რა უნდა ვიცოდეთ, სანამ ბინიდან კერძო სახლში გადავალთ

კერძო სახლსა და კორპუსის ბინაში ცხოვრება ერთმანეთისგან რადიკალურად განსხვავდება. არ არსებობს მზა პასუხი იმასთან დაკავშირებით, რომელია საუკეთესო ვარიანტი, რადგან ყველა ადამიანი ამ არჩევანს ინდივიდუალურად აკეთებს თავისი გემოვნებისა და ფინანსების გათვალისწინებით. თუმცა არსებობს რჩევები, რომელიც იმ ადამიანებს გამოადგებათ, ვინც მუდმივად ბინაში ცხოვრობდა და აპირებს, რომ კერძო სახლში ცხოვრების გამოცდილებაც შეიძინოს.

მთავარი განსხვავებები

ბინაში და კერძო სახლში ცხოვრება მკვეთრად განსხვავდება ერთმანეთისგან. ყველაზე მთავარი განსხვავება ისაა, რომ ყიდვის/აშენებისა და რემონტის შემდეგ ბინაში ცხოვრების ხარჯები მხოლოდ ყოველთვიური სტანდარტული გადასახადებით ან სხვადასხვა შენაძენებით შემოიფარგლება, ხოლო კერძო სახლს აქვს ინდივიდუალური ეზო, რომელსაც მუდმივად სჭირდება მოვლა, განახლება, დიდი ფიზიკური და ფინანსური რესურსის ჩადება და  ექსტერიერზე ზრუნვა. შესაბამისად, მზად იყავით, რომ კერძო სახლში გადასვლისას გაგეზრდებათ ხარჯები.

თუკი აქამდე კორპუსის ბინაში, მაღალ სართულზე ცხოვრობდით და თქვენი ბინიდან ქალაქის ხედი იშლებოდა, ამ ხედების დათმობა მოგიწევთ, რადგან კერძო სახლის პროექტიდან გამომდინარე, შეუძლებელია ისეთი სიმაღლიდან გეშლებოდეთ ხედი, როგორიც კორპუსში გქონდათ.

განსხვავდება ინფრასტრუქტურაც, თუკი აქამდე მიჩვეული იყავით სახლში ლიფტით სიარულს, კერძო სახლის შემთხვევაში, როგორც კი თქვენი ეზოს კარს გახსნით, სახლში შესვლამდეც უკვე შინ იგრძნობთ თავს, დაპროექტების თვალსაზრისითაც, კორპუსის შემთხვევაში სამშენებლო კომპანიის არქიტექტურას და დადგენილ ნორმებს მიჰყვებით, კერძო სახლი კი თავად შეგიძლიათ განსაზღვროთ როგორი განლაგებით იქნება წარმოდგენილი.

კერძო სახლის პლუსები

თუ აპირებთ, რომ კერძო სახლი გქონდეთ მფლობელობაში, კორპუსის ბინაში მცხოვრებლებზე დიდი უპირატესობა ნამდვილად გექნებათ იზოლირებული გარემოს შექმნის თვალსაზრისით. არ გეყოლებათ კედლის/კარის მეზობელი, რომელსაც შეაწუხებთ ხმაურით ან პირიქით, თქვენ შეწუხდებით მისი სტუმრებით. არ გექნებათ იმის საშიშროება, რომ ზედა მეზობლისგან წყალი ჩამოგივათ. გექნებათ ჰარმონია ბუნებასთან, თქვენს საყვარელ მცენარეებს გაახარებთ თქვენს საკუთარ ეზოში, არ მოგიწევთ პარკინგის ადგილის მუდმივი ძებნა, ეზოში შეიძლება გქონდეთ გამოყოფილი ადგილი თქვენი ავტომანქანისთვის, ან ავტოფარეხიც გაითვალისწინოთ დაპროექტებისას. შეგიძლიათ ფასადი მოაპირკეთოთ თქვენი გემოვნებისამებრ და სამომავლოდ ლავირების საშუალებაც დაიტოვოთ, რათა კონკრეტული დეტალების შეცვლის სურვილის შემთხვევაში, გქონდეთ შესაძლებლობა მიაშენოთ რაღაც ნაწილი თქვენს ბინას ისე, რომ კორპუსის მიშენებისგან განსხვავებით, ლამაზიც იყოს, დახვეწილიც და არც მეზობელმა გამოთქვას პრეტენზიები იმის შესახებ, რომ საკმარისი მზის სხივი აღარ მოხვდება მის ფანჯრებში. შეგიძლიათ საკუთარი მცირე რეკრეაციული ზონა მოიწყოთ, აუზიც გქონდეთ და სახლი ნამდვილ კომფორტის ზონად აქციოთ. კერძო სახლის შემთხვევაში ნებისმიერი ჩანაფიქრის რეალობად ქცევაა შესაძლებელი, მთავარია ამისთვის ფინანსური რესურსები გქონდეთ.

