როდის ჯობს ბინის შეძენა - შევიძინოთ სახლი კარკასის მდგომარეობაში თუ უკვე დასრულებული პროექტი

    საქართველოში და განსაკუთრებით თბილისში, უკანასკნელი წლების მანძილზე უძრავი ქონების ფასი განუხრელად იზრდება, ხოლო, ბოლო რამდენიმე თვის განმავლობაში ნახტომისებურად მოიმატა. ფასზე მნიშვნელოვანი გავლენა იქონია სამშენებლო მასალების გაძვირებამ, რის შესახებაც წინასწარ იტყობინებოდნენ წამყვანი დეველოპერები. თუმცა, აღნიშნული მხოლოდ მშენებლობის პროცესში მყოფ პროექტებს შეეხო, ფასი კი ყველა ტიპის უძრავ ქონებაზე გაიზარდა. ფასის გაზრდის კიდევ ერთი მიზეზი, როგორც მშენებარე ასევე ძველ აშენებულბინებზე თბილისში გაზრდილი მოთხოვნა გახდა, რაც შეიძლება განპირობებული იყოს ქვეყანაში შემოსული ახალი მობინადრეებით და მათი კაპიტალით. ბაზრის მოთამაშეები პროგნოზირებენ რომ ფასის ზრდა არ შეფერხდება და უახლოეს ხანში, შეიძლება კიდევ მოიმატოს, ამიტომ თუ ჯერ კიდევ ყოყმანობთ შეიძინოთ ბინა თუ გაიაფებას დაელოდოთ, პასუხი უკვე ნათელია.

კარკასის მდგომარეობაში მყოფ უძრავ ქონებას ბევრი უპირატესობა აქვს. უპირველესი, რასაკვირველია ფინანსების დაზოგვაა. თუმცა, ასევე მნიშვნელოვანია კომფორტი. ასეთ შემთხვევაში ჩვენ ვყიდულობთ სრულიად ახალ საცხოვრებელს, რომელიც ცხოვრების თანამედროვე სტანდარტებით არის ნაკარნახევი. ბიუჯეტურ სახლებშიც კი ხშირად გვთავაზობენ მიწისქვეშა პარკინგს, დაცულ შემოსაზღვრულ ტერიტორიას, გვხვდება ასევე დაბალი განაშენიანება, შშმ პირებისთვის ადაპტირებული გარემო და სხვა მნიშვნელოვანი დეტალები, რაც ახალაშენებულ კორპუსს ძველისგან მკვეთრად განასხვავებს. კიდევ ერთი მნიშვნელოვანი უპირატესობა ძველ აშენებულთან არის მისი იურიდიული მხარე. ძველი მობინადრის დროს შეიძლება გაჩენილიყო სამართლებრივი უზუსტობები, სადავო საკითხები, მოზიარე მესაკუთრეები და სხვა ფარული პრობლემები, რომელიც შეიძლება დროულად ვერ აღმოვაჩინოთ, ახალაშენებული კორპუსის შემთხვევაში კი ასეთი დაბრკოლებებისგან დაზღვეული ვართ.

მშენებარე და ახალაშენებული ბინების დადებითი მხარეების მიუხედავად, მნიშვნელოვანია ყურადღება გამოვიჩინოთ დეველოპერული კომპანიის შერჩევისას, რათა დარწმუნებული ვიყოთ რომ ბინა დათქმულ ვადებში და შეთანხმებულ მდგომარეობაში ჩაგვბარდება. მშენებლების რეპუტაციის გარდა, ასევე საყურადღებოა უბნის სწორად შერჩევა, რამდენადაც თბილისის სხვადასხვა ნაწილში ფასი სხვადასხვა ფაქტორების ზეგავლენით მერყეობს. გარდა ამისა, უნდა განვსაზღვროთ მშენებლობის რა სტადიაზე ჯობს უძრავი ქონების შეძენა, რადგან ფასი სხვადასხვა ეტაპზე განსხვავებულია და განსხვავებულია რისკებიც.

