როგორ მოვაწყოთ ინტერიერი კონტემპორარის სტილში

კონტემპორარი, როგორც ინტერიერის დიზაინის სტილი ზოგისთვის იდუმალი სიახლეა, ხოლო ზოგისთვის ინტერიერის ყველაზე სასურველი სტილი. კონტემპორარის საკმაოდ ბუნდოვანი საზღვრები აქვს, ამიტომ რთულია ის კონკრეტულ ჩარჩოებში მოაქციო, თუმცა მაინც აქვს დამახასიათებელი აუცილებელი შტრიხები.

რატომ კონტემპორარი

კონტემპორარი არის თანამედროვე სტილი ინტერიერში, რომელსაც მკაფიო განმარტება და ისტორიული ელფერები არ გააჩნია. ეს სტილი ზუსტად ასახავს ჩვენი დროის, ჩვენი ათწლეულის ინტერიერის ტენდენციებს. ის არის თანამედროვე და სრულად ითვალისწინებს კომფორტული და ერგონომიული საცხოვრებლის ორგანიზების ყველა კანონს. მისი ქვაკუთხედია - სიმარტივე, ფუნქციონალობა და პრაქტიკულობა. ამავდროულად, ასეთი ინტერიერის ზოგადი ატმოსფერო გამოირჩევა არისტოკრატიულობით, ესთეტიკით და დახვეწილი ფორმებით. კედლები, ჩვეულებრივ, შეღებილია მშვიდ და თბილი ფერებში, ხოლო ჭერი თეთრი ბათქაშით არის დაფარული. შერჩეულია ძვირადღირებული სასიამოვნო მასალის მშვიდი, სწორი ფორმების მქონე ავეჯი და საგულდაგულოდაა გააზრებული ბინაში განათება, იმისთვის რომ ის კომფორტული იყოს დღე-ღამის ნებისმიერ მონაკვეთში. განათება ცალ-ცალკე უნდა შეესაბამებოდეს სახლის თითოეულ ზონას. მაგალითად, ცალკე სამუშაო ადგილის განათება სამზარეულოში, მისაღები ოთახში კომფორტული თბილი განათება, ხოლო შედარებით ბნელი იატაკის ნათურები კომფორტული საღამოებისთვის.

რისგან შედგება კონტემპორარი

რამდენადაც Contemporary ინგლისურად „თანამედროვეს“ ნიშნავს. ზოგადი ატმოსფეროს მხრივ, სტილი Hi-tec-ს და მინიმალიზმს მოგაგონებს, მაგრამ მათგან განსხვავებით უფრო კომფორტული და მორგებულია მყუდრო ცხოვრებისთვის. ცივ ფერებში გადაწყვეტილი პლასტმასის ნაცვლად, შერჩეულია თბილი ფერების მქონე ეკოლოგიურად სუფთა მასალები. სხვა სიტყვებით რომ ვთქვათ, ეს არის მდიდრული მინიმალიზმი ძვირადღირებული მასალების გამოყენებით - ხავერდი, მარმარილო, ხე.

კონტემპორარი ურბანული სტილია და მისი პრინციპები მოდის ტენდენციებს და წარმოებას ეფუძნება. ბინას არ უნდა ჰქონდეს უხვი და ზედმეტი დეტალები. ამ სტილის სისადავე, ელეგანტური დიზაინი და მდიდრული გარემო დამატყვევებლად მოქმედებს სტუმრებზე. ერგონომიკის პრინციპები ინერგება ბინის ყველა კუთხე-კუნჭულში. სივრცე ორგანიზებულია უმცირეს დეტალებამდე. პატარა სტუდიოებში სივრცის დაზოგვისა და სინათლის შესაშვებად კარებს შუშის ტიხრები ცვლის. ამ სტილს არ უხდება არაფუნქციური დეკორის ელემენტები. თითოეულმა ელემენტმა უნდა შეასრულოს მკაფიოდ განსაზღვრული ფუნქცია. დასაშვებია სხვა სტილის ელემენტების შეუმჩნეველი ჰარმონიული გამოყენება. ფერი, გარემო და სხვა დეტალები ინტერიერის საფუძველს უნდა შეესაბამებოდეს.

ბინაში დომინირებს ნეიტრალური შუქ-ჩრდილები - თეთრი, შავი, ნაცრისფერი, შოკოლადისფერი, კრემისფერი. ხოლო, დამატებით ფერებად შერჩეულია ჰარმონიული პასტელის ფერები. ასევე აქ შეგხვდება მსუბუქი და მშვიდი ტექსტილი. არ უნდა გამოიყენო მძიმე და ზედმეტი ორნამენტების მქონე ფარდები.

რა სახის ავეჯი განვათავსოთ ბინაში

კონტემპორარის სტილში გადაწყვეტილი სახლის ინტერიერის გასაფორმებლად იდეალურია თანამედროვე, მასობრივი წარმოების ავეჯი. მკაცრი ფორმები და პროპორციული ხაზები შერწყმულია კლასიკურ ტექსტურებთან. ავეჯი უნდა იყოს უბრალო, კომფორტული და დახვეწილი. სამზარეულოსა და სხვა ოთახების კარადებს უნდა ჰქონდეს სწორი ფორმის ბრტყელი კარი ზედმეტად გაფორმებული სახელურებისა და სხვა დეკორატიული ელემენტების გარეშე. აქაც მისასალმებელია პასტელის მქრქალი შუქ-ჩრდილების გამოყენება, სათავსოების უნაკლო ორგანიზება ბინაში დიდი სივრცისა და სისუფთავის შეგრძნებას უზრუნველყოფს. ამიტომ, უნდა შეეცადო ყველა სახის უწესრიგობა გამორიცხო.

სასურველი ვარიანტია გასაშლელი ავეჯი, ტრანსფორმერი საწოლები, დასაკეცი დივნები და ჩაშენებული კარადები, რომელიც ადგილს დაგიზოგავს. ელემენტების ტრანსფორმაცია საშუალებას გაძლევს გამოიყენო ისინი სხვადასხვა მიზნებისთვის. ისეთი ავეჯი, რომელსაც ფორმის შეცვლა შეუძლია, საშუალებას მოგცემს შეუხამო ისინი სხვადასხვა ელემენტებს და უკვე არსებულ სისტემას.