კერძო სახლის მინუსები

როდესაც უკვე გადაწყვეტილია, რომ ბინიდან კერძო სახლში გადაინაცვლოთ, რა თქმა უნდა, დადებით მხარეზე მახვილდება ყურადღება და დიდი მოლოდინი იქმნება იმის თაობაზე, რა კარგი იქნება იზოლირებულად, თქვენი გემოვნების მიხედვით შექმნილ სახლში ცხოვრება. თუმცა, აუცილებელია, რომ რეალისტურად შეხედოთ საცხოვრებლის შეცვლის საკითხს და თვალი გაუსწოროთ იმ სირთულეებსა და მინუსებსაც, რომელიც ბინიდან კერძო სახლში გადასვლას მოსდევს. როგორც ზემოთ აღვნიშნეთ, პირველი დიდი განსხვავება თქვენი ხარჯების ზრდა იქნება, ვინაიდან მუდმივი მოვლა სჭირდება ეზოს, თუ გადაწყვეტთ, რომ მცირე სოფლის მეურნეობასაც მიჰყოთ ხელი და მცირე კულტურები გაახაროთ თქვენს ეზოში, ამისთვისაც შესაბამისი დროისა და რესურსების გამოყოფა მოგიწევთ.

გარდა ამისა, კერძო სახლის დაპროექტებისას, სასურველია, კონსულტაციები გამოცდილ არქიტექტორთან გაიაროთ, რომელიც გირჩევთ როგორ დაგეგმოთ თქვენი სახლი. თუკი ბინის შემთხვევაში კომუნიკაციები, კანალიზაცია და მსგავსი დეტალები მოგვარებული გხვდებათ, კერძო სახლში გადასვლისას, მით უფრო, თუკი უკვე აშენებულს არ ყიდულობთ და ნულიდან იწყებთ მის შენებას, აუცილებლად მოგიწევთ გაერკვიოთ სისტემებში, დიდი ძალისხმევა დაგჭირდებათ კომუნიკაციების სახლამდე მიყვანისთვის. გარდა ფიზიკური შრომისა და სპეციალისტების დახმარებისა, აუცილებლად უნდა გაერკვიოთ კანონებსა და რეგულაციებშიც, რათა აიღოთ მშენებლობის ნებართვა. ვინაიდან პროექტის დამტკიცება მარტივი საქმე არ არის, ამ საკითხებშიც სპეციალისტებთან კონსულტაციის გავლა იქნება რეკომენდებული.

საბოლოოდ, უმჯობესია, რომ საცხოვრებლის ტიპის შეცვლამდე, კარგად აწონ-დაწონოთ ყველა რისკი და ბენეფიტი, შეადაროთ ერთმანეთს, კიდევ ერთხელ გადაავლოთ თვალი თქვენს ფინანსურ შესაძლებლობებს და მასთან შესაბამისობაში შეუდგეთ სურვილების ასრულებას და ახალ სახლში თქვენი მომავლის შექმნას.