ამისთვის განვიხილოთ მშენებლობის ეტაპები და ჩვენთვის ყველაზე ხელსაყრელი შევარჩიოთ:

• ü  მიწის ნაკვეთის მოძიება და მშენებლობისთვის სახელმწიფოსგან შეძენა;
• ü  ტერიტორიის გეოლოგიური ანალიზი, პროექტის შემუშავება, საექსპერტო დასკვნების მიღება და პროექტის შეთანხმება მუნიციპალიტეტთან;
• ü  დოკუმენტების წარდგენა სახელმწიფო ზედამხედველობის სამსახურთან და მშენებლობის ნებართვის გაფორმება;
• ü  სამშენებლო მოედნის მომზადება;
• ü  ინჟინრების ქსელის ჩართვით სახლის მშენებლობა;
• ü  ექსპლუატაციაში ჩაბარება.

• 
  
•       მშენებლობის დაწყების დროს თავისუფლად შეგვიძლია შევარჩიოთ ბინის ფართობი, სართული და მდებარეობა კორპუსში. გავითვალისწინოთ მზიანი თუ უმზეო მხარეები და ფანჯრების განლაგებაც კი. ასეთ შემთხვევაში განვსაზღვრავთ რომ ჩვენი ბინა ზედმეტად ბნელი არ იქნება, სიცივე არ შეგვაწუხებს ან დაცული ვიქნებით მცხუნვარე მზისგან. ამ ფაქტორების გათვალისწინებით უმჯობესია ახალდაწყებული მშენებლობის ფაზაში შევიძინოთ ბინა და რაც ყველაზე მნიშვნელოვანია,  ამ დროს კვადრატული მეტრის ღირებულებაც ყველაზე დაბალია. ხოლო, თუ ბინის ღირებულებას სრულადაც დავფარავთ, ამრიგად დაზღვეულები ვიქნებით რომ სხვა არანაირი თანხის გადახდა არ მოგვიწევს, არც ფასი გაძვირდება შემდეგ ეტაპზე და არც პროცენტი გვექნება გადასახდელი. თუმცა, ასეთ შემთხვევაში იმის რისკიც, რომ დროულად არ ჩაგვბარდეს ბინა უფრო მაღალია, ვიდრე დასრულებული მშენებლობის დროს.
  

იმ შემთხვევაში თუ თანხის სრულად შეტანას ვერ ვახერხებთ და ბანკის დახმარება გვჭირდება, მშენებარე და ახალაშენებულ ბინას აქაც მნიშვნელოვანი უპირატესობები აქვს და შეგვიძლია უკეთესი პირობებით მივიღოთ სესხი, ვიდრე მეორადი ბინის შეძენისას. გარდა ამისა, მშენებლობის დასრულების ფაზაში დეველოპერები, ხშირად, მნიშვნელოვან აქციებს სთავაზობენ მობინადრეებს და ამ დროს შეიძლება საკმაოდ სარფიანი წინადადება მივიღოთ.

ფასზე ასევე მნიშვნელოვან გავლენას ახდენს რამდენად დატვირთულია უბანი, არის თუ არა იქ კეთილმოწყობილი ინფრასტრუქტურა, სატრანსპორტო კვანძები, მუნიციპალური ტრანსპორტის საკმარისი რაოდენობა და რამდენად ადვილად უკავშირდება გზა ქალაქის სხვა ნაწილებს. ასევე, ფასზე მნიშვნელოვნად აისახება პრესტიჟულ უბნებთან სიახლოვე, რასაც თავისი სიკეთეები მოჰყვება, როგორიც არის გასართობი და კვების ობიექტები, ბანკები, სასწავლო დაწესებულებები და ყველა ის სერვისი, რაც თანამედროვე ადამიანს სრულფასოვანი ცხოვრებისთვის სჭირდება. ყველა ამ დეტალის გათვალისწინებით შეგვიძლია ჩვენთვის ხელსაყრელი პირობებით მოვძებნოთ ბინა და თუ ყურადღებას გამოვიჩენთ, შესაძლოა სულ მალე იდეალური საცხოვრებელი ვიპოვოთ, რომელიც ჩვენს ყველა მოთხოვნას დააკმაყოფილებს.