოვს, ამიტომ ყველა ნივთს განსაზღვრული ადგილი უნდა ჰქონდეს;

• გაანათე ოთახი ბუნებრივი შუქით — შეცვალე ფარდები, გადააადგილე ავეჯი ან დაამატე სარკეები, რათა სივრცე მაქსიმალურად ნათელი გახდეს.

ასე რომ, მინიმალიზმი არა მხოლოდ ესთეტიკური არჩევანია, არამედ ცხოვრების სტილიც, რომელიც რაციონალური არჩევანის გაკეთებასა და სიმარტივეს გვასწავლის. უფრო კონკრეტულად კი, მინიმალიზმი გვეხმარება ყურადღება გავამახვილოთ მთავარზე, თავიდან ავიცილოთ ზედმეტი და ჩვენს ყოველდღიურობაში მეტი ჰარმონიულობა შემოვიტანოთ.