როგორ დავმალოთ რადიატორი ლამაზად

სამწუხაროდ, ხშირად ისე ხდება, რომ რადიატორი და გათბობის სისტემა ინტერიერს აუშნოებს. თავს იჩენს ხოლმე საჭიროება, ეს ნივთი შეინიღბოს. მაგრამ ეს უნდა გაკეთდეს თან ლამაზად და თან უსაფრთხოდ. მოდით ვნახოთ ვარიანტები, თუ როგორ შეიძლება ამ პრობლემის მოგვარება.

იმისათვის, რომ ბატარეა ისე შეიფუთოს, თან ლამაზი იყოს და თან სითბოს სათანადოდ გამოსცემდეს, უსათუოდ უნდა იცოდეთ, რა პრინციპით ათბობს ტერიტორიას.

ყველაზე პრაქტიკული, როგორც წესი, არის დასამაგრებელი ან მისადგამი ატრიბუტები, რომელიც ძალიან მარტივად მაგრდება და სერიოზულად არ აფერხებს სითბოს გამოცემას, ასევე ნებისმიერ დროს შეძლებთ რადიატორთან 

წვდომას საჭიროების შემთხვევაში. ასეთი საჭიროება კი შეიძლება ნებისმიერ მომენტში გაჩნდეს. კედელში და თაბაშირმუყაოში ჩამონტაჟებული რადიატორი კი ამ მხრივ პრობლემას წარმოადგენს. ამ შემთხვევაში დემონტაჟისა და გამონგრევის გარეშე პრობლემას უბრალოდ ვერ მოაგვარებთ.

როგორც უკვე აღვნიშნეთ, ძალიან მნიშვნელოვანია დეკორატიული ბუდე იყოს დამზადებული ისეთი მასალისგან, რომელიც არ შეაფერხებს სითბოს გამოცემას. იმისთვის, რომ ჰაერი თანაბრად გათბეს, ის თავისუფლად უნდა ახერხებდეს შესვლას რადიატორის ქვემოდან და შემდეგ ზემოდან ამოსვლას.

ბოლო დროს მოდურია შუშის ბუდეები ფოტო პრინტებით. ეს, რა თქმა უნდა, ძალიან კარგი დეკორატიული საშუალებაა, თუმცა მნიშვნელოვნად ართულებს სითბოს გამოყოფას. ნებისმიერი სივრცისთვის და ინტერიერისთვის ოპტიმალური ვარიანტი ამოჭრილი ხის ბუდეა, რაც მეტი ხვრელი ექნება ბუდეს, მით უკეთ გადანაწილდება სითბო.

გარდა ამისა, გაცხელების შემთხვევაში ხე არ გამოყოფს არანაირ მავნე ნივთიერებას. პირიქით, მაღალი ტემპერატურის ზემოქმედების შედეგად ხე გამოყოფს ეთერზეთებს, რომელიც დადებითად მოქმედებს ადამიანის ჯანმრთელობაზე. ამ შემთხვევაში საუბარი, რა თქმა უნდა, ნატურალურ ხის მასალაზეა.

როგორც უკვე აღვნიშნეთ, დღესდღეობით ძალიან ბევრი საშუალება არსებობს საიმისოდ, რომ ლამაზად, დეკორატიულად შეინიღბოს ძველი თუჯის რადიატორები. დეკორად შეიძლება გამოიყენოთ ეკრანი, ხის დაფა, თაღი, ან სულაც კედელში ჩამონტაჟება.

ეს მაშინ, როდესაც საუბარია ისეთ ოთახებზე, როგორიც არის ბავშვის ოთახი, მისაღები, საძინებელი, თუმცა, აბაზანაში და მაგალითად, სამზარეულოში შესაფუთი მასალა ისეთი უნდა იყოს, რომელიც კარგად გაუძლებს ორთქლს ზემოქმედებას და არ გამოყოფს ქიმიურ ნივთიერებებს. ამ შემთხვევაში ოპტიმალური ვარიანტი საღებავით გადაღებვაა.

როგორც ხედავთ, არჩევანი დიდია, მთავარია თქვენს მიერ შერჩეული დიზაინი იყოს პრაქტიკული და უხდებოდეს ინტერიერს