რა მოხდა უძრავი ქონების ბაზარზე 2022 წელს?

2022 წლის დასაწყისიდანვე ექსპერტები ვარაუდობდნენ ფასების ზრდას უძრავ ქონებაზე, რაც რეალურად ახდა და ამის ერთერთი ძირითადი მიზეზი რუსეთ-უკრაინის ომის შედეგად საქართველოში მათი მოქალაქეების შემოდინება გახდა. ზოგადად, საქართველოში უძრავი ქონების ბაზარი კონცენტრირებულია და დედაქალაქზე მოდის მთლიანი ბაზრის დაახლოებით 70%.

საქართველოში ლოიალური საგადასახადო სისტემა, უძრავი ქონების გადაფორმების შედარებით მარტივი პროცედურები და ხელმისაწვდომი ფასები ქმნის მოთხოვნას როგორც საინვესტიციო უძრავ ქონებაზე, ისე საცხოვრებელ კომპლექსებზე. 2022 წლის განმავლობაში მოთხოვნა გაიზარდა როგორც ქირაზე, ასევე ყიდვაზე და საკვანძო ლოკაციებს თბილისი და ბათუმი წარმოადგენენ.მაგალითად, დედაქალაქში 2022 წლის სექტემბერში გასული წლის იმავე პერიოდთან შედარებით 18%-ით მეტი ბინა გაიყიდა (რაოდენობრივად 663 ბინა). საგრძნობლად მოიმატა ქირის ფასებმა, რის გამოც საქართველოს მოქალაქეებს გაუჭირდათ იმ ბინების შენარჩუნება, რომლებშიც ამ დრომდე ცხოვრობდნენ ქირით, განსაკუთრებით კი იმ სტუდენტებისთვის, რომლებიც სასწავლებლად დედაქალაქში უნდა ჩამოსულიყვნენ რეგიონებიდან,თითქმის შეუძლებელი გახდა ბინის ქირაობა.

2022 წლის პირველ კვარტალში უძრავი ქონების ფასების ინდექსი გაიზარდა 4.2%-ით, წინა კვარტალთან შედარებით. მესამე კვარტალში კი, მესორესთან შედარებით აღნიშნული ინდექსი 3.2%-ით გაიზარდა, ხოლო წლიურმა ზრდამ კი - 10.7% შეადგინა. ასევე, მაგალითად ზაფხულში, დედაქალაქში საცხოვრებელი ქონების საშუალო ფასი 896.5 დოლარი გახდა, რაც გაზაფხულთან შედარებით 41.8 დოლარით მეტია. ფასის ზრდა შეინიშნება სტაბილურად, წლის განმავლობაში.

ფასები დამოკიდებულია უძრავი ქონების მდგომარეობასა და მდებარეობაზე, ასევე იმაზე, პირველად მდგომარეობაშია თუ მეორადში, ახალ აშენებულია თუ ძველი. უბნების მიხედვით, დედაქალაქში, ყველაზე მეტად ბინები და კერძო სახლები გაძვირებულია ვაკეში და მთაწმინდაზე, ხოლო იაფია გლდანსა და სამგორში.

სტატისტიკის მიხედვით, ყიდვის ფასი გასულ წელთან შედარებით ყველაზე მეტად გაიზარდა საბურთალოზე, ნაძალადევსა და გლდანში, ხოლო ქირავნობის ყველაზე მაღალი ზრდა დაფიქსირდა ჩუღურეთის რაიონში. რაც შეეხება ქირავნობის შემოსავლებს, ეს სტატისტიკა შემდეგნაირად განაწილდა: პირველია დიდი დიღომი, შემდეგ ისანი და შემდეგ გლდანი.